Su Kapakikineg kanu Mangapia a Papata
13
Su balaitungan a wata a mama na 'bpakikinegen nin su panduan lun nu ama nin,ugaid'a su lampawi menem na di nin 'bpakikinegen su kapatidtu lun.
2 Sia kanu unga nu mapia a kadtalu nu taw na pembalasan sa mapia,
ugaid'a su taw a mawag i niat'in na nia nin 'gkapangingalap kanu kaped'in na kabinasan.
3 Su taw a maulam i kadtalu nin na mawatan sa makagkaid,
ugaid'a su taw a dala ulam'u kadtalu nin na nia nin kabpawangan na kabinasan.
4 Su makamangun a taw na 'gkakua nin su langun na pegkahandan nin,
ugaid'a su mapauk a taw na di nin makua su apia ngin a pegkahandan nin.
5 Su matidtu a taw na 'gkabensian nin su kabudtud,
ugaid'a su penggalebeken nu daluaka a taw na sangat a makaya.
6 Su taw a 'bpaguyag-uyag sa matidtu na pakawatan sa makagkaid sabap kanu kaikelas'in,
ugaid'a su manga baladusa na mamakalusak sabap kanu kadaluaka nilan.
7 Aden manga taw a 'bpamagigiling bu sa miskinan ugaid'a kawasa silan.
Na aden menem manga taw a 'bpagigiling sa kawasa ugaid'a miskinan silan.
8 Su taw a kawasa na aden pakatebus'in amaika aden engguniat lun sa mawag,
ugaid'a su miskinan a taw na apia sakataw na dala engguniat lun sa mawag.
9 Su uyag-uyag'u matidtu a taw na maliwanag a benal i katayaw nin,
ugaid'a su uyag-uyag menem'u daluaka a taw na mana palitan a pebpenus-penus.
10 Su taw a makikineg sa indawan na aden ilemu nin,
ugaid'a su kasandag na nia nin kabpawangan na kapagukag.
11 Su kakawasan a ebpun sa embabaidu a pantiali na makin mangiseg,
ugaid'a su kakawasan a nakua sa ukit'a kasalimbut na mangagan bu i magaga nin.
12 Amaika makua su 'gkapaginagkay nu ginawa na mana i entu unga na kayu a makagkabagel sa manggiginawa,
ugaid'a amaika dili menem makua su 'gkainam'u ginawa na makagkalubay kanu manggiginawa.
13 Na apia entain i enggan nin sa kapantag su manga kasuguan lun na makatalima sa balas,
ugaid'a su di temalima sa manga panduan lun na mabinasa.
14 Su panduan nu balaitungan na mana su bualan nu ig a pakaenggay sa uyag-uyag
taman sa itangka ka nin kanu litag a pakapatay.
15 Su taw a balaitungan na 'bpagadatan,
ugaid'a su ukit'u taw a di kasaligan na kabinasan.
16 Su taw a balaitungan na pendalidipen nin su langun nu penggulan nin,
ugaid'a su taw a babal na pakapailay nin su kababal'in.
17 Su kasaligan a sinugu na nia nin 'gkapananggit na kapamagayun,
ugaid'a su daluaka a sinugu na nia nin 'gkapananggit na guligaw.
18 Su taw a mataw temalima sa kapatidtu lun nu ped a taw na pagadatan,
ugaid'a su taw a dili mataw temalima sa kapatidtu lun na mamiskin enggu makayaya.
19 Na sangat i kapia nin sa manggiginawa amaika masampay su kahanda,
ugaid'a su manga babal na kabensian nilan i kataligkud kanu kadaluakan a galebek.
20 Amaika su taw ka nia nin madtagapeda na su manga balaitungan na mabaluy bun mambu sekanin a balaitungan,
ugaid'a su taw a nia nin madtagapeda na manga babal na kagkaidan.
21 Su matidtu a manga taw na kabalasan sa mapia,
ugaid'a su manga taw a baladusa na kabinasan i makatingguma lun.
22 Su matidtu a taw na su kakawasan nin na mabpusaka pan nu manga temundug pan a muliataw nin,
ugaid'a su kakawasan nu baladusa a taw na lu makabpawang kanu manga matidtu a taw.
23 Apia madakel pan i 'gkasabpet kanu pangangawidan nu manga miskinan
na nia bun 'gkapianan na su manga taw a dikena mapia i ukit'in.
24 Su lukes a malimu sa wata nin na papedtidtun nin,
ugaid'a amaika su lukes ka di nin demun patidtun su wata nin na dikena nin ipegkalimu.
25 Su matidtu a taw na dili kaguteman,
ugaid'a su daluaka a taw na nanget a kaguteman.