Su Mapia a 'Gkapagasil kanu Ilemu
14
Su balaitungan a babay na pembagelan nin su sakambinabatan nin,ugaid'a su babal a babay na pembinasan nin su sakambinabatan nin.
2 Su taw a 'bpaguyag-uyag sa matidtu na aden gilek'in kanu Kadenan a Mapulu,
ugaid'a su taw a dikena matidtu i kabpaguyag-uyag'in na 'gkadtaungat'in su Kadenan a Mapulu.
3 Su kadtalu nu balaitungan a taw i pendalinding lun,
ugaid'a su kadtalu nu babal a taw i pembinasa lun.
4 Su taw a dala tudu nin a sapi a ipendadu na dala bun papegkanen nin,
ugaid'a su taw menem a aden tudu nin a ipendadu na makasabpet sa madakel.
5 Su kasaligan a saksi na di embudtud,
ugaid'a su di kasaligan a saksi na kabudtud i 'bpeliu kanu ngali nin.
6 Su katuntut sa ilemu na malemu bu a benal kanu taw a balaitungan,
ugaid'a su taw a mategel edsudi na apia manuntut pan na dala bun katuntayan nin.
7 Na tangkai ka su babal a manga taw
ka dala man makua nengka kanilan a ilemu.
8 Su ilemu nu balaitungan a taw i pedtutulu kanilan u ngin i mapia a enggulan nilan,
ugaid'a su manga babal na su kababalan nilan bun i pakapasibay kanilan.
9 Su dala akal'in a manga taw na ipedtataungat'ilan bu su kapenggula nilan sa kabaladusan,
ugaid'a su matidtu a manga taw na 'bpaginapasen nilan i kasuatan silan nu Kadenan.
10 Seka bu i pakatala kanu kamalasayan nengka.
Maitu bun ba, amaika 'gkapia i ginawa nengka na seka bun i pakagedam sa entu.
11 Su sakambinabatan nu matidtu a taw na embantas,
ugaid'a su sakambinabatan nu daluaka a taw na mabinasa.
12 Na aden a entu na nia kapegkailay nu taw kanu 'bpelalakawan nin na matidtu,
ugaid'a sia kanu kaulianan nin na entu ba besen su lalan sa kabinasan.
13 Na aden taw a matag magalaw na aden besen lidu na ginawa nu pamusungan nin
enggu su kapia na ginawa na aden a entu na nia nin ulianan na lidu na ginawa.
14 Su taw a matidtu na matalima nin su unga nu penggalebeken nin,
ugaid'a su taw a tinemaligkud kanu Kadenan a Mapulu na matalima nin bun su unga nu galebek'in.
15 Su balaitungan a taw na 'bpamikilen nin su langun na penggulan nin,
ugaid'a su paidu i tuntay nin a taw na 'bpaginugutan nin su langun na 'gkakineg'in.
16 Su balaitungan a taw na 'bpagulaman nin i ginawa nin enggu pedtangka sekanin kanu kadaluakan,
ugaid'a su babal na di nin 'bpagulaman su ginawa nin enggu di nin den 'bpagitungen i penggulan nin.
17 Su taw a malemu malipunget na pakanggula sa kababalan a galebek
enggu su taw menem a pegkahanda sa kadaluakan na kabensian.
18 Su taw a balaitungan na 'bpagumanan pamun su ilemu nin,
ugaid'a su taw a dala akal'in na makin mangiseg su kada na akal'in.
19 Su daluaka a manga taw na mamedsugiud kanu kaadapan nu manga matidtu a taw,
mamagayuk silan kanu manga matidtu.
20 Su taw a kawasa na madakel i 'bpakat lun,
ugaid'a su taw a miskinan na apia su pagubay nin na dili malilini lun.
21 Sangat i kapia nin kanu taw a ikalimu nin su pakanasisita,
ugaid'a su taw a pakabulugan nin su pagubay nin na makandusa.
22 Su apia entain a 'gkahanda sa kapianan na ikalimu enggu kasaligan,
ugaid'a su apia entain a pegkahanda sa mawag na makasibay.
23 Su taw a mategel i kanggalebek'in na aden masabpet'in,
ugaid'a su taw a taman bu sa kadtalu na da katamanan nin.
24 Nia balas kanu balaitungan na su kakawasan nilan,
ugaid'a su unga nu kababal na kabunegan.
25 Su taw a edsaksi sa bantang na makapalipuas'in su umul'u ped'in,
ugaid'a su taw a edsaksi sa dikena bantang na matipu.
26 Su taw a masela i gilek'in kanu Kadenan a Mapulu na mabagel i kelung'in
taman sa entu ba i mabaluy a dalinding'u sakambinabatan nin.
27 Su senep sa atay a gilek kanu Kadenan a Mapulu na mana su bualan nu ig a 'bpagenggay sa uyag-uyag,
itangka ka nin kanu litag a pakapatay.
28 Su kabadtugan nu datu na ebpun kanu kadakel'u taw nin,
ugaid'a amaika su datu ka dala taw nin na nanget a makadadsang.
29 Su taw a masabal na masela i nasabutan nin,
ugaid'a su taw menem a malemu malipunget na pakapailay nin su kada na akal'in.
30 Su malilintad a pamikilan na pakagkapia kanu lawas,
ugaid'a su kasekel a palangay na mana sakit a pegkaket kanu tulan.
31 Su taw a mangalimuan kanu miskinan na pembadtugen nin su Kadenan,
ugaid'a su taw a papegkapasang kanu manga miskinan na 'bpagawan nin sa kapantag su Kadenan a nangaden sa lekanin.
32 Su matidtu a taw na ibpelipuas sabap kanu katidtu nu uyag-uyag'in,
ugaid'a su daluaka a taw na 'gkabinasa sabap kanu kadaluakan nin.
33 Su ilemu na nakapamula den kanu pamusungan nu manga taw a aden tuntay nin,
ugaid'a su taw a babal na dala sa lekanin su entu.
34 Su katidtu nu taw na makaenggay sa kabadtugan kanu bangsa,
ugaid'a su kadusan nu taw i papegkaya lun.
35 Na sangat a 'gkasuatan nu datu su balaitungan a panunugun,
ugaid'a su panunugun a makapagkaya na kasiksan i makua nin.