Su Ikadua a Taginepen nu Sultan Nibukadnisar
4
Na napapait sa katigan su Sultan Nibukadnisar sa nia nin pidtalu na “Sa kanu langun na manga bangsa, manga tribu enggu basa kanu lusud'u dunia na san sa lekanu su kalilintad enggu mapia a kambebetad. 2 Papedsabutan ku sa lekanu su kangagaipan a manga tanda a pinggula sa laki nu Kadenan a Mapulu sa Langun. 3 Saben-sabenal a makagaip enggu makasabalang su kabarakatan a ipebpagilay nu Kadenan. Su pendatuan nin na dala kapupusan nin enggu su kapendatu nin na dala taman nin.4 “Saki si Nibukadnisar, na kanu timpu a mapia i 'gkambebetad ku enggu mapia i kapegkakaleben ku sia kanu tulugan, 5 na aden isa a magabi a midtaginep aku a nakagilek sa laki, na sangat a nakalingasa kanu ginawa ku su entu. 6 Tembu inipatawag ku su langun nu aden kategelan nin sia kanu lusud'u Babilunia ka enggu nilan kapatuntayan sa laki su maena nu entu. 7 Na nakauma su langun nu manga mategel sa kangagaipan, 'bpamangingilayan, aden kangategelan nin apeg'u pabibitun ka enggu nilan matargium su taginepen ku ugaid'a dala nakagaga kanilan temargium kanu entu.
8 “Na dala matana-tana na nangadap sa laki si Danyil a binedtuan sa Biltasar a inisangay kanu kadenan ku enggu lu sa lekanin su ngiawa nu suti a manga kadenan. Na pinanudtul ku sa lekanin su taginepen ku. 9 Na nia ku pidtalu sa lekanin na ‘Biltasar a mapulu nu mategel sa kangagaipan, katawan ku i su ngiawa nu suti a manga kadenan na san sa leka. Na malemu nengka 'gkatuntayan su maena nu manga kagaipan a 'gkanggula. Na targium ka sa laki su taginepen ku a nia. 10 Na nia ku ba a entu nadtaginep kanu kapedtulug ku kanu 'bpagigan ku na nakailay aku sa malambeg gaid a kayu lu kanu luk'u dunia. 11 Na migkasela a benal su entu taman sa migkalambeg a benal sa sama bu di pakasugkul sa langit tembu 'gkasandeng su entu kanu lusud'u dunia. 12 Malabung a benal i kinanggulaun nin enggu madakel i kinaunga nin a mapakay a makan nu langun nu taw. Su atag'in na pedsilungan nu manga talaw a binatang enggu su manga sapak'in na pedsalagan nu manga papanuk. Na lu ba pegkua sa pegken nin su langun nu pinangaden. 13 Na nailay ku bun kanu taginepen ku su suti a malaikat a mimbaba ebpun sa sulega 14 a nia nin ibpananawag na “Tibpad'u su kayu a nan enggu panebped'u i manga sapak'in. Awai nu sa laun enggu ipangidtug'u i manga unga nin. Paawa nu bun su manga binatang a pedsilung lun enggu ukag'u su manga papanuk a pedsalag lun. 15 Ugaid'a padtaday nu demun su tud'in enggu su manga dalig'in lu kanu malinawag a iketan sa putaw enggu galang a nabalibet'a manga utan.
“ ‘ “Su taw a 'gkasugat'u entu a upaman a kayu na tatap malumes-lumes'a namug enggu nia nin makan na manga utan a kaped'u manga binatang. 16 Na kanu dalem'u pitu lagun na masalin i itungan nin sa mana itungan na binatang.
17 “ ‘ “Na entu ba i nakasugat sa lekanin a kukuman a inisampay nu manga suti a malaikat ka enggu 'gkatawan nu langun nu taw i su Kadenan a Mapulu sa Langun i pegkakataw kanu langun nu pendatuan nu manusia. Na sekanin i 'bpamili u entain i ipembetad'in enggu mapakay a ipasakup'in kanu apia entain a kalinian nin apia pan kanu mababa den sa langun i 'gkambebetad'in a taw.”
18 “ ‘Na nia ba i taginepen ku, Biltasar. Edtalu ka sa laki su maena nin kagina apia entain a aden kategelan nin kanu lusud'u pendatuan ku na dala nakagaga lun edtalu sa laki i maena nin. Ugaid'a seka na magaga nengka temargium sa laki kagina san sa leka su ngiawa nu suti a manga kadenan.’
19 “Guna makineg'i Danyil a bedtuan bun sa Biltasar su entu na sangat a nabulibug sekanin enggu nagilekan. Tembu nia pidtalu nu sultan sa lekanin na ‘Biltasar, di ka pembulibuga i ginawa nengka kanu nan a taginepen ku enggu kanu maena nin.’ Na nia inisumpat'i Biltasar na ‘Hu sultan, adidi bu i su nan a taginepen nengka enggu su maena nin na lu manggula kanu manga kuntela nengka, dikena san sa leka. 20 Na su kayu a entu a pidtaginep'engka a migkasela enggu migkalambeg sa sama bu dala makasugkul sa langit a 'gkasandeng kanu lusud'u dunia, 21 a malabung i kinanggulaun nin, madakel i kinaunga nin a mapakay a makan nu langun nu pinangaden, pedsilungan nu manga talaw a binatang su atag'in enggu pedsalagan nu manga papanuk su manga sapak'in, 22 na seka su entu, hu sultan. Kagina su kapendatu nengka na sangat a migkabagel. Su kabagel'engka na nakasugku sa langit. Su kapendatu nengka na nakapayapat kanu lusud'u dunia. 23 Na daka nakailay ka bun sa suti a malaikat a mimbaba ebpun sa sulega a 'bpananawag sa matanug a nia nin pedtalun na dait na tibpaden su kayu a nan ka binasan, ugaid'a padtadayn su tud'in enggu su manga dalig'in lu kanu malinawag a iketan sa putaw enggu galang a nabalibet'a manga utan. Na nia nin pan pidtalu na padtadayn a malumes-lumes'a namug enggu nia nin makan na manga utan a kaped'u manga binatang kanu dalem'u pitu lagun. 24 Hu sultan, nia ba i maena nu inipaalung sa leka nu Kadenan a Mapulu sa Langun a natatalanged a manggula nengka. 25 Itangka ka kanu manga taw ka lu ka makagkakaleben kanu manga malinawag a kaped'u manga binatang. Na nia nengka kanen na manga utan a mana bun su manga sapi a pegkan sa utan enggu malumes-lumes ka nu namug. Na kanu dalem'u pitu lagun i katala nengka sa maitu ba taman sa katuntayan nengka i su Kadenan a Mapulu sa Langun i pegkakataw kanu langun nu pendatuan kanu dunia enggu sekanin i 'bpamili u entain i ipembetad'in lun. 26 Ugaid'a su maena menem'u tud a padtadayn kanu lupa na makambalingan pamun sa leka su pendatuan nengka amaika katuntayan nengka den i su Kadenan a lu sa sulega i pegkakataw kanu langun.
27 “ ‘Hu sultan, 'bpangenin ku sa leka i pakikineg ka su papata ku sa leka. Teleni ka den su kapendusa nengka, ka nia ka den enggula na u ngin i wagib. Teleni ka den su kawag'u ukit'engka, ka nia ka den enggula na lati ka sa nanam su manga miskinan ka aden a entu na mananalusan pamun su mapia a nan a 'gkambebetad'engka.’
28 “Na su langun nu entu na nanggula bun kanu uyag-uyag'u Sultan Nibukadnisar. 29 Na kanu kinaipus'u nakasalagun, gagalu nu kapendadalakaw nu Sultan Nibukadnisar lu kanu untul'u atep'u tulugan nin sa Babilunia 30 na nia nin nadtalu na ‘Sangat a mabagel su siudad a Babilunia! Sia kanu kapegkagaga ku na nakapatindeg ku su nia a siudad a pendatuan ku a sia ba mailay su kapegkagaga ku a nakabadtug sa laki.’ 31 Na gagalu nu kapedtalu nin sa entu na aden suala a nakabpun sa sulega a midtalu lun sa ‘Sultan Nibukadnisar, pakikineg ka! Ibpagawa ku den su kapendatu nengka. 32 Itangka ka kanu manga taw enggu lu ka den makagkakaleben kanu manga malinawag a madtagapeda nengka su manga binatang. Nia nengka makan na manga utan a mana su pegken nu manga sapi. Na kanu dalem'u pitu lagun i katala nengka sa maya ba taman sa katuntayan nengka i su Kadenan a Mapulu sa Langun i pegkakataw kanu langun nu pendatuan sa dunia enggu sekanin i 'bpamili u entain i 'bpagenggan nin lun.’ 33 Na kanu entu demun ba na midsambuta i kinatuman lun, initangka sekanin kanu manga taw, kineman sekanin sa manga utan a mana su manga sapi, nalumes-lumes sekanin na namug, migkalendu i buk'in a mana su bumbul'u lumalagit enggu su manga kanuku nin na nakailing sa kanuku na papanuk.
34 “Guna maipus su entu a manga lagun na saki a si Nibukadnisar na tinemingada aku kanu langit. Daka nakambalingan su matidtu a itungan ku taman sa napugi ku enggu nasimba ku su Kadenan a Mapulu sa Langun a 'bpaguyag-uyag taman sa taman.
Su kapendatu nin na dala kapedtaman nin.
Su pendatuan nin na dala kapupusan nin.
35 Na su langun nu taw sia kanu liwawaw na dunia na dala man kapantag'in sa lekanin.
Penggulan nin u ngin i pakasuat sa lekanin magidsan i sia kanu manga malaikat sa sulega enggu kanu manga taw sa dunia.
Dili man sekanin malen atawa ka kadtaluan sa ‘Ngin i kahanda nengka sa kapenggula nengka sa nan?’
36 “Na guna den makambalingan su mapia a itungan ku na nakambalingan bun su kabpagadat'u manga taw sa laki enggu su pendatuan ku. Tinalima aku 'bpaluman nu 'gkangasaligan ku enggu su 'bpamapata sa laki. Na makin pan nangiseg su kabagel'u kapendatu ku. 37 Tembu saguna na pebpugin ku enggu ipebpulu ku su pendatu kanu sulega. Kagina wagib enggu matidtu su langun nu penggulan nin enggu magaga nin mapagkababa su muletad'u manga mapulu i muletad'in a taw.”