Su Inipaalung'u Kadenan kani Danyil lu kanu Adteban nu Lawas'a ig'u Tigris
10
Na kanu ikatelu lagun nu kapendatu nu Sirus sa dalepa a Pirsia, na aden katigan a inipayag kani Danyil a bedtuan sa Biltasar. Na su katigan a entu na benal enggu makapantag sa masela a kambunua. Nasabutan nin su katigan sia nakanggulalan kanu inipaalung lun.2 Na kanu entu ba a manga timpu na penggedam aku sa sangat a lidu na ginawa. 3 Dala aku makakan sa manga mapia a makan, dala apia ngin a linemudep kanu ngali ku a sapu atawa ka ig'a ubas enggu apia su kapanidsing sa lana a kamutan na dala ku enggula kanu dalem'u telu kapadian. 4 Na kanu ikaduapulu enggu pat gay kanu muna-muna a ulan-ulan nu lagun na pedtindeg aku kanu ligid'u lawas'a ig'u Tigris, 5 daka aden nasandeng ku a mama a mimbalegkas sa mapia a ginis a midsabitan sa bulawan a dala simbul'in. 6 Su lawas'in na mana watu a krisulitu, su beneng'in na pedsigay a mana lapalap enggu su mata nin na mana su kaleg'u sulu, su manga lima nin enggu manga ay nin na pedtinang a mana pinagkatinang a galang enggu su suala nin na mana ingel'u madakel a taw.
7 Saki si Danyil a nakailay bu kanu entu a inipaalung, ka su manga tagapeda ku sia kanu ubay ku na da nilan mailay su entu. Ugaid'a sangat a nangagilekan silan taman sa namakadtatalaguy silan enggu namakapamagena. 8 Na saki bu i nasama tembu saki bu i nakailay kanu entu. Linansi aku na gilek taman sa migkakapansi aku enggu naawan aku na bagel. 9 'Gkakineg ku su kapedtalu nin, na guna ku makineg su kadtalu nin a entu na linipedengan aku taman sa nakadudsum kanu lupa.
10 Ugaid'a nakatekaw demun i aden lima a minami sa laki ka binatun aku nin taman sa nakadtinggaleb aku a pegkegkel aku pamun. 11 Na nia nin pidtalu sa laki na “Hu Danyil, sangat man a pinadtaya ka nu Kadenan, edtindeg ka, ka pakikineg ka su pedtalun ku a nia sa leka ka sinugu aku man sia sa leka.” Na guna nin madtalu sa laki su entu na midtindeg aku a pegkegkel aku pamun na gilek. 12 Daka nia nin pidtalu sa laki na “Da ka 'gkagilek Danyil, ka iganat paman kanu kinapangalimbaba nengka a entu kanu ginawa nengka asal'a kaadenan ka na itungan na pinakikineg ka den nu Kadenan. Na pedsia aku asal'a masawal su pangeni-ngeni nengka a entu.a 13 Ugaid'a kinumpen aku nu 'gkaunutan a dikena 'gkapalenan kanu pendatuan nu dalepa a Pirsia kanu dalem'u nakaduapulu enggu isa a gay. Daka nakauma su Mikail a isa kanu manga mapulu nu manga malaikat ka tinabangan aku nin kagina kanu entu ba na natagak aku lu kanu 'gkaunutan a entu a lu kanu dalepa a Pirsia. 14 Na sinemia aku ka enggu ku madtalu sa leka su ngin i manganggula nu manga taw nengka a Israil kanu mangauma pan a timpu. Kagina su 'gkaalung'engka a nia na makapantag sa manganggula kanu mangauma pan a timpu.”
15 Na gagalu nu kapedtalu nin sa laki sa entu na nakabpatumeng aku a di pakadtalu. 16 Daka aden mana makalagid sa manusia a minipu kanu bibil ku, tembu nauka ku su ngali ku enggu nakadtalu aku. Nia ku pidtalu kanu pedtindeg kanu kasangulan ku na “Hu mapulu ku, sabap kanu naalung ku a entu na naawan aku na bagel enggu nalingasa i ginawa ku. 17 Na panun guna i kambitiala nu saki a nia a panunugun kanu mapulu nin? Kagina saguna na naawan aku na bagel enggu 'gkapaneled ku bun den i kapengginawa ku.” 18 Daka inami aku menem'u makalagid a entu sa manusia ka pinagkabagel aku nin. 19 Na nia nin pidtalu sa laki na “Da ka 'gkagilek, ka sangat man a pinadtaya ka nu Kadenan. Dala man makagkaid sa leka! Pakawalaw ka enggu pakabagel ka i manggiginawa nengka.” Na guna nin i entu madtalu sa laki, na naadenan aku na bagel taman sa nia ku lun nadtalu na “Mapulu, edtalu ka den i pegkiugan nengka pedtalu sa laki kagina pinagkabagel aku nengka den.” 20 Na guna su maitu, na nia nin inisawal na “Katawan nengka u ngintu ka sinemia aku sa leka? Magan sa magan na embalingan aku ka imbunua ku su 'gkaunutan a entu nu dalepa a Pirsia. Na endaw i kapasad ku sa lekanin embunua na makauma menem su 'gkaunutan a dikena 'gkapalenan a pendatu kanu dalepa a Greece. 21 Ugaid'a edtalun ku muna sa leka u ngin i nakasulat kanu Bantang a Libelu.b Na sia kanu kambunua ku na dala makadtabang sa laki, nia tabia na su Mikail a 'gkaunutan nu.