Su Uyag-uyag a aden Gilek'in kanu Kadenan a Mapulu
19
Nia tinemu i miskinan a taw a maguyag-uyag sa matidtu kumin kanu babal a taw a napenu na katagakal.
2 Na su kapaginapas a di nin den 'bpagitungen na nia nin 'gkaulianan na dala katagan nin
enggu su taw a masasaw i galebek'in na makasibay.
3 Amaika 'gkabinasa su taw sabap kanu kababalan nin,
na nia nin pedsenditan na su Kadenan a Mapulu.
4 Su taw a kawasa na madakel i pebpakat lun,
ugaid'a su taw a miskinan na pedtangkan nu manga pakat'in.
5 Su taw a edsaksi sa dikena bantang na nanget a masiksa;
su budtuden a taw na di nin kapalalaguyan su kukuman lun.
6 Na su 'gkaunutan na panunugaten nu madakel a taw
enggu pakat'u madakel a taw, su taw a mategel mangalimuan.
7 Na su miskinan a taw ka 'bpelidasan nu pagali nin,
na labi den su manga pakat'in a lemidas lun!
Na u pangenian nin silan sa tabang na di silan temabang.
8 Na su taw a temuntay na ipegkalimu nin i ginawa nin
enggu su taw a ulaman nin su natuntayan nin na embantas.
9 Su taw a edsaksi sa dikena bantang na nanget a masiksa
enggu su budtuden a taw na mangagan bu i umul'in.
10 Na amaika su taw a babal ka di dait a makapaguyag-uyag sa mapia,
na labi lawan den a di dait a kandatuan nu ulipen su manga datu.
11 Na su ilemu nu taw i 'gkasunguan nu kasabal'in
enggu kabadtugan nin su kadsabal'in kanu taw a nakandusa lun.
12 Su lipunget'u datu na manabia ka pan i inggel'u alimaw,
ugaid'a su kapianan nin na mana namug a pakalumes kanu manga utan.
13 Su wata a babal na kabinasan kanu ama nin
enggu su tagukagen a kaluma a babay na mana atep a aden bisay nin a 'bpagigisan na ulan.
14 Su walay enggu kakawasan na 'gkabpusaka ebpun sa lukes,
ugaid'a su balaitungan a kaluma a babay na ebpun kanu Kadenan a Mapulu.
15 Su taw a mapauk enggu kadtulug-tulug bu i galebek'in na kaguteman.
16 Na su taw a maginugut sa panduan lun na 'gkalendu i umul'in,
ugaid'a su taw a da den sempad'a penggulan nin na matay.
17 Su taw a mangalimuan sa miskinan na mana sekanin napasembay kanu Kadenan a Mapulu,
kagina imbalingan sa lekanin nu Kadenan su entu sa ukit a mapia a balas.
18 Patidtu nu su manga wata nu gagalu na aden pamun inam'ilan,
di nu pedsuguti a nia nilan kabpawangan na kabinasan.
19 Su taw a bukasu na pandaya ka den a masiksa,
ka amaika tabangan nengka, na timbang a inisundul'engka sekanin sa kabpapaluman nin lun enggula.
20 Na pakikineg ka su panduan enggu su kapatidtu sa leka,
ka nia nin i entu ulianan na kaadenan ka na ilemu.
21 Su manusia na madakel i pegkahandan nin,
ugaid'a nia bun matuman na su ngin i kalinian nu Kadenan a Mapulu a manggula.
22 Nia tanu 'gkalilinian kanu taw na su katulangedan nin,
tembu nia tinemu su miskinan a taw kumin kanu taw a budtuden.
23 Su gilek kanu Kadenan a Mapulu na makagkalendu sa umul,
na apia entain i aden lun su entu na makalilintad i ginawa nin enggu makatangka sa makagkaid.
24 Aden taw a pupus den i kapauk'in ka magaga nin den i kakuwit'in sa pegken nin,
ugaid'a di nin den magaga semungit.
25 Na tapidasi ka su taw a masudi ka u mailay nu taw a dala sabut'in su entu na kaadenan na sabut.
Na daway ka su taw a aden tuntay nin ka makin mangiseg su kinatuntay nin.
26 Su wata a mapakapasang sa ama nin enggu mamugaw sa ina nin,
na kayayan i pakaenggay nin.
27 Dua na manga wata, amaika di nengka pakikinegen su manga panduan sa leka,
na tinaligkudanan nengka su manga panduan a pakaenggay sa ilemu.
28 Su edsaksi sa dikena bantang na 'gkatataungat'in su kukuman
enggu su taw a daluaka na malilini a benal sa kadaluakan.
29 Na naadil den su kasiksan kanu manga taw a masudi
enggu su katapidas kanu manga taw a babal.