Su Naalung'u Danyil pantag kanu Bili-bili enggu Kambing
8
Na kanu ikatelu lagun nu kapendatu nu Sultan Bilsasar na aden menem naalung ku. 2 Na sia kanu naalung ku na nailay ku i lu aku pedtindeg kanu adteban nu lawas'a ig'u Ulay lu kanu naalad a siudad a Susa a sakup'u prubinsia a Ilam. 3 Na aden nailay ku a tudu a bili-bili a pedtindeg lu kanu adteban nu lawas'a ig. Aden dua timan a malendu a sidung'in ugaid'a su nauli a minetu na nia malendu kumin kanu nauna. 4 Nailay ku bun a ibpanidung'in su entu sa apia endaw a dalepa magidsan pan sa ilud, laya atawa ka sedepan. Na dala binatang a pakagaga kanu bagel'in enggu dala bun pakaubay sa lekanin a makadtabang kanu 'bpamungkaidanan nin. Na pinggula nin su endaw i pakasuat sa lekanin taman sa migkabagel a benal sekanin.5 Na gagalu nu kapedtulik ku lun na natekaw demun nakauma su mandangan a kambing a nakabpun sa sedepan. Na linibet'in su dunia a timbang a dili pakadada su ay nin sa kalangkas'in. Su nia a kambing na aden masela a sidung'in sia kanu pageletan nu manga mata nin a dikena 'gkadsalilidan. 6 Na 'bpelagayan nin pedsidung su bili-bili a nailay ku a aden dua timan a sidung'in a pedtindeg lu kanu adteban nu lawas'a ig sa endaw taman i bagel'in. 7 Na sabap sa 'gkalipunget a benal na dala nin teleni manidung su entu taman sa natebped su dua timan a sidung'u bili-bili. Di den pakaatu su bili-bili taman sa naudtang tembu dinakudak'u kambing. Dala isa bu a pakagaga pedtabang kanu bili-bili. 8 Na daka makin nangiseg su kabagel'u entu a mandangan a kambing. Na guna su 'bpanasangan den a benal su kabagel'in na natebped su sidung'in. Na nia nakasambi sa entu na pat timan a minetu a masela a sidung a nakatendu kanu pat a pisuk'u dunia.
9 Na isa kanu manga sidung a entu na inetuan pamun na manaut a sidung. Na nabaluy a mabagel su entu a sidung magidsan i sia sa laya enggu sebangan enggu kanu mangapia a kalupan nu Israil. 10 Na makin pan nangiseg su kalambeg'in su entu taman sa nakasugku kanu langit, na inipangidtug'in sia sa lupa su ped kanu manga pinangaden sa langit enggu su manga bitun taman sa dinakudak'in su entu. 11 Initimbang'in i ginawa nin sa sekanin i mabagel kumin kanu mapulu nu langun na pinangaden kanu langit. Pinatelenan nin su uman gay a kapegkurban kanu Suti a 'Bpagagaman enggu inilusak'in su entu. 12 Na sa kanu entu ba a pinggula nin, na nasakup'in su langun nu pinangaden sa langita enggu su uman-uman gay a kapegkurban. Dala pinatagan nin kanu bantang enggu mimbantas sekanin kanu manga pinggula nin.
13 Daka nakakineg aku sa pembitiala a dua kataw a malaikat. Su sakataw a malaikat na nia nin ibpagidsa na “Taman sa kanu guna i kauget'u 'gkanganggula kanu nia ba a naalung a mana su kinapatelen kanu uman-uman gay a kapegkurban enggu su kinanggiabu kanu Suti a 'Bpagagaman a punan a kinatagak lun enggu su kinapalusak kanu langun nu pinangaden kanu langit?” 14 Na nia inisumpat'u sakataw a malaikat na “Dua ngibu enggu telu gatus a mapita enggu edsukilep. Na amaika maipus su entu na imbalingan den sa andang su kambebetad'u Suti a 'Bpagagaman.”
Su Maena nu Naalung'u Danyil
15 Na gagalu nu kinaalung ku kanu entu na 'bpagitungen ku u ngin i maena nu entu. Na nakatekaw demun edtindeg kanu kasangulan ku i mana buntal'a manusia. 16 Na daka aden nakineg ku a suala na manusia a lu nakabpun kanu lawas'a ig'u Ulay sa nia nin pedtalun na “Giabrail, edsinantal ka sa lekanin su maena nu naalung'in.”
17 Na guna su maitu na inubay aku nu Giabrail, na nakasugiud aku sa gilek. Na nia nin pidtalu sa laki na “Seka a manusia, na tuntayi ka sa mapia su naalung'engka, na su nia a naalung'engka na makapantag kanu manga mauli den a gay.” 18 Na gagalu nu kapembitiala nin sa laki na linipedengan aku a nakadtalegkeb kanu lupa. Ugaid'a kinawa aku nin ka pinatindeg aku nin. 19 Nia nin pidtalu sa laki na “Edtalun ku sa leka u ngin i manganggula amaika ipagedam den nu Kadenan su lipunget'in, ka makapantag i nia kanu kutika a inadil'u Kadenan a manganggula kanu mangauli den a gay. 20 Su bili-bili a dua timan i sidung'in na entu ba su pendatuan nu Midia enggu Pirsia. 21 Na su kambing menem, na entu ba su pendatuan nu dalepa a Greece enggu su masela a sidung a minetu lu kanu pageletan nu manga mata nin na entu ba su mauna a datu. 22 Su sidung menem a entu a pat timan a minetu ulian nu kinatebped'u nauna a sidung na entu ba su pat timan a pendatuan nu dalepa a Greece ulian nu kinambad-bad'in ugaid'a su bagel'u manga datu kanu entu a manga pendatuan na dikena mana su kabagel'u nauna a datu.
23 “Na kanu mangauli den a gay nu kapendatu nilan, kanu kinadtaman den nu kawag'a galebek'ilan na endatu su sangat i kasalimbut'in enggu kapasang'a ukit'in a datu. 24 Na mabaluy sekanin a mabagel a benal a datu ugaid'a dikena sia makanggulalan kanu lekanin demun a bagel. Na sangat a ikagilek'u taw su kapaminasakan nin enggu embantas sekanin kanu langun nu penggulan nin. Binasan nin su manga taw a aden bagel'in enggu su manga taw nu Kadenan. 25 Sabap kanu kapegkagaga nin na pembantas sekanin kanu manga kapedtalimbut'in. Sangat a ibpemamasela nin i ginawa nin. Madakel a taw i pedtekawan nin demun 'bpagimatay enggu 'bpagatuan nin pan su mapulu nu manga mapulu. Ugaid'a ilusak sekanin a dikena sia kanu kapegkagaga nu taw ka sia kanu kapegkagaga nu Kadenan. 26 Su naalung'engka a su kinapatelen kanu kapegkurban kanu mapita enggu edsukilep na benal su entu. Ugaid'a di ka pan ipebpayag su entu ka mauget pan mambu manggula.”
27 Na guna maipus su entu, na saki si Danyil, na nalubayan aku taman sa nakadalu sa nakapila gay. Na guna su migkapia aku na mimbalingan aku kanu galebekan a inenggay sa laki nu sultan. Ugaid'a nakabulibug bun sa laki su manga naalung ku a entu kagina dala ku pamun katuntayi sa mapia su entu.