Su Kadenan a Mapulu na 'Gkatawan nin su Pamusungan nu Taw
17
Nia pan tinemu i paidu bu a pegken ugaid'a 'bpamagayun i taw ninkumin sa inidtambaka a pegken ugaid'a di 'bpamagayun.
2 Na su balaitungan a panunugun na kandatuan nin su wata nu mapulu nin a nia nin bu pakaenggay kanu ama nin na kayayan
taman sa kaumunan pan su entu a panunugun kanu tamuk a ipebpusaka kanu manga wata nu mapulu nin.
3 Su bulawan enggu su pilak na pebpagukiten sa apuy asal'a katawan u dala simbul'in,
ugaid'a su pamusungan menem'u taw na su Kadenan a Mapulu i pedsusuliman lun.
4 Su taw a daluaka na nia nin bun pakikinegen na su kadaluakan a bitiala.
Na maitu bun, su budtuden a taw na nia nin bun pakikinegen na su pakagkaid a bitiala.
5 Su taw a edsudi sa miskinan na nia nin papegkayan na su Kadenan a nangaden lun;
na nanget a masiksa su taw a entu a ikagalaw nin su kabinasan nu ped'in.
6 Na su manga apu na mana sansangan kanu manga kaapuan nilan
enggu su manga wata na kabadtugan nilan su manga lukes'ilan.
7 Su kadtalu a mapia na di makadait kanu taw a babal,
na labi den a di makadait kanu 'bpamegkamal su kabudtud.
8 Su taw a mamayad asal'a makua nin bu su kiug'u ginawa nin
na sia sa lekanin na masela a palimu su entu sa kambantas'in.
9 Su taw a mangampun sa ped'in na malilini sa kagkakalimua,
ugaid'a su taw a labiten nin mamikal su kadupangan nu ped'in na makabinasa sa kabpakat.
10 Su taw a aden tuntay nin na makaisa bu i kadaway lun na makatuntay den,
ugaid'a su babal a taw na apia lebpadan pan sa makamagatus takep na di pamun makatuntay.
11 Su daluaka a taw a nia nin bu 'bpagitungen na kasungkang,
na ipapait sa lekanin su mapasang a mangukum a semiksa lun.
12 Nia mapasang a madsumbak na su taw a babal a penggugula sa kababalan
kumin kanu talaw a binatang a inagawan sa pipis.
13 Su taw a nia nin isuli kanu kapianan na mawag
na dili tangkan na kabinasan su sakambinabatan nin.
14 Su ludsuan nu ukag na mana su pinageti a napesuan sa paidu
na gagalu na di pan pegkasela na pelenen den.
15 Sangat a 'gkabensian nu Kadenan a Mapulu su taw a sugaten nin sa kawagib su dikena 'gkawagiban a matidtu a taw,
na maitu bun su taw a di nin sugaten sa kawagib su daluaka a taw.
16 Ngin i katagan nin kanu taw a babal u mapamasa nin su ilemu,
inunta na dala bun sa lekanin su katuntay?
17 Su 'bpakat na tatap 'gkalimua,
na maitu bun, su edsusuled na edtatabangai sa timpu na kamasengetan.
18 Su dala tuntay nin a taw na mategel 'bpasad,
ka 'bpangakun nin su sinembayan nu pagubay nin.
19 Su taw a malilini sa kandusa na malilini sa ukag
enggu su taw a talibadtugena na 'bpangilay sa kabinasan.
20 Na su taw a daluaka i kapagitung'in na dili embantas
enggu su taw a budtuden na makatala sa kabinasan.
21 Su babal a wata enggu dala akal'in,
na lasay enggu lidu na ginawa kanu lukes'in.
22 Su kagalaw na manggiginawa na makagkabagel sa lawas,
ugaid'a u kaawan den na inam na 'gkalubay su badan.
23 Su taw a daluaka na temalima sa bayad sa dala pakataw lun
asal'a mabigkug su matidtu a kukuman.
24 Su taw a aden tuntay nin na di nin pebpitasen su ilemu,
ugaid'a su taw a babal na dala tuludu na kapagitung'in.
25 Su babal a wata enggu dala akal'in,
na lasay enggu lidu na ginawa kanu mimbata lun.
26 Su kapadsala kanu matidtu a taw sa dikena wagib na dikena mapia
enggu su kapakasakit kanu taw a 'gkasaligan na masela a kalimbanan.
27 Su taw a maulam sa kadtalu nin na aden ilemu nin
enggu su taw a matenggaw i ulu nin na aden tuntay nin.
28 Na apia man su babal na mana bun balaitungan amaika lemenek
enggu mana bun aden tuntay nin amaika dili edtalu.