Su Kapapegkan kani Danyil kanu Alimaw
6
Na napagitung'u Sultan Darius i mamili sekanin sa magatus enggu duapulu kataw a makakamal kanu lusud'u pendatuan nin. 2 Na namili bun sekanin sa telu kataw a makapangulu kanu magatus enggu duapulu a entu a makakamal ka enggu 'gkatabangan pedtiakap sa ikagkapia nu datu. Na isa si Danyil kanu telu kataw a entu a napamili. 3 Na kanu langun nilan a entu na si Danyil i nailayan sa dala gaid pagidsan nin sa kapegkagaga tembu napagitung'u sultan i baluyn nin si Danyil a 'gkakataw kanu lusud'u pendatuan nin. 4 Na sabap sa entu, na su tagapeda nin sa kapegkamal na pinangilayan nilan sa kalimbanan su kapegkamal'i Danyil ka enggu nilan katunan sa makatila nilan lun ugaid'a dala 'gkatun nilan lun, kagina matidtu enggu matulanged sekanin ka penggalebeken nin su inisangan sa lekanin a galebekan. 5 Daka nia nilan nadtalu na “Dala matun tanu a makatila sa lekanin nia tabia na mangilay tanu sa ukit a aden lakit lambay nin kanu kasuguan nu Kadenan nin.”6 Na guna su maitu na linemu silan kanu sultan ka sinalam'ilan sa “Hu sultan, palihalan ka! 7 Na langun nami a pegkakataw kanu pendatuan apeg'u manga gubilnadul, 'gkangasaligan, 'bpamangukum enggu su ped pan a 'bpananggit kanu dalepa na namagayun kami sa kapangeni nami sa leka sa kaumbal'engka sa kasuguan. Na nia dalem'u entu a kasuguan na kanu dalem'u telupulu gay na dala mangeni-ngeni kanu kadenan nu uman i isa atawa ka apia entain a taw ka nia nilan bu pangadapan na seka. Na apia entain i dili enggulalan sa entu na idtug kanu lingkab a inumbal a 'bpelugenan kanu manga alimaw. 8 Tembu paumbal ka den, Hu sultan, sa kasuguan a maitu ba i dalem'in enggu tiapi ka kanu ngala nengka ka enggu di den madsalin-salin su entu sia luyud kanu atulan nu pendatuan sa lusud'a Midia enggu Pirsia.” 9 Na minayun mambu su Sultan Darius taman sa tiniapan nin kanu ngala nin su entu a kasuguan.
10 Na apia natawan den ni Danyil i natiapan den su entu a kasuguan na minuli bun sekanin ka linemudep kanu bilik'in a aden paliungan nin a nabukatan a lu nakasangul sa Awrusalim ka midtinggaleb lu ba a nangeni-ngeni enggu midsukul-sukul kanu Kadenan. Na pinggula nin i entu sa makatelu kanu uman-uman gay a mana bun su katatapan a penggulan nin. 11 Na saleta mambu na su 'gkangasaligan a entu a dili 'gkalilini sa lekanin na pinaninilung'ilan sekanin. Daka nailay nilan a 'bpangeni-ngeni sekanin enggu pebpugi kanu Kadenan. 12 Tembu linemu kanu sultan su 'gkangasaligan ka pidtalu nilan lun su kinasungkang'i Danyil sa nia nilan pidtalu na “Hu sultan, dikena ba minumbal ka sa kasuguan a tiniapan nengka kanu ngala nengka a sa dalem'u telupulu gay na dala mangeni-ngeni kanu kadenan nu uman i isa atawa ka apia entain a taw ka nia nilan bu pangadapan na seka? Na apia entain i dili enggulalan lun na idtug lu kanu lingkab a inumbal a lugenan nu manga alimaw?” Na nia mambu inisumpat'u sultan na “Uway, benal su entu enggu dili den i entu madsalin-salin sia luyud kanu atulan nu pendatuan sa lusud'a Midia enggu Pirsia.” 13 Na nia nilan inisumpat kanu sultan na “Si Danyil a isa kanu nangasigkem a ebpun sa dalepa a Yahuda na dili 'bpaginugut kanu kasuguan nengka ka 'bpangeni-ngeni bun sekanin kanu Kadenan nin sa makatelu kanu uman-uman gay.”
14 Na guna makineg'u sultan su entu na sangat a nabulibug i itungan nin. Ka pegkiugan nin pedtabang si Danyil tembu kanu dalem'u nagagabian na 'bpagitung bu sekanin u panun i katun nin sa ukit'a kalipuas'in kani Danyil. 15 Na saleta mambu na linemu menem 'bpaluman su 'gkangasaligan kanu sultan ka nia nilan lun pidtalu na “Hu sultan, natuntayan nengka a benal i sia luyud kanu atulan nu dalepa a Midia enggu Pirsia na amaika su sultan ka minumbal sa kasuguan na dili den i entu madsalin-salin.”
16 Na guna su maitu na inisugu nu sultan i sigkemen si Danyil ka idtug lu kanu lugenan nu manga alimaw. Na nia pidtalu nu sultan kani Danyil na “Pangeni-ngenin ku i ilipuas ka nu Kadenan a pedsimban nengka sa senep sa atay.” 17 Daka sinapengan sa masela a watu su entu a tiniapan kanu ngala nu sultan enggu kanu 'gkangasaligan nin ka enggu dala mukat lun. 18 Na minuli su sultan lu kanu tulugan nin ugaid'a dala sekanin kan enggu dala sekanin pangeni sa makapanggalaw-galaw lun taman sa dala sekanin makatulug.
19 Na guna su pegkatibuas den na pinamagayasan 'bpawang'u sultan su lugenan nu manga alimaw. 20 Na endaw i kinauma nin lu na nalidu a benal i ginawa nin enggu tinawag'in si Danyil sa nia nin pidtalu na “Danyil a panunugun nu tidtu a Kadenan, ngintu, inilipuas ka nu Kadenan a pedsimban nengka sa senep sa atay kanu nan a manga alimaw?” 21 Na sinemawal mambu si Danyil sa “Hu sultan, palihalan ka! 22 Dala aku kagkaidi nu manga alimaw kagina napatingguma sa malaikat'in su Kadenan ka enggu nin matikup su ngali nu manga alimaw. Na pinggula nu Kadenan su nia ka 'gkatawan nin i matidtu i kabpaguyag-uyag ku enggu dala pinggula ku sa leka a mawag.” 23 Na guna makineg'u sultan su entu na napia a benal i ginawa nin taman sa inisugu nin i kuan si Danyil lu kanu lugenan nu manga alimaw. Na guna sekanin makua na dala demun mailay kanu lawas'in a apia mana bu kalis kagina sinemalig sekanin kanu Kadenan nin.
24 Na inisugu nu sultan i langun nu sinemendit kani Danyil na sigkemen ka idtug lu kanu lugenan nu manga alimaw apeg'u manga wata nilan enggu manga kaluma nilan. Saleta na dala pamun silan makatana kanu kinaidtug kanilan lu kanu lugenan nu manga alimaw na sinakab den silan nu manga alimaw, pinggagansingan nilan taman sa nadsalupet su manga tulan nilan.
25 Na guna maipus su entu na sinemulat su Sultan Darius sa kanu langun nu bangsa, tribu enggu basa sa lusud'a dunia sa nia nin inisulat na “San sa lekanu su kalilintad enggu su mapia a kambebetad. 26 Ipedsugu ku kanu langun nu taw a nasakupan nu pendatuan ku i ikagilek'u enggu pagadati nu su Kadenan ni Danyil. Kagina tidtu sekanin a Kadenan enggu bibiag sekanin taman sa taman. Su kapendatu nin na dala kapegkapupus'in enggu dala makapalusak lun. 27 'Bpamelipuas sekanin enggu pedtabang. Penggula man sekanin sa kangagaipan enggu manga tanda sia sa dunia enggu lu sa sulega ka inilipuas'in man si Danyil kanu manga alimaw.”
28 Na migkapulu su galebekan ni Danyil kanu timpu a kinandatu nu Sultan Darius enggu kanu timpu a kinandatu nu Sultan Sirus a taw sa Pirsia.