Su Kinadsela-sela nu Sultan Bilsasar
5
Na kanu timpu a su Sultan Bilsasar den i pendatu kanu lusud'u Babilunia na midsela-sela sekanin a kaped'in su sangibu kataw a 'gkangasaligan nin. Na mininem sekanin sa alak a ig'a ubas a kaped'in silan. 2-3 Na gagalu nu kabpaginem'in na inisugu nin i kuan su manga basu a bulawan enggu pilak a kinua nu ama nin a su Sultan Nibukadnisar kanu Suti a 'Bpagagaman a walay a pedsimban kanu Kadenan lu kanu dalepa a Awrusalim ka enggu nin makapausal kanu 'gkangasaligan nin, kanu manga kaluma nin, enggu kanu manga pegkakaluman nin a ulipen. Na guna mapananggit lu su entu a manga basu na inusal'ilan kanu kabpaginem'ilan. 4 Na gagalu nu kabpaginem'ilan sa alak a ig'a ubas na pebpugin nilan su manga pegkakadenanen nilan a pinangumbal a ebpun sa bulawan, pilak, galang, putaw, kayu enggu watu.5 Na da ka pan ba, ka aden nailay nilan a lima a pedsulat lu kanu lending'u tulugan a masiken kanu palitan. Na nailay demun nu sultan su kapedsulat'u entu a lima 6 tembu sangat a nagilekan sekanin taman sa migkakapansi sekanin na gilek a pegkegkel su aleb'in enggu naawan na bagel su ay nin a sabapan na di nin kapegkadtindeg. 7 Na nakalalis'in i tawagen su 'bpamangingilayan, aden kangategelan nin enggu su manga pabibitun kanu lusud'u Babilunia. Ka nia nin pidtalu kanilan na “Apia entain i makabatia sa kanu nan a nakasulat enggu kapatuntayan nin sa laki i maena nin, na sanganan ku sa lambung'u datu, embaligan ku sa bulawan enggu baluyn ku a ikatelu a mapulu sa langun kanu lusud'u pendatuan ku.”
8 Na guna su nakalu den su aden kangategelan nin na dala isa kanilan i nakagaga lun matia enggu nakagaga lun enggumaena. 9 Tembu makin nangilut su kapegkagilek'u sultan enggu su kinagkapansi nin taman sa su 'gkangasaligan nin na nangabulibug i itungan nilan.
10 Na guna makineg'u putelia su kapegkabusiug'ilan na linemudep kanu pegkanan nilan ka nia nin pidtalu na “Hu sultan, palihalan ka! Da ka 'gkagilek enggu da ka 'bpangandam 11 ka aden isa a taw sia kanu pendatuan nengka a lu sa lekanin su ngiawa nu suti a manga kadenan. Na kanu timpu nu kapendatu nu ama nengka a si Sultan Nibukadnisar na su nia a mama na nailayan den sa kategelan sa katuntay enggu kapegkagaga a mana bun su manga kadenan. Na su ama nengka a su sultan na binaluy nin sekanin a mapulu sa langun nu manga mategel sa kangagaipan, 'bpamangingilayan, aden kangategelan nin enggu pabibitun kanu lusud'u Babilunia. 12 Na su entu a mama na si Danyil a binedtuan nu sultan sa Biltasar. Na nailay sa lekanin su dala gaid pagidsan nin a kapegkagaga enggu kapegkatuntay. Pakagaga bun sekanin pedtargium sa manga taginepen, pakapayag'in su apia ngin a nakapagena a maena enggu 'gkagaga nin 'bpangilay sa ukit su manga mapasang a kamutuan. Na ipatawag'u si Danyil ka enggu nin makapayag su maena nu nan a nakasulat.”
Su Kinatargium kanu Nakasulat kanu Lending
13 Daka iniadap den si Danyil kanu sultan. Na nia pidtalu nu sultan sa lekanin na “Seka besen si Danyil a isa kanu manga nasigkem a ebpun sa dalepa a Yahuda a init'u ama ku sia. 14 Na nakineg ku i san kun sa leka su ngiawa nu manga kadenan enggu aden sa leka su da gaid pagidsan nin a kapegkagaga enggu katuntay. 15 Na inipatawag ku su aden kangategelan nin enggu su 'bpamangingilayan ka inipabatia ku kanilan su nakasulat a nan kanu lending ka enggu nilan 'gkanggumaenan sa laki ugaid'a dala nilan magaga. 16 Na aden nakadtalu sa laki sa pakagaga ka kun penggumaena enggu 'bpangilay sa ukit kanu mapasang a kamutuan. Na amaika magaga nengka matia su manga kadtalu a nan enggu kanggumaenan nengka sa laki na sanganan ku seka sa lambung'a datu enggu pambaligen ku seka sa bulawan enggu baluyn ku seka a ikatelu a mapulu sa langun kanu lusud'u pendatuan ku.”
17 Na nia inisumpat'i Danyil kanu sultan na “Di aku den 'bpangenggi sa balas, lu nengka den inggay kanu ped. Ugaid'a batian ku bun sa leka enggu edtalun ku sa leka su maena nu nakasulat a nan. 18 Hu sultan, su Kadenan a Mapulu sa Langun i minaluy kanu ama nengka a si Nibukadnisar sa sultan enggu inenggan nin sa kabagel, kabadtugan enggu kapegkagaga. 19 Na sabap kanu bagel a inenggay nin sa lekanin na su langun nu taw kanu embala-bala kanu uman i bangsa, tribu enggu basa na naadenan na gilek sa lekanin. 'Gkagaga nin 'bpagimatay su apia entain i pegkiugan nin 'bpagimatay enggu 'gkagaga nin bun sa dili matay su apia entain i dili nin pegkiugan a matay. Ipebpulu nin su apia entain i pegkiugan nin pebpulu enggu ibaba nin su apia entain i pegkiugan nin pembaba. 20 Ugaid'a guna su nia den nakadalem kanu atay nin i kamamasela na iniawa nu Kadenan a Mapulu su kadatu nin enggu su kabadtugan nin. 21 Initangka sekanin kanu manga taw. Nakailing sekanin sa itungan na binatang. Na naguyag-uyag sekanin a kaped'u manga talaw a kimar enggu nia nin nakan na manga utan a mana bun su pegken nu sapi. Lalayun 'gkalumes-lumes'a namug su lawas'in. Na maitu ba i natamanan nin taman a da nin kilala su Kadenan a Mapulu sa Langun sa sekanin i pegkakataw kanu manga pendatuan sa dunia enggu 'bpamili sa u entain i pegkiugan nin lun papendatu.
22 “Ugaid'a seka Sultan Bilsasar a wata nin na apia natawan nengka bun su langun nu entu na da nengka bun ibaba i ginawa nengka kanu Kadenan. 23 Ka inipulu nengka bun i ginawa nengka sa lawan pan i kapulu nin kanu pendatu kanu sulega. Inipakua nengka su manga basu a ebpun kanu walay a pedsimban kanu Kadenan ka inipausal'engka kanu 'gkangaunutan nengka enggu kanu manga kaluma nengka taman den kanu manga pegkakaluman nengka a manga ulipen. Na pebpugin nu su manga pegkakadenanen nu a pinangumbal bu a ebpun sa bulawan, pilak, galang, putaw, kayu enggu watu. Na su entu a manga pegkakadenanen na dikena pamakailay, dikena pamakakineg enggu dikena pamakasabut. Dikena nia nengka pinugi su Kadenan a kigkuan kanu uyag-uyag'engka enggu pegkakataw kanu manganggula nengka. 24 Tembu sinugu nin su entu a lima sa kasulat'in kanu nan a manga kadtalu: 25 ‘Mini, Mini, Tikil, Parsin.’
26 Na nia maena nu kadtalu a Mini na nabilang den nu Kadenan su manga gay a nasama kanu kapendatu nengka ka tebpeden nin den su entu.
27 Na nia menem maena nu Tikil na napagugat-ugat ka den nu Kadenan, na naamad'in i migkulang ka.
28 Na su Parsin menem na nia nin maena na su pendatuan nengka na mabad. Su sabad na makaenggay kanu dalepa a Midia enggu su sabad menem na makaenggay kanu dalepa a Pirsia.”
29 Guna su maitu na inisugu nu Sultan Bilsasar sa sanganan si Danyil sa lambung'u datu enggu embaligan sa bulawan. Na pinasabutan nin i si Danyil den i ikatelu a mapulu sa langun kanu lusud'u pendatuan nin.