Su Kadenan a Mapulu i Pegkakataw kanu Langun-langun
16
Su taw i 'bpagitung kanu pegkahandan nin,ugaid'a su Kadenan a Mapulu menem i mataw lun temuman.
2 Nia kapegkailay nu uman i isa kanu penggalebeken nin na pakasugat,
ugaid'a su Kadenan a Mapulu i mataw lun pedtimbang-timbang kanu niat'u pamusungan nu taw.
3 Na itapenay nu kanu Kadenan a Mapulu su langun nu penggalebeken nu
ka enggu pembantas su manga kahanda nu.
4 Su Kadenan a Mapulu i nangaden kanu langun-taman sia luyud kanu kahanda nin,
apeg'u kabinasan nu manga daluaka.
5 Na sangat a 'gkabensian nu Kadenan a Mapulu su manga mapulu i muletad'in
enggu nanget a siksan nin silan.
6 Na sia makanggulalan kanu senep sa atay a gilek kanu Kadenan a Mapulu na pakatangka su taw kanu kadaluakan a galebek.
Na sia pakanggulalan kanu kakalimu enggu katidtu na maampun su dusa.
7 Na amaika kasuatan nu Kadenan a Mapulu su kabpaguyag-uyag'u taw
na apia su manga kuntela nin na ipagayun nilan sekanin.
8 Nia pan mapia i paidu a pantiali a sia nakua sa mapia a ukit,
kumin kanu masela a pantiali a sia nakua sa kasalimbut a ukit.
9 Su taw i 'bpagitung u ngin i enggulan nin,
ugaid'a su Kadenan a Mapulu i pedtutulu lun.
10 Su kadtalu nu datu na initulun sa lekanin nu Kadenan
enggu su kapangukum'in na wagib.
11 Su matidtu a katimbang enggu katembu na ganat kanu Kadenan a Mapulu,
sekanin i pegkahanda kanu wagib a katimbang.
12 Na 'gkabensian nu manga datu su kadaluakan a galebek,
kagina su kapendatu na nia lun pakapagkabagel na su kanggulalan kanu katidtu.
13 Na 'gkasuatan nu datu su taw a bantang i kadtalu nin
enggu ipegkalimu nin su taw a matidtu i kadtalu nin.
14 Su lipunget'u datu na pakapatay,
tembu su balaitungan a taw na 'bpaginapasen nin i kaawa nu lipunget'u datu.
15 Na amaika magalaw su beneng'u datu na tanda i entu na uyag-uyag;
su kinapia na ginawa nin na mana ulan a pakabubu kanu pinamamula unan nu kasabpet lun.
16 Su katuntut sa ilemu na minuna pan sa bulawan
enggu su katuntay na minuna pan sa pilak.
17 Su kapaguyag-uyag'u matidtu a taw na pakapatangka sa lekanin sa kadaluakan,
na apia entain i mangingat kanu lalakawan nin na kapangabungan nin su ginawa nin.
18 Su kapulu na muletad na nia lun makatundug na kabinasan
enggu su kasandag na nia lun makatundug na kadadsang.
19 Nia tinemu i kababa na muletad a kaped'u manga miskinan,
kumin sa semawit ka kanu pinanegkaw a kaaden a kaped'u mangasandag a taw.
20 Na su taw a ipamamantag'in su panduan lun na embantas
enggu mapia den a benal kanu taw u semalig kanu Kadenan a Mapulu.
21 Su balaitungan na mabadtug sia kanu natuntayan nin a ilemu
enggu su kategel'in sa kadtalu na pakapapangiseg sa katuntay nu ped a taw.
22 Su ilemu na mana bualan a pakaenggay sa uyag-uyag kanu apia entain a nakatuntut lun,
ugaid'a su kababal a galebek na kabinasan kanu manga babal a taw.
23 Su balaitungan a taw na 'bpagitungen nin su langun a pedtalun nin
tembu su kategel'in sa kadtalu i pakapapangiseg lun sa katuntay.
24 Su mapia a kangadtalu na mana teneb,
pakagalaw sa manggiginawa enggu pakabagel sa badan.
25 Na aden a entu na nia kapegkailay nu taw kanu 'bpelalakawan nin na matidtu,
ugaid'a sia kanu kaulianan nin na entu ba besen su lalan sa kabinasan.
26 Na su gutem'u taw i pakapapaginapas lun sa kapamantiali
ka enggu aden makasungit'in.
27 Nia pegkahandan nu dupang a taw na kadaluakan
enggu su kangadtalu nin na mana apuy a pakatutung.
28 Su tagakalen i pedsundul sa di kapamagayun
enggu su kapamelibak na makapabpitas kanu kabpakat.
29 Su daluaka a taw na pendulatan nin su pagidsan nin
enggu 'bpagagaken nin kanu kadaluakan.
30 Na su kabpesek sa mata na tanda na kasalimbut a galebek
enggu su kapendemis na tanda sa dikena mapia a niat.
31 Su kaputi na buk na mana i entu sansangan na kabpagadat,
matalima bu su entu a sansangan sia luyud kanu matidtu a kabpaguyag-uyag.
32 Na nia mapia i kasabal kumin sa kawalaw
enggu nia tinemu i kakumpen kanu ginawa kumin sa kasakup kanu sakadalepa.
33 Na ipebpagukit'u taw sa kapembunuta su ngin i dait a enggulan,
ugaid'a su Kadenan bun a Mapulu i pegkakataw u ngin i manggula.