Su Balahala a Bulawan a mana Buntal'a Manusia
3
Na napaumbal su Sultan Nibukadnisar sa balahala a bulawan a mana buntal'a manusia a nia nin kalambeg na siyawpulu takap enggu nia nin menem kasela na siyaw takap. Na lu nin inipatindeg kanu kadatalan nu dalepa a Dura lu kanu lusud'u Babilunia. 2 Daka inipatawag'u Sultan Nibukadnisar su langun nu manga gubilnadul, manga mapulu nu dalepa, manga 'gkasaligan, manga pedtuludu sa kakawasan nu pendatuan nin, su 'bpamangukum, su 'gkangasaligan nu manga dalepa enggu su ped pan a 'bpananggit kanu dalepa taman den kanu langun nu 'gkangaunutan kanu manga prubinsia ka enggu silan makatalabuk kanu kapedsela-sela kanu entu a pinatindeg'u Sultan Nibukadnisar. 3 Na langun nilan na linemu mambu ka nangadap kanu entu a balahala. 4 Guna su maitu, na midtalu sa matanug su nasanganan sa kadtalu-talu sa nia nin pidtalu na “Inibpaliugat kanu uman i bangsa, tribu enggu basa, 5 sa amaika makineg'u den su uni nu tambuli, palendag, manga kutiapi, palabuni-bunian a alpa enggu ped pan a palabuni-bunian na sugiud kanu ka simba nu su balahala a bulawan a pinatindeg'u Sultan Nibukadnisar. 6 Na apia entain i dili semugiud sa kasimba nin lun na idtug mamagayas lu kanu pegkalaw-kalaw a apuy.” 7 Na guna su maitu na endaw i kinakineg'u madakel a taw a ebpun kanu embalang-balang a bangsa, tribu enggu basa su uni nu tambuli, palendag, manga kutiapi, palabuni-bunian a alpa enggu ped pan a palabuni-bunian na sinemugiud silan ka sinimba nilan su balahala a entu a bulawan.8-9 Na kanu entu ba a timpu na aden sinemupeg kanu Sultan Nibukadnisar a manga taw sa Babilunia ka inipanudtul'ilan lun su manga taw a Yahudi sa nia nilan pidtalu na “Hu sultan, palihalan ka! 10 Dikena ba nia nengka inisugu na apia entain i makakineg kanu uni nu tambuli, palendag, kutiapi, tambul enggu su ped pan a palabuni-bunian na dait a semugiud ka semimba kanu balahala a bulawan a mana buntal'a manusia a pinatindeg'engka? 11 Na apia entain i di semugiud lun semimba na idtug kanu apuy a 'bpangalaw-kalaw. 12 Na aden a nan manga taw a Yahudi a dala paginugut kanu kasuguan nengka a mana si Siadrak, Misiak enggu si Abidnigu a inipametad'engka a pegkakataw kanu lusud'u Babilunia. Di nilan pedsimban su manga kadenan nengka enggu dili nilan bun pedsugiudan su pinatindeg'engka a nan a balahala a bulawan.”
13 Daka sangat a nalipunget su sultan tembu inipatawag'in si Siadrak, Misiak enggu Abidnigu. Daka pinaadap den mambu silan kanu sultan. 14 Na nia pidtalu nu Sultan Nibukadnisar kanilan na “Seka Siadrak, Misiak enggu Abidnigu, ngintu, benal ba a dili nu pedsimban su manga kadenan ku enggu dili nu pedsugiudan su pinatindeg ku a balahala a bulawan? 15 Na saguna na pedsugun ku sekanu sa endaw i kakineg'u kanu uni nu tambuli, palendag, manga kutiapi, palabuni-bunian a alpa enggu ped pan a palabuni-bunian na sugiud kanu ka simba nu su balahala a entu a bulawan a inipaumbal ku. Ka amaika dili nu enggulan su entu na ipaidtug ku sekanu kanu apuy a 'bpangalaw-kalaw. Ka ilayn ta ba u aden kadenan a makapalipuas sa lekanu kanu kapegkagaga ku.”
16 Na nia nilan mambu inisumpat kanu sultan na “Hu sultan, dala madtalu nami pantag sa nan. 17 Amaika maitu ba i manggula na su Kadenan a pedsimban nami na magaga kami nin lemipuas kanu apuy a 'bpangalaw-kalaw, na ilipuas kami nin kanu kapegkagaga nengka. 18 Ugaid'a amaika menem ka dili kami nin ilipuas kanu entu, na papedsabutan nami sa leka i dili kami bun semimba kanu manga kadenan nengka enggu dili kami bun semugiud kanu pinatindeg'engka a nan a balahala a bulawan.”
19 Guna su maitu, na migkakaliga su sultan ka sangat a nalipunget sekanin tembu inisugu nin i makin biagan pamun su apuy ka enggu 'gkaumanan su kayaw nin sa makapitu takep. 20 Na entu pan ka inisugu nin kanu manga mabagel sa langun a manga sundalu nin i pawiken si Siadrak, Misiak enggu Abidnigu ka idtug silan kanu 'bpangalaw-kalaw a entu a apuy. 21 Tembu pinawik den mambu silan nu manga sundalu ka inidtug silan kanu apuy a entu a 'bpangalaw-kalaw a dala den maawa su balegkas'ilan enggu su manga nakaselub'ilan a igagama. 22 Sabap sa inisugu nu sultan i makin biagan pamun su apuy ka enggu 'gkaumanan pamun su kayaw nin, na migkabagel su kaleg'in taman sa minatay su manga sundalu a minidtug kanilan. 23 Na su kinaidtug a entu kanilan lu kanu 'bpangalaw-kalaw a apuy na napawik pamun silan.
24 Na daka nakadtindeg sa kinagaip'in su Sultan Nibukadnisar taman sa nia nin nakaidsa kanu 'gkangasaligan nin na “Dikena ba telu kataw bu silan a inidtug kanu apuy a nangapawik?” Na nia nilan inisumpat na “Uway, sultan.” 25 Na nia nadtalu nu sultan na “Ilay nu pan, ka pat silan kataw a 'bpelalakaw a da den pawik'ilan lu kanu luk'u 'bpangalaw-kalaw a apuy a dili silan 'gkatutung a mana nia ku lun kapegkailay kanu sakataw na isa kanu manga kadenan.”
26 Daka minubay su Sultan Nibukadnisar lu kanu bengawan nu 'bpangalaw-kalaw a apuy ka tinawag'in silan sa matanug sa “Seka Siadrak, Misiak enggu Abidnigu a manga panunugun nu Kadenan a Mapulu sa Langun, liu kanu san!” Na linemiu mambu si Siadrak, Misiak enggu Abidnigu ebpun kanu 'bpangalaw-kalaw a apuy. 27 Na guna su maitu na nangalimud su manga gubilnadul, su manga mapulu nu dalepa enggu su ped pan a 'gkangasaligan nu sultan. Na nailay nilan i dala silan kagkaidi nu apuy enggu apia su manga balegkas'ilan enggu buk'ilan na dala pagebaw na bel.
28 Na sabap sa entu na nia nadtalu nu sultan na “Pugin su Kadenan ni Siadrak, Misiak enggu Abidnigu, ka sinemugu sekanin sa malaikat a makalipuas kanu manga panunugun nin a nia a pedsalig sa lekanin. Na dala nilan paginuguti su kasuguan ku ka nia nilan tinemu i matay silan kumin sa kasimba nilan kanu ped a kadenan a liu kanu Kadenan a pedsimban nilan. 29 Tembu ipedsugu ku i apia entain kanu apia endaw a bangsa, tribu enggu basa i edtalu sa sungkang kanu Kadenan ni Siadrak, Misiak enggu Abidnigu na panebpeden ku i manga badan nin enggu ipabinasa ku i walay nin sabap sa dala man salakaw a kadenan a makagaga lemipuas sa maya ba a ukit.” 30 Na daka inipulu nu sultan sa galebekan si Siadrak, Misiak enggu Abidnigu kanu lusud'u Babilunia.