Nabi Danyil 9

Su Pangeni-ngeni nu Danyil sa kanu manga Taw a Israil

Na sia kanu muna-muna a lagun nu kinandatu nu Darius sa Babilunia a wata a mama nu Sultan Ahasirus a tupu nu manga taw a Midia, 2 na saki si Danyil, na sia kanu kapembatia ku kanu kadtalu nu Kadenan a Mapulu sia nakanggulalan kanu Nabi Yaramias na nasabutan ku su makapantag kanu kabinasa kanu dalepa a Awrusalim sa kanu dalem'u pitupulu lagun. 3 Na sabap sa entu na nangeni-ngeni aku sa tabang sa senep sa atay kanu Kadenan a Mapulu taman sa dala aku kan, mimbalegkas aku sa saku enggu minayan aku sa aw. 4 Nangeni-ngeni aku sa lekanin enggu inipangumpaya ku lun su kabaladusan nami, sa nia ku pidtalu na “Hu Kadenan a Mapulu a Kadenan ku, na sangat i kabarakat'engka enggu dait a 'bpagadatan ka, pedtumanen nengka su kapasadan nengka enggu su sangat a kakalimu nengka kanu manga taw a malimu sa leka a 'bpaginugut kanu kasuguan nengka. 5 Mindusa kami man, minggalebek kami sa mawag enggu kadaluakan, sinemungkang kami sa leka ka tinaligkudan nami su manga kasuguan nengka enggu su manga atulan nengka. 6 Da nami pakikinega su manga panunugun nengka a nabi a minayag kanu ingala nengka sia kanu manga datu nami, kanu 'gkangaunutan nami enggu kanu manga katupuan nami taman den kanu manga taw kanu dalepa.

7 “Hu Kadenan a Mapulu, su katidtu na san sa leka, ugaid'a sekami na nabausan pamun na kayayan a manga taw a Yahuda apeg den nu manga pegkaleben sa Awrusalim taman den kanu langun nu taw a Israil magidsan i masiken-mawatan a dalepa a tinagayakan nengka kanilan sabap kanu kinasungkang'ilan sa leka. 8 Hu Kadenan a Mapulu, sekami taman kanu manga datu nami enggu 'gkangaunutan apeg den nu manga katupuan nami na nabausan na kayayan sabap sa mimbaladusa kami sa leka. 9 Apia ka maitu na seka a Kadenan a Mapulu a Kadenan nami na sangat a malimu enggu mangampun sa apia nia nin kaaden i sinemungkang kami sa leka. 10 Na dala nami paginuguti su kasuguan a inenggay nengka a sia nakanggulalan kanu manga panunugun nengka a manga nabi.

11 “Na saben-sabenal a su langun nu manga taw a Israil na sinemungkang kanu kasuguan nengka enggu namakasibay silan ka da nilan paginuguti su kadtalu nengka. Tembu su pinta enggu su manga sapa a nakadalem kanu pangitaban nu Musa a panunugun nengka a Kadenan na nakatingguma sa lekami kagina nakandusa kami sa leka. 12 Na tinuman nengka a Kadenan su kadtalu nengka a siksan kami nengka enggu su 'gkangaunutan nami sa ukit a kapatingguma nengka sa lekami sa masela a kabinasan a dala pamun manggula sa lusud'a Awrusalim iganat sa ganatan enggu dala pagidsan nin sia kanu lusud'u dunia. 13 Mana bun su nakasulat kanu pangitaban nu Musa na nakatingguma sa lekami su langun nu entu a kabinasan, na apia ka maitu na dala kami pangumpaya sa leka a Kadenan a Mapulu a Kadenan nami ka dala nami bun taligkudani su manga kabaladusan enggu dala nami ipamamantag su kabantang'engka. 14 Tembu inadil'engka a Kadenan a Mapulu su kabinasan a nia taman sa inipatingguma nengka sa lekami ka wagib man su langun nu penggulan nengka ka dala nami man paginuguti su kadtalu nengka.

15 “Hu Kadenan nami a Mapulu, na inipailay nengka man su kabarakat'engka a sia nakanggulalan kanu kinapambaya-baya nengka kanu manga taw nengka ebpun kanu dalepa a Egypt, na sabap sa entu na nabadtug su ingala nengka taman sa kanu nia ba a gay. Na pedtaliman nami i nakandusa kami man sa leka enggu minggula kami sa mawag. 16 Hu Kadenan a Mapulu, na sia luyud kanu manga matidtu a entu a pinggula nengka na iawa nengka su sangat i kapasang'in a lipunget'engka kanu siudad'engka a Awrusalim a suti a palaw nengka. Sabap man kanu manga dusa nami enggu kabaladusan nu manga katupuan nami na su manga dalepa a nakabalibet sa lekami na papegkayan nilan su dalepa a Awrusalim taman den sa lekami a manga taw nengka. 17 Tembu, Hu Kadenan nami, na pakikineg ka pan su manga pangeni-ngeni ku a panunugun nengka enggu su kabpaguguliang ku 'bpangeni sa leka sa tabang. Hu Kadenan a Mapulu, ipailay nengka su sigay nengka sia kanu Suti a 'Bpagagaman sa leka a nageba den, ka enggu mapugi su ingala nengka. 18 Hu Kadenan nami, pakikineg kami nengka pan, edsusuliman ka su 'gkanggula nami. Ilay ka su siudad'engka a nageba den a su 'bpananggit kanu ingala nengka, 'bpangeni-ngeni kami sa leka sa senep sa atay sa dikena nia nin maena i matidtu kami ugaid'a sabap kanu 'bpamelapay a lat a nanam'engka.

19 “Hu Kadenan a Mapulu, pakikineg kami enggu ampun kami nengka! Na edtabangi kami sa mangagan ka enggu mapugi su ingala nengka kagina su siudad'engka enggu su manga taw nengka i 'bpananggit kanu ingala nengka.”

Su Maena nu manga Naalung

20 Sia kanu kapedtalus ku 'bpangeni-ngeni enggu kabpangumpaya ku kanu kabaladusan ku enggu kanu kabaladusan nu pagidsan ku a manga taw a Israil, na 'bpangenin ku sa senep sa atay kanu Kadenan a Mapulu a Kadenan ku i patindegen nin 'bpaluman su Awrusalim a su suti a siudad'in. 21 Na kanu entu a kabpangeni-ngeni ku na mibpayag sa laki su malaikat a su Giabrail a mibpayag bun sa laki kanu paganay. Sakelap bu i kinauma nin sa laki kanu kutika a kapegkurban kanu edsukilep. 22 Inimbitiala aku nin sa nia nin pidtalu na “Danyil, mibpayag aku sa leka saguna ka enggu ku seka kaenggan sa ilemu enggu katuntay. 23 Na kanu kinaludsu nengka pan mangeni-ngeni na sinawal ka den nu Kadenan, aden den kasuguan nin pantag kanu pangeni-ngeni nengka, tembu sinemia aku ka enggu ku madtalu sa leka kagina pinadtaya ka man. Na pakikineg ka sa mapia ka enggu nengka 'gkasabutan sa mapia su maena nu naalung a entu.

24 “Pat gatus enggu siyaw pulu lagun i initandu nu Kadenan sa kanggula nin kanu kahanda nin kanu suti a siudad'engka enggu kanu pagidsan nengka a manga taw a Israil. Na pupusen nin den su kapedsungkang'ilan enggu kapembaladusa nilan taman sa ampunen nin den su manga kabaladusan nilan. Na su katidtu den nu Kadenan a Mapulu i endatu taman sa taman, su naalung'u manga nabi na matuman den enggu sutin den 'bpaluman su Suti sa Langun a 'Bpangadapan kanu Kadenan.

25 “Dait a katawan nengka enggu kasabutan nengka i patpulu enggu siyaw lagun pan i maipus iganat sa timpu a isugu su kapatindeg 'bpaluman kanu Awrusalim taman kanu kauma nu pinamili a 'gkaunutan. Na makapatindeg 'bpaluman su Awrusalim a aden manga lalan nin a mangaulad enggu aden manga kuta nin. Na mapalalayun su entu kanu dalem'u pat gatus enggu telupulu enggu pat lagun ugaid'a timpu na guligaw. 26 Na kanu kaipus'u pat gatus enggu telupulu enggu pat lagun na imatayan su pinamili a entu nu Kadenan a Mapulu sa dala den nasama sa lekanin a apia ngin. Na maipus su entu na makatingguma su manga sundalu nu mabagel a 'gkaunutan ka geban nilan den su siudad enggu su Suti a 'Bpagagaman. Na su kapupusan na makatingguma a mana degan. Na maaden su kambubunua enggu kabinasan taman sa kapupusan nu entu a initandu bun nu Kadenan a manggula. 27 Na su 'gkaunutan a entu na mumbal sa mabagel a kapasadan kanu manga taw, enggulan nin i entu kanu dalem'u pitu lagun. Ugaid'a amaika kalukan den su pitu lagun na patelenan nin su kagkurban enggu ibetad'in kanu Suti a 'Bpagagaman su manga makangingili a makagiabu a punan a katagak lun. Na mapalalayun su entu taman kanu inadil'u Kadenan a kapupusan nu taw a minetad kanu pakangingili a entu a mana bun su pidtalu nin.”