Su Kinaalung'u Danyil kanu Pat Balang a Binatang
7
Kanu muna-muna a lagun sa kanu kapendatu nu Sultan Bilsasar sa Babilunia na aden naalung'i Danyil sa ukit'a taginepen. Na inisulat'in su dalem'u taginepen nin a entu a 2 “Aden isa a magabi na aden naalung ku sia kanu taginepen ku a maulad a lagat a 'gkasugat'a mabandes a sambel a pakabpun kanu pat a pisuk'u dunia. 3 Na nailay ku su pat timan a embibidaya a makasabalang a binatang a mimbuat lu kanu lagat.4 “Na su ika-isa a makasabalang a binatang na mana palas'a alimaw a aden papak'in a mana papak'a lumalagit. Na gagalu nu kapedtulik ku lun na nailay ku demun i kinapadtud'u papak'in enggu pinadtindeg sekanin kanu kamuli-muli a ay nin a mana taw enggu inenggan bun sekanin sa pamikilan a mana pamikilan na taw. 5 Su ikadua menem a makasabalang a binatang a mimbuat na mana masela a asu.a Na inikayang'in su sabala a ay nin enggu su ngali nin na minebut sa telu timan a gusuk. Na aden suala a pedtalu sa lekanin sa ‘Edtindeg ka, ka edtantu ka embusaw sa sapu.’ 6 Na su ikatelu menem a makasabalang a binatang a mimbuat na mana palas'a masela a tinggalung.b Na aden pat timan a papak'in a mana papak'a papanuk sia kanu taligkudan nin enggu aden pat timan a ulu nin. Na inenggan su entu sa kapegkagaga sa kakamal. 7 Na su ikapat a naalung ku a makasabalang a binatang kanu entu ba a magabi na makagilek a benal i palas'in enggu sangat i kabagel'in. Su manga ngipen nin na mangasela a putaw a ipedtalakisi nin pembusaw kanu langun nu 'gkasampenan nin. Na amaika aden pamun 'gkasama lun na pendakudaken nin. Sakabias sekanin kanu nangauna a entu a telu timan a binatang enggu aden sapulu timan a sidung'in.
8 “Na gagalu nu kapedtulik ku kanu manga sidung'in na aden nailay ku a minetu a manaut a sidung, daka napadtud su telu timan a sidung'in. Na aden manga mata nu sidung a entu a mana mata na taw enggu aden bun ngali nin a pedtalu-talu sa kamamasela.
9 “Na daka aden menem nailay ku a inipametad a manga kulesi. Na su kaisa-isa nin a iganat sa ganatan a dala kapupusan nin na minayan lu kanu kulesi nin. Na su balegkas'in enggu buk'in na mana gapas i kaputi nin. 'Bpangalaw-kalaw su kulesi nin enggu su manga tilikan nu entu na 'bpangalaw-kalaw bun. 10 Na iganat sa lekanin na pedtuga su apuy. Ngibu-ngibuan su gumagalebek lun enggu pedtiakap sa lekanin. Na 'bpeludsu den su kabpangukum tembu binukatan den su manga libelu.
11 “Na pedtulikan ku bun su sidung a entu sabap kanu 'gkakineg ku a kabpemamasela nin, taman sa nailay ku i inimatayan su ikapat a entu a makasabalang a binatang, inidtug lu kanu apuy su lawas'in taman sa natutung. 12 Na su nangasama a telu timan a makasabalang a binatang na inawan sa kapegkagaga ugaid'a pinapaguyag-uyag pamun sa dikena bun gaid nauget.
13 “Na daka aden menem naalung ku a pakatingguma a makalagid sa taw a lu nakasaleta kanu manga gabun sa kawang-kawangan.c Minubay sekanin kanu kaisa-isa nin a iganat sa ganatan a dala kapupusan nin ka iniadap sekanin lu sa lekanin. 14 Binadtug sekanin enggu inenggan sa kapegkagaga sa kandatu ka enggu sekanin masimba nu langun nu taw a ebpun kanu langun nu bangsa, tribu enggu basa. Su kapendatu nin na dala kapegkapupus'in, dili maawa i entu sa lekanin enggu dala makapalusak lun.
Su manga Maena nu Naalung'u Danyil
15 “Na nakabulibug enggu nakalingasa kanu ginawa ku su naalung ku a entu. 16 Tembu sinemupeg aku kanu isa kanu 'bpamedtindeg lu ka inidsa ku lun u ngin i maena nu langun nu entu. Daka nia nin pidtalu na ipayag'in sa laki su langun nu maena nu entu. 17 Na nia nin pidtalu na ‘Su pat timan a entu a makasabalang a binatang na nia nin maena na embuat su pat kataw a endatu kanu dunia. 18 Ugaid'a su manga taw nu Kadenan a Mapulu sa Langun na silan i kaenggan kanu kapegkagaga sa kandatu taman sa taman.’
19 “Na 'gkalinian ku bun i katawan ku su makapantag kanu ikapat a makasabalang a binatang a sakabias a benal kanu telu timan a entu a makasabalang a binatang, ka pakagilek a benal a 'bpagilayn enggu su manga ngipen nin na putaw taman sa su manga kanuku nin na galang. Pedtalakisin nin su apia entain i 'gkasampenan nin enggu pendakudaken nin su 'gkasama lun. 20 Na inidsa ku bun sa lekanin su maena nu sawati a entu a sidung'u ikapat a makasabalang a binatang enggu su satiman a entu a sidung a minetu a sabapan a kinadala nu telu timan a sidung. Na su sidung a entu a aden mata nin enggu ngali nin a pedtalu sa kabpemamasela na nia ku kailay lun na mana nia labi a pakagaga kumin kanu manga ped a entu a sidung. 21 Na nailay ku su sidung a entu a pembunua kanu manga taw nu Kadenan taman sa pedtabanan nin silan 22 gagalu na di pan pakauma su kaisa-isa nin a iganat sa ganatan a dala kapupusan nin ka ipaninindeg'in su manga taw nin sa ukit'a kakukum'in. Na nakauma den su timpu a endatu den su manga taw nin.
23 “Na nia nin pidtalu sa laki na ‘Su ikapat a makasabalang a binatang na su ikapat a pendatuan kanu lusud'u dunia a sakalebu kanu ped a pendatuan, ilusak'in su pat a pisuk'u dunia enggu dakudaken nin su entu. 24 Na su sawati menem a manga sidung, na entu ba su sapulu kataw a embuat a manga datu a endatu. Na amaika maipus su entu, na embuat menem i sakataw a datu a sakalebu a benal kanilan. Na ilusak'in su telu kataw a entu a manga datu. 25 Na edtalu-talu su entu sa sungkang kanu Kadenan a Mapulu sa Langun enggu pamungkaidan nin su manga taw nu Kadenan. Pagapasen nin i kasalin nin kanu manga ipedsela-sela a manga gay enggu su kasuguan. Na sugutan sa masakup'in su manga taw nu Kadenan kanu dalem'u telu lagun enggu tenga. 26 Ugaid'a kukumen den sekanin, kuan sa lekanin su kapegkagaga enggu binasan su pendatuan nin sa tidtu-tidtu. 27 Entu pan ka inggay kanu manga taw nu Kadenan a Mapulu sa Langun su kapangulu enggu su kapegkagaga kanu manga pendatuan kanu lusud'u dunia. Na endatu silan taman sa taman enggu su langun nu pendatuan na mapasakup kanilan.’
28 “Na entu ba su manga naalung ku. Na saki si Danyil a sangat a nabulibug i ginawa nin kanu entu taman sa migkakapansi aku na gilek ugaid'a dala ku i nia edtalu-talua kanu apia entain.”