Su Matidtu enggu su Daluaka a Taw
12
Na apia entain i miug patidtun na malilini sa ilemu,ugaid'a su taw a di miug patidtun na babal.
2 Su taw a matulanged na sangat a 'gkasuatan nu Kadenan a Mapulu,
ugaid'a su taw menem a mawag i kahanda nin na pedsiksan.
3 Su taw a matidtu na mana sekanin kayu a masalig a di magaga madtud,
ugaid'a su taw a nia nin penggulan na kadaluakan na malemu magkeleng-keleng.
4 Su matulanged a kaluma a babay na mana sekanin sansangan kanu ulu nu kaluma nin,
ugaid'a su dala kaya nin a kaluma a babay na mana sekanin sakit a pegkaket kanu tulan nu kaluma nin.
5 Su pegkahandan nu matidtu a taw na wagib,
ugaid'a su pengguniaten nu daluaka a taw na kasalimbut.
6 Su kadtalu nu matidtu a taw na makapalipuas kanu makagkaid,
ugaid'a su kadtalu nu daluaka a taw na mana su talibunu a 'bpagayan sa mabunu nin.
7 Su sakambinabatan nu matidtu a taw na di magkeleng-keleng,
ugaid'a su daluaka a taw na makatala sa kabinasan taman sa madala silan.
8 Mabadtug su taw sia makanggulalan kanu kadalidip'u kapagitung'in,
ugaid'a su di pakasugat i kapagitung'in na pagkayan.
9 Nia pan tinemu su kadsalilidan demun a taw a dikena badtug ugaid'a aden panunugun nin,
kumin kanu taw a 'bpagigiling sa badtug ugaid'a dala besen 'gkakan nin.
10 Su matidtu a taw na apia su nasisita nu manga ayam'in na pedtiakapan nin,
ugaid'a su daluaka a taw na apia su kabpangalimuan nin na ebpun kanu kaitem'u atay nin.
11 Su taw a pangangawidan nin su lupa nin na makasabpet sa madakel a kauyagan,
ugaid'a su taw menem a nia nin 'bpaginapasen na su dala katagan nin na dala akal'in.
12 Su matidtu a taw na mana su kayu a madalem i kinandalig'in,
ugaid'a su daluaka a taw na 'gkadsekelan nin su napangua nu pagidsan nin a daluaka.
13 Su matidtu a taw na pakalipuas kanu kasamukan,
ugaid'a su daluaka a taw na nia bun papedtibpu lun kanu ngali nu buwaya na su dikena mapia a kangadtalu nin.
14 Pembalasan su taw kanu mapia a kadtalu nin
enggu nia bun embalingan kanu taw na su ngin i unga nu galebekan nin.
15 Su taw a aden sabut'in na 'bpakikineg sa indawan,
ugaid'a su babal na nia nin kapegkailay kanu penggalebeken nin na pakasugat.
16 Su taw a aden tuntay nin na di nin ipamamantag su kapapegkabulug lun,
ugaid'a su babal a taw na malemu gaid mailay su lipunget'in.
17 Su matidtu a saksi na pedtalu sa bantang,
ugaid'a su dikena matidtu a saksi na kabudtud bu i pedtalun nin.
18 Su di kapangungulam sa kadtalu na mana su sundang a pakapali kanu pamusungan,
ugaid'a su kadtalu nu balaitungan a taw na makapia sa pamusungan.
19 Su kadtalu a bantang na mapalalayun taman sa taman,
ugaid'a su kadtalu a dikena bantang na mangagan bu i magaga nin.
20 Su apia entain i malilini sa kalilintad na aden sa lekanin su kagalaw,
ugaid'a kasalimbut menem i aden kanu apia entain a nia nin pegkahandan na kadaluakan.
21 Na dala mawag a manggula nu matidtu a manga taw,
ugaid'a su daluaka a manga taw na lalayun silan makatala sa kasimuketan.
22 Na sangat a 'gkasuatan nu Kadenan a Mapulu su taw a matidtu,
ugaid'a 'gkabensian nin menem su manga taw a pedtalu sa dikena bantang.
23 Su taw a balaitungan na di nin imbabadtug su nasabutan nin,
ugaid'a su taw a babal na pembabadtug a pakapailay kanu kababal'in.
24 Su makamangun a taw na mabaluy a 'gkaunutan,
ugaid'a su taw a mapauk na mabaluy a ulipen.
25 Su kalidu na ginawa na pakapalesek kanu taw,
ugaid'a su mapia a bitiala na makagkabagel sa manggiginawa.
26 Su matidtu a taw na pakatutulu sa mapia kanu pakat'in,
ugaid'a su ukit'u daluaka a taw na pakapasibay.
27 Su taw a makamangun na makakua sa kakawasan,
ugaid'a su taw a mapauk na di nin makua su pegkahandan nin.
28 Su lalan nu matidtu a taw na uyag-uyag
enggu kanu entu ba a lalan na dala kapatay.