Su Kapianan nu Kabalaitungan
15
Su mananaw a kasumpat na pakaawa sa lipunget,ugaid'a su masakit a kadtalu na pakapangiseg sa lipunget.
2 Su kapebpayag'u balaitungan sa ilemu na pakaakat kanu taw,
ugaid'a nia 'bpeliu kanu ngali nu babal a taw na kababalan langun.
3 Dala man pakapagena kanu Kadenan a Mapulu sa apia endaw pan a dalepa,
ka 'gkadsusuliman nin man su penggulan nu daluaka a taw enggu su matidtu a taw.
4 Su mananaw a kadtalu na mana unga na kayu a pakaenggay sa bagel'u manggiginawa,
ugaid'a su salimbuten a kanggudila na pakagkalat sa manggiginawa.
5 Su wata a temalima sa kapatidtu nu lukes'in na 'gkailay su kabalaitungan nin,
ugaid'a su wata a babal na di nin ibpamamantag su panduan na lukes'in.
6 Na madakel i kakawasan kanu walay nu matidtu a taw,
ugaid'a su pantiali nu daluaka a taw na pakapananggit sa kabinasan.
7 Su kadtalu nu balaitungan na pebpayapat sa ilemu,
ugaid'a su pamusungan nu babal na dala makaenggay nin a maitu.
8 Sangat a 'gkasuatan nu Kadenan a Mapulu su pangeni-ngeni nu matidtu,
ugaid'a 'gkabensian nin su kurban nu taw a daluaka.
9 Na ipegkalimu nu Kadenan a Mapulu su taw a 'bpaginapasen nin su uyag-uyag a matidtu,
ugaid'a 'gkabensian nin su ukit'u daluaka a manga taw.
10 Na apia entain i temaligkud kanu matidtu a lalan na masiksa sa sangat i kapasang'in
enggu nanget a matay su taw a mabensi kanu kapatidtu lun.
11 Na apia su 'gkanganggula kanu dalepa nu namamatay na 'gkatawan nu Kadenan a Mapulu,
na nia pan a entu su dalem'u pamusungan nu manusia!
12 Su manga taw a mategel edsudi na di miug madaway,
tembu di silan mangeni sa panduan kanu manga balaitungan.
13 Su magalaw a taw na magalaw i buntal'in,
ugaid'a su 'gkalidu i ginawa nin a taw na 'gkawan den na inam.
14 Su taw a aden tuntay nin na pedtuntut sa ilemu,
ugaid'a su taw a babal na nia nin bun 'bpangilayn na kabunegan.
15 Su 'gkabulugan a taw na tatap 'gkapasangan,
ugaid'a su magalaw i pamusungan nin na nia nin kalagidan na su manga taw a tatap pedsela-sela.
16 Nia tinemu i paidu bu i kaaden na taw a aden gilek'in kanu Kadenan a Mapulu
kumin sa kawasa a madakel i pakasimuket kanu ginawa nin.
17 Nia tinemu i kamu bu i pegken ugaid'a aden kagkakalimua nin,
kumin sa sapu i pedsedan ugaid'a dala kagkakalimua nin.
18 Su mayaw i ulu nin a taw na pakalunsan sa kapegkalimbul,
ugaid'a su taw a masabal na pakapatelen sa kapegkalimbul.
19 Su uyag-uyag'u makamangun na mana lalan a matilak,
ugaid'a su uyag-uyag'u mapauk na mana lalan a napenu na tenek.
20 Su wata a balaitungan na pakagalaw kanu dua a lukes'in,
ugaid'a su wata a babal na 'bpagawan nin sa kapantag su dua a lukes'in.
21 Su taw a aden tuntay nin na matidtu su lalan a 'bpelalakawan nin,
ugaid'a su taw a dala akal'in na 'gkasuatan nin su kabunegan.
22 Su taw a madakel i 'bpamapata lun na embantas su kahanda nin,
ugaid'a su taw a dala 'bpamapata lun na dili embantas su kahanda nin.
23 Su taw a makasugat su sawal'in kanu manga bitiala na makagalaw lun;
na sangat i kapia nin su kadtalu a nakatimpu.
24 Su lalan nu balaitungan a taw na nia nin kabpawangan na uyag-uyag
tembu pakatangka sekanin kanu lalan sa kapatay.
25 Na 'bpagulaman nu Kadenan a Mapulu su tamuk'u manga balu,
ugaid'a pembinasan nin su kaaden nu masandag.
26 Na su pengguniaten nu manga daluaka na 'gkabensian nu Kadenan a Mapulu,
ugaid'a su mapia a kadtalu na sangat i kapia nin sia kanu Kadenan a Mapulu.
27 Su taw a kabensian nin su kapabayad na maguyag-uyag sa mauget,
ugaid'a su migkawasa sa ukit a dikena mapia na kabinasan i mapananggit'in kanu sakambinabatan nin.
28 Su taw a matidtu na 'bpamikilen nin sa mapia su ipedsawal'in,
ugaid'a kadaluakan i 'bpeliu kanu ngali nu daluaka.
29 Na 'bpakikinegen nu Kadenan a Mapulu su pangeni-ngeni nu matidtu a taw,
ugaid'a matangka sekanin kanu manga taw a daluaka.
30 Su magalaw a pamenengan na makagkagalaw sa pamusungan.
Maitu bun, su mapia a katigan na makaenggay sa bagel kanu taw.
31 Na su taw a itagu nin sa ginawa su kapapedtidtu lun asal'a 'gkapia sekanin
na makalusud kanu manga taw a balaitungan.
32 Su taw a makikineg sa panduan lun na kaadenan na ilemu,
ugaid'a su taw a di makikineg sa kapatidtu lun na timbang a inawan nin sa kapantag su ginawa nin.
33 Su senep sa atay a gilek kanu Kadenan a Mapulu i 'bpagenggay sa tidtu a ilemu,
na su kababa na muletad na nia nin 'gkaunga na kabadtugan.