Su Taw a Balaitungan na Lemidas sa Kasamukan
20
Su kapalalangut na nia nin unga na kasudi enggu kasamukan,tembu su taw a palalangut na dala tuntay nin.
2 Su lipunget'u datu na manabia ka pan i inggel'u alimaw,
na apia entain i semakit sa ginawa nin na edtalakisin nin.
3 Su kalidas kanu kasamukan na tanda na kabadtugan,
ugaid'a su manga taw a babal na mangilay a benal sa ukit'a kapagukag.
4 Su taw a mapauk ka di demadu sa timpu na kapamula
na dala mapagagani nin sa timpu na kasabpet.
5 Su kahanda nu taw na mana kadalem'u lagat,
ugaid'a 'gkagaga i entu pedtengkad'u taw a aden tuntay nin.
6 Madakel i taw a pedtalu sa senep kun sa atay i katidtu nilan,
ugaid'a ngintu, aden ba kanilan i tidtu a kasaligan?
7 Na sangat i kapia nin kanu manga muliataw
amaika matidtu su lukes'in enggu 'bpaguyag-uyag sa matidtu .
8 Amaika su datu ka mangukum den,
na 'bpagayaken nin sa mapia u entain i minggula sa mawag.
9 Na entain ba i makadtalu sa “Saki na ikelas i pamusungan nin
enggu dala kadupangan a pinggula ku”?
10 Saben-sabenal a 'gkabensian nu Kadenan a Mapulu su salimbuten i katimbang'in enggu katembu nin.
11 Na pidsan pan su manga wata na 'gkailay den i ula-ula nilan sia kanu galebek'ilan,
'gkailay lu ba u ngintu, matidtu atawa ka ikelas su kabpaguyag-uyag'ilan.
12 Su mata a dait a ibpagilay enggu su tangila a dait a ibpakikineg
na su Kadenan a Mapulu i nangaden lun.
13 Amaika nia nengka bu kalilinian i katulug na 'gkamiskin ka,
ugaid'a amaika di ka edtulug-tulug ka maginapas ka na aden makan nengka.
14 Na aden taw a 'bpanila-tilan nin su 'bpamasan nin sa nia nin pedtalun na “Dala lantek'in i nia!”
inunta na u makatangka bu a entu na ipembabadtug'in den.
15 Na balapantag su manga bulawan enggu su balaalaga a manga watu,
ugaid'a minuna pan i kabalabantag'in su kadtalu nu balaitungan a taw.
16 Paenggay ka sa apia ngin a langun-taman su taw a 'bpangakun nin su nautang'u lapu a taw.
Na apas ka a benal i aden makaenggay nin a pamagel sa kabayad'u lapu a taw sa leka.
17 Su pegken a nakua sa ukit'a kasalimbut na mapia mambu i nanam'in kanu taw,
ugaid'a nia nin ulianan na mana pedtad kanu ngali.
18 Na amaika mangeni ka sa panduan na embantas su kahanda nengka,
tembu da ka lemu sa pembunuan amaika di ka makapangeni sa mapia a papata.
19 Su taw a tamelibaken na 'gkadtalu nin su apia di dait a pedtalun,
tembu lidasi nu su taw a maya ba i ula-ula nin.
20 Amaika su taw ka idsinta nin su dua a lukes'in
na di 'gkalendu i umul'in a mana su palitan a pebpatay.
21 Amaika su ipebpusaka a tamuk ka edtagadan i kakua lun
na sia sa kaulianan na gay na dikena palihala i kabpawangan nin.
22 Da ka a benal manuli-suli,
ka makin idedsa nengka kanu Kadenan a Mapulu ka sekanin bu i mataw sa leka maninindeg.
23 Saben-sabenal a 'gkabensian nu Kadenan a Mapulu su salimbuten i katimbang'in enggu katembu nin.
24 Su Kadenan a Mapulu i pegkakataw kanu talaguy nu uyag-uyag'u taw,
tembu dala taw a makagaga malung kanu talaguy nu uyag-uyag'in.
25 Di dait a edsasaw 'bpasad kanu Kadenan a Mapulu
ka aden a entu na kadsenditan sia kanu kaulianan nin.
26 Su balaitungan a datu na 'bpagayaken nin sa mapia u entain i minggula sa mawag,
ka u entain i minggula sa mawag na pedsiksan nin.
27 Su pamikilan enggu manggiginawa nu manusia na mana palitan a ibpagenggay nu Kadenan a Mapulu,
asal'a 'gkadsusuliman su dalem'u pamusungan nu taw.
28 Su kakalimu enggu su katidtu nu datu i pakadalinding lun;
mananalusan su kapendatu nin sia makanggulalan kanu kakalimu nin.
29 Nia kabadtugan nu manguda a taw na su kabpanasang'u kabagel'in,
nia menem kabadtugan nu matua den a taw na su kaputi na buk'in.
30 Su manga betay enggu su manga baneg na pakapatangka sa dikena mapia a galebek
enggu pakapambagu kanu pamusungan nu taw.