Su Taginepen nu Sultan Nibukadnisar
2
Na kanu ikadua lagun nu kapendatu nu Sultan Nibukadnisar na midtaginep sekanin sa sangat a nakalingasa kanu ginawa nin taman sa dili sekanin pakatulug. 2 Na daka inipatawag'in su langun nu mategel sa kangagaipan, su 'bpamangingilayan, su 'bpamangalintaw enggu su manga pabibitun ka enggu nilan kanggumaenan su taginepen nin. Daka linemu mambu silan kanu sultan. 3 Na nia pidtalu nu sultan kanilan na “Midtaginep aku sa sangat a nakalingasa kanu ginawa ku, na nia ku kalinian na katuntayan ku u ngin i maena nu entu ba a taginepen ku.” 4 Na nia inisumpat'u mangategel a entu kanu sultan sa basa a Arama na “Hu sultan, palihalan ka. Na edtalu ka den sa lekami a panunugun nengka su taginepen nengka ka enggu nami kapatuntayan sa leka i maena nin.”5 Na nia inisumpat'u sultan kanilan na “Nia ku atulan kanu nia ba na amaika dili nu madtalu sa laki su nadtaginep ku enggu dili nu madtalu sa laki su maena nin na panebpeden ku su manga badan nu enggu ipabinasa ku su manga kawalayan nu. 6 Na amaika menem ka madtalu nu su nadtaginep ku enggu su maena nin na balasan ku sekanu sa masela enggu enggan ku sekanu sa masela a kabadtugan. Na edtalu nu sa laki su taginepen ku enggu su maena nin.”
7 Na nia nilan menem nakasumpat kanu sultan na “Hu sultan, edtalu ka den sa lekami su nadtaginep'engka ka enggu nami matargium sa leka.” 8 Na nia pidtalu nu sultan kanilan na “Katawan ku i 'bpaganggan nu bu su kutika kagina katawan nu i tumanen ku su pidtalu ku a entu 9 a pakaidan ku sa lekanu langun amaika dili nu mapanudtul sa laki su nadtaginep ku. Na katawan ku man i namagayun kanu sa kandalebut'u ka nia nu lun kataw na masalin pamun su itungan ku sa kabpagangga nu a nan. Na saguna na edtalu nu sa laki su nadtaginep ku ka lu ku ba katawan u saben-sabenal a mataw kanu temargium.” 10 Na nia nilan nakasumpat na “Dala pamun taw sia sa dunia a makagaga enggula kanu nia a kiug'u sultan. Dala bun sultan a semugu sa mamba kanu manga mategel'in sa kangagaipan, 'bpamangingilayan enggu pabibitun kanu pendatuan nin apia ngin pan i kabagel'a kapendatu nin. 11 Hu sultan, sangat a mapasang su 'bpangenin nengka a nan. Nia bu makagaga sa nan enggula na su manga kadenanb a dikena 'bpaguyag-uyag a kaped'u manusia.” 12 Na sabap sa entu a sawal'ilan na nalipunget a benal su sultan tembu napasugu sekanin sa imatayan su langun nu aden kangategelan nin sa lusud'u Babilunia. 13 Na inipayapat su entu a kasuguan nu sultan sa imatayan su langun nu aden kangategelan nin. Tembu pinangilay nilan si Danyil enggu su manga pakat'in ka ibpagamung bun silan 'bpagimatay.
14 Na guna su maitu na inidsan ni Danyil sa mapia a ukit si Ariuk a mapulu nu manga tameng a sinugu kanu kaimatay kanu langun nu aden kangategelan nin kanu lusud'u Babilunia. 15 Na nia nin inidsa kani Ariuk na “Ngintu ka mapasang a benal su nia ba a kasuguan nu sultan?” Na pidsinantal mambu ni Ariuk sa lekanin su pantag sa entu. 16 Na daka nangadap si Danyil kanu sultan ka pinangeni nin lun i enggan pan sekanin sa kutika sa katargium'in kanu nadtaginep nin.
17 Na guna su maitu na minuli si Danyil ka pinasabutan nin su pantag sa entu kanu manga pakat'in a si Anania, Misail enggu si Asaria. 18 Na nia nin pidtalu kanilan na mangeni silan sa tabang kanu Kadenan a lu sa sulega ka enggu nilan 'gkatawan su taginepen nu sultan ka enggu dili silan matay apeg'u manga ped pan a aden kangategelan nin kanu lusud'u Babilunia. 19 Daka kanu magabi na inipayag'u Kadenan kani Danyil su taginepen nu sultan sa ukit'a kinapaalung'in lun. Tembu pinugi ni Danyil su Kadenan a lu sa sulega 20 sa nia nin pidtalu na
“Pugin su ingala nu Kadenan taman sa taman,
lu sa lekanin su ilemu enggu su kapegkagaga.
21 Sekanin i pakapadsalin kanu manga kutika enggu kanu manga timpu,
sekanin i pegkakataw pembetad kanu manga sultan enggu pebpagawa lun,
sekanin i minenggay sa ilemu kanu manga taw a mangategel,
sekanin bun i minenggay sa katuntay kanu manga taw a aden tuntay nin,
22 sekanin i papedtuntay kanu manga madalem a ilemu enggu kanu makagaip a 'gkanganggula.
'Gkatawan nin u ngin i sia kanu kalibutengan,
ka lu man sa lekanin su sigay a pakagkalinawag.
23 Hu Kadenan nu manga katupuan ku, pedsukul-sukul aku sa leka enggu pebpugi,
ka inenggan aku nengka sa ilemu enggu kapegkagaga,
inipayag'engka sa laki su 'bpangenin nami sa leka,
ka inipayag'engka sa lekami su taginepen nu sultan.”
Su Kinatargium'u Danyil kanu Taginepen nu Sultan
24 Guna su maitu na pimbalinganan ni Danyil si Ariuk a sinugu sa kaimatay kanu langun nu aden kangategelan nin kanu lusud'u Babilunia ka nia nin pidtalu sa lekanin na “Di ka 'bpagimatayi su aden manga kategelan nin kanu lusud'u Babilunia ka makin iadap aku nengka lu kanu sultan ka targiumen ku su nadtaginep'in.” 25 Na guna su maitu na pinamagayasan mapaadap'i Ariuk si Danyil lu kanu sultan sa nia nin lun pidtalu na “Natun ku i mama a nia kanu manga nasigkem a ebpun kanu dalepa a Yahuda a makatargium kanu nadtaginep'engka.” 26 Na nia pidtalu nu sultan kani Danyil a binedtuan bun sa Biltasar na “Ngintu, magaga nengka edtalu sa laki su nadtaginep ku enggu su maena nin?” 27 Na nia inisumpat'i Danyil kanu sultan na “Dala man taw a makagaga temargium kanu nan a nadtaginep'engka apia su aden kangategelan nin, 'bpamangingilayan, mategel sa kangagaipan enggu su manga pabibitun. 28-29 Ugaid'a aden Kadenan a lu sa sulega a pebpayag kanu manga nakapagena a maena nu 'gkanganggula. Na inipayag'in sa leka sia kanu taginepen nengka su manganggula kanu mangauma pan a timpu. Hu sultan, nia nengka ba a entu pidtaginep sia kanu kapedtulug'engka na su manganggula kanu mangauma pan a timpu. Na su Kadenan a pebpayag kanu manga nakapagena a maena nu 'gkanganggula na papedtuntayan nin sa leka su manganggula kanu mangauma pan a timpu. 30 Na inipayag'u Kadenan sa laki su maena nu taginepen nengka sa dikena nia nin maena i mategel aku kumin kanu manga ped, ugaid'a asal bu na kapatuntayan nin sa leka ka enggu nengka 'gkasabutan su pakasimuket a nan kanu ginawa nengka.
31 “Na nia ba su nadtaginep'engka: Nakailay ka sa masela a balahala a pakaipeng-ipeng enggu makasabalang i buntal'in a sia kanu kasangulan nengka enggu sangat a pakagilek-gilek i buntal'in. 32 Na su ulu nu entu na bulawan a dala simbul'in, su laleb'in enggu su manga ngelay nin na pilak, su tian nin enggu su manga bubun nin na galang, 33 su manga lisen nin menem na putaw enggu su ay nin na pinambad sa putaw enggu pinadtegas a budta. 34 Na gagalu nu kapedsandeng'engka lun na aden naulug a masela a tebi na watu a dikena manusia i minggula lun a nakasugat kanu ay nu balahala a entu a pinambad sa putaw enggu pinadtegas a budta a punan a kinalupet-lupet'u ay nin. 35 Daka nalundus su balahala a entu a inumbal a ebpun sa putaw, pinadtegas a budta, galang, pilak enggu bulawan. Na nia nin nalagidan na ukap a inibayug'a sambel sa apia endaw den, taman sa dala den 'bpagilayan lun. Ugaid'a su watu a nakasugat lun na nabaluy a masela a palaw a nakapenu kanu dunia.
36 “Na nia su maena nu entu a taginepen nengka. 37 Hu Sultan, seka su datu nu manga sultan. Na su Kadenan a lu sa sulega na binaluy ka nin a datu enggu inenggan ka nin sa kapegkagaga, bagel enggu kabadtugan. 38 Inisalig'in sa leka su manga taw, su manga binatang magidsan pan i talaw enggu dikena talaw taman kanu manga papanuk sa kawang-kawangan. Pinakamalan nin sa leka su langun nu entu sa apia endaw. Na nia nin maena na seka su bulawan a entu a ulu nu balahala. 39 Na aden temundug a pendatuan a malubay kumin sa leka, enggu aden pamun ikatelu a pendatuan bun a inibaratan sa galang a masakup'in su pat a pisuk'u dunia. 40 Na aden pamun ikapat a pendatuan a inibaratan sa mana kabagel'u putaw, ka mana bun su putaw a pakalupet kanu apia ngin, na maitu bun ba i kalupet'in kanu ped a pendatuan. 41 Ugaid'a mana bun su nailay nengka a ay nin a nakambad sa pinadtegas a budta enggu putaw na maitu bun ba su nia ba a pendatuan na mabad bun. Ugaid'a su bagel'u entu na dili bun masalin a mana bun su kabagel'u mategas a putaw a nailay nengka a ay nin a pinambad sa putaw enggu pinadtegas a budta. 42 Na su manga kemel'u ay nin a pinambad sa pinadtegas a budta enggu putaw na nia nin maena na su entu a pendatuan na sabad na malubay enggu sabad menem na mabagel. 43 Na su pinadsimbul a pinadtegas a budta enggu putaw na nia nin maena na masaumpung su pendatuan sa ukit'a kanggia-giamunga nilan ugaid'a dili bun 'gkauget su kasaumpung'ilan kagina di man mapakay a makadtimpung su pinadtegas a budta enggu su putaw.
44 “Na su timpu nu kandatu nu entu ba a manga sultan na su Kadenan a lu sa sulega na mapatindeg sa pendatuan a dili magaga mapalusak'u apia entain taman sa taman enggu dili masakup'u apia entain. Ka nia pan mula na mabinasa nu pinatindeg a entu a pendatuan su langun nu pendatuan enggu matebped'in su kapendatu nilan ugaid'a su lekanin a pendatuan na makatindeg taman sa taman. 45 Na nia ba su maena nu watu a entu a nailay nengka a naulug a ebpun kanu palaw a dikena manusia i minggula lun a linemupet kanu balahala a entu a inumbal ebpun sa putaw, galang, pinadtegas a budta, pilak enggu bulawan. Hu sultan, inipayag man nu Kadenan a Mapulu sa leka su manganggula kanu mangauma pan a timpu. Na natatalanged a manggula su entu a taginepen nengka enggu su kinatargium ku lun na natatalanged a nakatidtu.”
46 Na guna su maitu na nakasugiud su Sultan Nibukadnisar ka napagadatan nin si Danyil, daka inisugu nin i kagkurbanan sa lekanin enggu kagkurban lun sa mamut a tutungen. 47 Na nia pidtalu nu sultan kani Danyil na “Saben-sabenal a su Kadenan nengka na Kadenan nu langun nu kadenan, datu nu langun nu sultan enggu pebpayag kanu manga nakapagena a maena, ka nagaga nengka mayag su nakapagena a maena nu nia a taginepen ku.” 48 Na daka inipulu nu sultan kanu galebekan nin si Danyil enggu pinangenggan nin sa madakel a mangapia a balas taman sa inumbal'in sekanin a makapangulu kanu lusud'u Babilunia enggu makapangulu kanu langun nu aden kategelan nin sa lusud'u Babilunia. 49 Na saleta mambu na pinangeni ni Danyil kanu sultan i ibetad'in a makadtabang sa lekanin sa kapangulu kanu dalepa si Siadrak, Misiak enggu Abidnigu. Na miniug mambu su sultan kanu entu a pinangeni ni Danyil. Ugaid'a si Danyil na lu demun sekanin kanu tulugan nu sultan.