Su Kaabung kanu manga Guay-guay enggu su Kangadtalu
11
Sangat a 'gkasuatan nu Kadenan a Mapulu su matidtu a katimbang,ugaid'a sangat a 'gkabensian nin su salimbut a katembu.
2 Mababa i muletad'u taw a aden ilemu nin,
ugaid'a su mapulu i muletad'in na nanget a makagkaya.
3 Su matidtu a kabpaguyag-uyag i pedtutulu kanu matidtu a taw,
ugaid'a su bigkug i kapaguyag-uyag'in na entu bun ba i makabinasa lun.
4 Su matidtu a uyag-uyag na makapalipuas sa kabinasan,
ugaid'a su kakawasan na di makadtabang amaika makauma den su lipunget'u Kadenan.
5 Su katidtu nu kapaguyag-uyag'u taw a matidtu , na entu ba i makapatidtu lun kanu 'bpelalakawan nin,
ugaid'a su daluaka a manga taw na makatala sa mapasang sabap kanu dikena mapia a galebekan nilan.
6 Su kaikelas'u taw a 'bpaguyag-uyag sa matidtu, na entu bun ba i makapalipuas lun,
ugaid'a su dili kangasaligan a taw na mamakalusak sabap kanu mawag a kahanda nilan.
7 Na amaika matay den su daluaka a manga taw
na langun nu 'gkapangingalap'ilan enggu 'bpaginapasen nilana na madala bun.
8 Su matidtu a manga taw na malipuas kanu kasimuketan,
ugaid'a su daluaka a manga taw na makaamung kanu kasimuketan.
9 Pembinasan nu manga taw a dala kadenan nin su pagidsan nin a manusia sa ukit'a kangadtalu nilan,
ugaid'a su matidtu a manga taw na nia bun lemipuas lun na su tuntay nin.
10 Na amaika embantas den su kabpaguyag-uyag'u matidtu a manga taw na edsisigalaw su sakadalepa.
Maitu bun ba, amaika nia matay su daluaka a manga taw na mamelalis bun silan sa kagalaw.
11 Sia makanggulalan kanu palihala nu matidtu a manga taw na embantas su dalepa,
ugaid'a sia menem makanggulalan kanu kangadtalu nu daluaka a manga taw na mabinasa su dalepa.
12 Na su manga taw a dala akal'in na edsudian nilan su ped'ilan a taw,
ugaid'a su manga taw a aden nasabutan nin na dili edsudi.
13 Su taw a mategel mangumbal sa bitiala na ilakit'in su di dait a ipebpayag a bitiala,
ugaid'a su taw a kasaligan na mataw magena kanu ibpagena a bitiala.
14 Amaika dala matulanged a taw a mamitua kanu dalepa na mabinasa su dalepa,
ugaid'a amaika madakel i matulanged a taw a mamitua kanu dalepa na nanget a makalipuas su entu.
15 Amaika pangakun nengka su nautang'u ped a taw na nanget a seka i makagkulub kanu entu,
tembu di ka mangaku su nautang'u ped a taw ka enggu dala sakit'a ulu nengka.
16 Su dupang a manga mama na nia nilan bu makua na kakawasan,
ugaid'a su babay a mapia i palangay nin na 'bpagadatan nu taw.
17 Na su malimu a taw na masabpet'in bun su kakalimu nin,
ugaid'a su taw a dala lat'a nanam'in na sekanin bun i makabinasa kanu ginawa nin.
18 Su daluaka a taw na di bun 'gkauget su makua nin a balas,
ugaid'a su matidtu a taw na makatalima sa tidtu a balas.
19 Su taw a palalayunen nin su matidtu a kabpaguyag-uyag na nanget a makapaguyag-uyag sa mauget,
ugaid'a su taw menem a kadaluakan i 'bpangilayn nin na nanget a mangagan bu i kapaguyag-uyag'in.
20 Su taw a kadaluakan i dalem'u pamusungan nin na 'gkabensian nu Kadenan a Mapulu,
ugaid'a sangat a 'gkasuatan nin su taw a 'bpaguyag-uyag sa matidtu .
21 Na nanget a siksan nu Kadenan a Mapulu su taw a daluaka,
ugaid'a ilipuas'in su matidtu.
22 Su babay a manisan a dala itungan nin
na mana sekanin sising a bulawan a inisangkat kanu mudseng'u taw sa lupa.b
23 Su 'gkapaginagkay nu ginawa nu matidtu a manga taw na nia nin kabpawangan na kapianan,
ugaid'a su 'gkapangingalap'u daluaka a manga taw na nia nin ulianan na kasiksan.
24 Aden taw a mangalimuan na makin kaumanan su kakawasan nin
enggu aden bun taw a masingit na nia nin kaulianan na mamiskin.
25 Su taw a mangalimuan na embantas su uyag-uyag'in;
su taw a tabangan nin i ped'in na kadtabangan bun mambu sekanin.
26 Na idsinta nu manga taw su apia entain a ipagena nin su manga nasabpet'in,
ugaid'a palihala i makua nu taw a 'bpasa kanu nasabpet'in.
27 Su taw a mangilay sa kapianan na mapia i matun nin,
ugaid'a su taw a kadaluakan i pangilayn nin na matun nin su entu.
28 Su taw a nia nin saligan na su kakawasan nin na makadadsang,
ugaid'a su taw a matidtu na embantas a mana su pamulan a mapia i kapangengetu nin.
29 Su entain i kadsabapan nu kaguligaw nu sakambinabatan nin demun na madala su tamuk'ilan
taman sa maulipen bu sekanin nu taw a aden ilemu nin.
30 Su taw a balaitungan na nia nin unga na uyag-uyag,
ugaid'a su kadupang na nia nin maunga na kapatay.
31 Na kagina ka su matidtu a manga taw na pembalasan sia sa liwawaw na dunia,
na maitu bun ba, su manga taw a baladusa na nanget a siksan silan sabap kanu kadaluakan nilan.