11
“Na sia kanu muna-muna a lagun a kapendatu ni Darius a taw sa dalepa a Midia na tinemapid aku kanu malaikat a su Mikail asal'a katabangan ku sekanin enggu makapagkabagel ku sekanin.Su Kambunua nu manga Datu sa Iluda enggu manga Datu sa Layab
2 “Na saguna na edtalun ku sa leka u ngin i bantang, aden pan telu kataw a embuat pan a datu kanu dalepa a Pirsia. Ulian nu entu, na aden pan ikapat a datu a embuat a kawasa a benal kumin kanu manga ped a entu a datu. Na sabap kanu kakawasan nin na 'gkabagel su kapendatu nin, na sekaten nin su ped sa kambunua nilan kanu pendatuan nu dalepa a Greece. 3 Daka aden embuat a endatu a maulad i masakup'in endatu taman sa enggulan nin su apia ngin i pegkiugan nin penggula. 4 Na sia kanu kabagelan nu kapendatu nin na mabinasa su pendatuan nin taman sa mabad sa pat bad. Ugaid'a dala kanu manga muliataw nin i makandatu kanu entu ka makaenggay kanu ped a taw su pendatuan nin, ugaid'a apia ka maitu na di nilan kalepengan su kabagel'u kapendatu nin.
5 “Na su datu sa laya i mabaluy a mabagel a datu. Ugaid'a isa kanu 'gkangaunutan nu sundalu nin i makalawan kanu kabagel'in taman sa 'gkaulad su pendatuan nu entu a 'gkaunutan kumin kanu datu sa laya. 6 Na kaipus'u manga lagun, na su datu sa laya enggu su datu sa ilud na edtampil enggu mangaden silan sa kapasadan. Na ipagkaluma nu datu sa laya su wata nin a babay sa kanu datu sa ilud asal'a 'gkabagel su kapedtampil'ilan. Ugaid'a di 'gkauget su entu, kagina su babay a entu enggu su kaluma nin enggu su wata ninc taman kanu manga panunugun nin na pangimatayan. Ulian nu entu, 7 na isa kanu manga suled'u babay i makasambi endatu kanu ama nin. Na lusudan nu manga sundalu nu entu a datu su pendatuan nu datu sa ilud taman kanu kuta nilan ka imbunua nilan silan, na tabanan nilan silan. 8 Na pananggiten nin lu sa Egypt su manga makua nilan embunua a mana su pegkakadenanen enggu su ped pan a balaalaga a langun-taman a inumbal ebpun sa pilak enggu bulawan. Na ulian nu entu na di nin den imbunua su datu sa ilud kanu dalem'u makapila lagun. 9 Maipus su entu na lusudan nu datu sa ilud su pendatuan nu datu sa laya ugaid'a tabanan silan taman sa makadsunud silan kanu dalepa nilan.
10 “Su manga wata a mama nu datu sa ilud na limuden nilan su madakel a pabubunua ka mangaden silan sa kambunua, mana silan degan a lemusud kanu pendatuan nu datu sa laya taman kanu kuta nin. 11 Na sabap sa entu na edsangulen silan nu datu sa laya a 'gkasakit a benal i ginawa nin. Na matalaw nin su datu sa ilud taman kanu madakel a sundalu nin. 12 Ulian nu entu a kapanaban nin na idsandag'u datu sa laya su manga enggulan nin taman sa ngibu-ngibuan a taw i pangimatayan nin ugaid'a di bun 'gkauget su entu a kapegkagaga nin. 13 Kagina su datu sa ilud na magadil menem sa madakel a sundalu a pabubunua a madakel pan kumin kanu nauna. Na ulian nu pila lagun, na lemusud sekanin 'bpaluman a kaped'in su labi pan i kadakel'in a manga sundalu a aden it'in a madakel a matalem.
14 “Na kanu entu ba a timpu na madakel i semungkang kanu datu sa laya. Na kaped kanu mamedsungkang lun na pagidsan nengka bun a manga taw sa Israil a manga dupang. Enggulan nilan su entu asal'a matuman su manga naalung ugaid'a di bun silan embantas. 15 Na makauma su datu sa ilud, ka lusudan nin su siudad a mabagel i alad'in sa ukit'a katambak'ilan sa lupa kanu ligid'u manga alad ka enggu nilan masakup su entu. Na su manga sundalu nu datu sa laya na di den silan makagaga matu apia su mangategel pan a manga sundalu nin. 16 Na su datu sa ilud na enggulan nin su ngin i kiugan nin enggula, dala den makagaga melen sa lekanin kanu entu a enggulan nin. Sakupen nin su mangapia a kalupan nu Israil taman sa sekanin den i 'gkakataw lun sa kabinasa nin lun atawa ka dili. 17 Na nia nin pagatulen na panun i kalusud'in kanu pendatuan nu datu sa laya sa endaw taman i bagel'in. Tembu mangaden sekanin sa kapasadan kanu datu sa laya. Na ipagkaluma nin kanu datu sa laya su wata nin a babay asal'a kalusudan nin sa kabinasa nin lun su pendatuan nu datu sa laya, ugaid'a dala katagan nu entu sa lekanin ka di mananalusan su entu a kahanda nin. 18 Na amaika maipus su entu, na nia nin menem edsangulen na su manga kalupan kanu manga ligid'u lagat taman sa madakel i masakup'in a dalepa. Ugaid'a aden isa a 'gkaunutan nu sundalu a matu kanu kapapegkaya nin kanu ped taman sa isuli nin sa lekanin su entu a kapapegkaya nin. 19 Daka embalingan sekanin kanu manga kuta nin lu kanu dalepa nin taman sa tabanan sekanin enggu di den sekanin mailay 'bpaluman.
20 “Na su makasambi endatu kanu datu sa ilud, na isugu nin sa peges su kapangubela sa buwis asal'a miseg su kakawasan nu pendatuan nin. Ugaid'a di gaid mauget su kapendatu nu entu a datu, ka matay sekanin sa dikena sabap sa lipunget'u taw atawa ka kambunua.
21 “Na su makasambi lun menem a endatu na mawag i ukit'in enggu dikena sekanin i dait a endatu ka nia ukit a kakua nin kanu pendatuan sa dili katekawan na kasalimbut. 22 Na madakel i pangimatayan nin a manga sundalu apeg'u mapulu nu 'bpangurban kanu Kadenan.d 23 Na ulian nu kadtampil'in kanu ped a manga taw na pagakalan nin bun silan, na 'gkabagel sekanin sa apia paidu bu silan. 24 Na sakupen nilan su kawasa sa langun a dalepa kanu prubinsia sa di silan kasipatan taman sa enggulan nin su dala pamun manggula nu apia entain kanu manga kalukesan nin. Pamagumunen nin kanu manga taw nin su manga maagaw nilan sa kambunua. 'Gkahandan nin lemusud su manga kuta ugaid'a di bun 'gkauget su entu.
25 “Na mapagkadakel sekanin sa sundalu ka enggu 'gkabagel i kambunua nin kanu datu sa laya. Ugaid'a tabanan su datu sa laya apia labi pan i kadakel enggu kabagel'u sundalu nin kagina makua na akal'u kuntela nin. 26 Na nia bun makapatay sa lekanin na su ibpamagatuang'in bun. Tembu tabanan su manga sundalu nin taman sa madakel kanilan i matay. 27 Na su dua kataw a nia a manga datu na mawag a benal i niat'in sa uman i isa kanilan ka sia kanu kadtagapeda nilan na magakala silan, ugaid'a di bun silan embantas ka mauma bun su kapupus'u kutika a initandu nu Kadenan. 28 Na embalingan su datu sa ilud lu kanu pendalepan nin a it'in su madakel a kakawasan a maagaw nin. Ugaid'a bagu sekanin embalingan na pamungkaidanan nin muna su manga taw nu Kadenan enggu su agama nilan.
29 “Na sia kanu kutika a initandu nu Kadenan, na embalinganan nin su datu sa laya ka sakupen nin 'bpaluman ugaid'a dikena den pagidsan nu nauna a nanggula. 30 Kagina mamakauma su manga kapal sa Kitime ka imbunua nilan sekanin tembu makadsunud sekanin a naawan na inam. Na nia nin pasengawan kanu sakit'a ginawa nin na su manga taw nu Kadenan enggu su agama nilan, ka nia nin ipamamantag na su manga taw a tinemaligkud kanu Kadenan. 31 Na isugu nin kanu manga sundalu i lusudan nilan taman sa enggiabuan nilan su Suti a 'Bpagagaman enggu su kuta. Patelenan nilan su uman gay a kapegkurban sa kurban a pedtutungen langun. Ka nia nilan ibetad lu na su makangingilu a pakagiabu a sabapan na katagak lun. 32 Na sasaten nin sa ukit'a kapagakal'in lun su apia entain i temalesak kanu kapasadan.f Ugaid'a atuan sekanin nu manga taw a dala taligkud kanu salig'ilan kanu Kadenan. 33 Na su balaitungan a manga taw a Israil na pamandun nilan su kadakelan, ugaid'a aden kutika a dikena bun den gaid mauget a pangimatayan su ped kanilan sa sundang, panutungen su ped kanilan, pamilanggun su ped kanilan enggu pangagawan sa kaaden su ped kanilan. 34 Na sia kanu kabpamungkaid kanilan na paidu bu i pedtabang kanilan kagina matag madakel i pedtampil kanilan na 'bpamagigiling bu. 35 Na su ped kanu manga balaitungan a taw na pamungkaidanan. Na kanu maya ba a ukit na iling-iling'u putaw na 'gkasayaban silan ka enggu silan maikelas taman sa kauma nu kapupusan gagalu na di pan 'gkauma su initandu a kutika.
36 “Na su datu na enggulan nin su apia ngin a 'gkasuatan nin penggula. Ibpapulu nin su ginawa nin kanu apia entain enggu itimbang'in i ginawa nin sa sekanin i mabagel kanu langun nu pegkakadenanen taman sa edtalu pan sekanin sa sakutu kanu Kadenan a Mapulu sa Langun. Embantas sekanin gagalu nu di pan 'gkauma su kutika a ipagedam'u Kadenan su lipunget'in. Kagina dait man a matuman su ngin i initandu nu Kadenan a manggula. 37 Di nin den pagadatan su manga pegkakadenanen nu manga kalukesan nin atawa ka su ibpamamasela nu manga babay a pegkakadenanen nilan. Di nin ipamamantag su langun na pegkakadenanen ka nia nin ipedtimbang sa ginawa nin na sekanin i mabagel kanilan. 38 Na nia nin 'bpagenggan sa alaga na su pegkakadenanen a pegkelung kanu manga kuta, a su pegkakadenanen a di 'bpagenggan sa katagan nu manga kalukesan nin. Apalan nin su entu sa manga bulawan, pilak enggu balaalaga a watu taman kanu ped pan a manga balaalaga a ibpagapal. 39 Pagkabagelen nin su manga kuta nin sa ukit a kadtabang'u ped a taw a pedsimba sa ped a pegkakadenanen. Enggan nin sa kabalapantag su manga taw a kemilala kanu kabpangulu nin taman sa ibetad'in sa balapantag a galebekan enggu umunan nin sa kalupan a balas'in kanilan.
40 “Na sia kanu kapupus'u manga timpu na imbunua nu datu sa laya su datu sa ilud. Ugaid'a su datu sa ilud na makauma a mana lipules i kangagan nin a kaped'in su manga pakakalisa nin, su manga pakukuda nin enggu su manga kapal a pabubunua nin. Madakel i masakup'in a dalepa a mana silan degan a makatingguma kanu manga dalepa. 41 Masakup'in bun su mapia a kalupan nu dalepa a Israil taman sa madakel a taw i mamamatay ugaid'a su manga taw sa dalepa a Idum, dalepa a Muab enggu su manga 'bpangulu kanu manga taw kanu dalepa a Amun na mamakalipuas kanu kapegkagaga nu datu a entu. 42 Na madakel i lusudan nin a manga dalepa, ka apia su dalepa a Egypt na dili makalipuas sa lekanin. 43 Sekanin i mabaluy a 'gkakataw kanu manga kakawasan a bulawan enggu pilak taman den kanu langun nu kakawasan nu Egypt. Na su manga taw sa Libya enggu Itiupia na sakupen nin.
44 “Ugaid'a aden manga tudtul a ebpun sa sebangan enggu ilud a makatiagka lun taman sa lemiu sekanin a malipunget a benal na madakel i mabinasa nin sa tidtu-tidtu sa kanu entu ba. 45 Mapatindeg sekanin sa tulugan a balung-balung a tuleda kanu pageletan nu lagat enggu kanu suti a palaw a sangat i kapia nin. Ugaid'a matay su datu sa ilud a dala demun makadtabang lun.