Su Kalumbuk sa Bitiala
18
Su taw a di lemumbuk sa ped'in na nia nin bu 'bpagitungen na ginawa nin,di sekanin munut sa manga mapia a atulan.
2 Su taw a babal na di malilini 'gkataw,
ugaid'a kalilinian nin mayag i lekanin bu a itungan.
3 Su kanggula sa kadaluakan enggu kayayan
na nia nin 'gkaunga na kandimaya.
4 Su kadtalu nu balaitungan na mana kadalem'u pused'u lagat
enggu su bualan nu ilemu na mana leges'a ig a pakaganat kanu sampaw.
5 Na su katampil kanu daluaka a taw na dikena mapia
enggu su kaawa sa kawagib kanu matidtu a taw na dikena bun mapia.
6 Su kadtalu nu babal a taw na kadsabapan na kapamagukag
enggu nia bun ba i kadsabapan na kapakasakit lun.
7 Na su kanggungali nu babal a taw i makabinasa lun
enggu nia bun makatipu lun na su kangadtalu nin.
8 Su kadtalu nu tamelibaken a taw na kalinian makikineg
a mana pegken a mapia i nanam'in a 'bpananalusan kanu didalem'u tian.
9 Su kapauk na suled'u kapaminasakan.
10 Su Kadenan a Mapulu na mabagel a kuta,
sa lekanin pabpelindung su taw a matidtu asal'a di kagkaidan.
11 Su kakawasan nu kawasa a taw na mana su siudad a pinagalad sa mabagel,
na sia sa kanilan na malambeg i entu a alad a pendalinding kanilan.
12 Su kapulu na muletad na nia nin unga na makapalusak,
ugaid'a su kababa na muletad na nia nin unga na kabadtugan.
13 Su taw a semumpat sa di nin 'gkatawan su pembitialan
na babal enggu pakayaya.
14 Su kabagel'a manggiginawa na makadtabang kanu taw kanu di kapegkapia na ginawa nin,
ugaid'a u kaawan den sekanin na inam na ngin den i manggula nin?
15 Su taw a aden tuntay nin na pedtuntut sa ilemu;
su taw a balaitungan na 'bpaginapasen nin 'bpangilay su ilemu.
16 Su kapangenggay, na ukit su entu sa kakua kanu manga kahanda
enggu makaagak su entu lu kanu manga balapantag a taw.
17 Su taw a mauna pakapanudtul kanu walay na kukuman na mana entu ba i pakabenal
gagalu na di pan sekanin 'gkasumalia nu sabala.
18 Su kapebpalabunuta na pakagugud kanu di kabpamagayun;
pakagugud i entu kanu ukag'u mangabagel a taw.
19 Malegen imbalingan su nageba a kabpakat ka minuna pan i kapasang'in kanu kaludep kanu pinagalad a siudad,
ka su ukag'ilan na mana kailut'u manga kandadu nu bungawan.
20 Na sia kanu unga nu kadtalu nu taw na pembalasan sekanin,
nia nin bun masabpet na su unga nu kangadtalu nin.
21 Na magidsan i uyag-uyag atawa ka kapatay na sia pakasungu kanu ngin i kadtalu nu taw,
na su taw a malilini sa kanggugungali na masabpet'in bun su unga nin.
22 Su mama a makatun sa magkaluma nin na nakabungkal sa kakawasan
enggu nakatalima sa palihala kanu Kadenan a Mapulu.
23 Su miskinan a taw na mapia i kapangeni nin sa tabang,
ugaid'a su kawasa a taw na masakit i kasumpat'in.
24 Na aden pakat a pakabinasa sa kabpakat,
ugaid'a aden pakat a minuna pan sa kadsuled i kabpakat'in.