Kitab a Inisulat'u Nabi Danyil
Su Kinapamili kanu Danyil enggu kanu Telu Kataw a Manga Pakat'in
1
Na kanu ikatelu lagun nu kapendatu nu Datu Yihuyakim sa dalepa a Yahuda na linemu su Sultan sa Babilunia a su Nibukadnisar kanu dalepa a Awrusalim ka linibet'ilan asal'a masakup'in su entu.a 2 Na inipalad'u Kadenan a Mapulu kanu Sultan Nibukadnisar su Datu Yihuyakim taman den kanu ped a manga igagama nu Suti a 'Bpagagaman. Na inipadtapik'in su manga entu lu sa dalepa a Babilunia, lu kanu 'bpametadan kanu manga kakawasan nu pegkakadenanen nin.3 Na sinugu nu Sultan Nibukadnisar su 'gkasaligan nin kanu manga taw nin a si Aspinias sa mamili sekanin kanu manga taw a Israil a ebpun kanu balapantag a tupu nu Yahuda enggu kanu manga balabansa a manga taw. 4 Na nia dait a mapamili na manganguda a dala tila na kanggulawas'in, mapia i palas'in, mangategel, malengkas i guay-guay nin, malemu pamandun enggu makagaga enggalebek kanu tulugan nu sultan. Na pamandun silan sa basa enggu langun na ukit'u manga taw a Babilunia. 5 Inisugu bun nu sultan kani Aspinias i lu kuan su makan nilan sa kanu uman-uman gay a ipapegkan kanu sultan enggu su alak a ig'a ubas a ipainem kanilan na lu bun kuan kanu alak a ipabpaginem kanu sultan. Na pamandun silan sa langun na ukit kanu dalem'u telu lagun entu pan ka mabaluy den silan a gumagalebek kanu tulugan nu sultan.
6 Na isa kanu manga napamili na si Danyil, si Anania, si Misail enggu si Asaria. Na ebpun silan langun kanu tupu nu Yahuda. 7 Na pinanalinan silan ni Aspinias sa manga ngala. Na nia nin inibedtu kani Danyil na Biltasar, si Anania menem na Siadrak, si Misail menem na Misiak enggu si Asaria menem na Abidnigu.
8 Saleta mambu na si Danyil na tinalanged'in den kanu ginawa nin i dili sekanin keman kanu pegken a ebpun kanu sultan enggu dili bun sekanin minem kanu 'bpaginumen nu sultan ka enggu di sekanin maharam. Tembu pinangeni nin kani Aspinias sa sugutan sekanin sa dili nin kakan enggu kainem sa entu ka enggu di sekanin maharam. 9 Na pigkahanda mambu nu Kadenan i kasuatan enggu ikalimu sekanin ni Aspinias a 'gkasaligan nu sultan. 10 Ugaid'a nia pidtalu ni Aspinias kani Danyil na “'Gkagilekan aku kanu mapulu ku a su sultan, ka sekanin demun i sinemugu sa kakan nu kanu nia a pegken enggu kainum'u kanu nia ba a 'bpaginumen. Na amaika mailay nin i dili 'gkapia su kanggulawas'u a mana su kanggulawas'u manga tagapeda nu a manganguda na tabia bun ka paputukan aku nin sa ulu.”
11 Guna su maitu na nia pidtalu ni Danyil kanu nasaligan ni Aspinias a temuludu sa lekanin enggu kanu manga tagapeda nin a si Anania, si Misail enggu si Asaria na 12 “Tekawi kami nu pan muna mapakan sa kamu bu enggu ig bu i ipainem'u sa lekami sa kanu dalem'u sapulu gay. 13 Entu pan ka padsagid kami kanu manga kaped'ami a nia nilan pinangan na su pegken a ebpun kanu sultan. Na ilay ka u ngin i kambidayan nami. Na seka den i mataw lun u ngin i dait a pakaidan sa lekami sia luyud kanu ngin i nailay nengka a kambidayan nami.” 14 Na miniug mambu su pedtuludu kanilan, taman sa pinggula nilan den su entu kanu dalem'u sapulu gay.
15 Na guna maipus su sapulu gay na nailay nu pedtuludu kanilan i silan i migkakapia i kanggulawas'in kumin kanu manga pagidsan nilan a nia nilan pinangan na su pegken a ebpun kanu pegken nu sultan. 16 Tembu dala den ipangenggay nu pedtuludu kanilan su pegken enggu 'bpanginemen a ebpun kanu sultan ka nia nin bu inipangenggay kanilan na su kamu bu.
17 Na su pat kataw a nia a manganguda na inenggan nu Kadenan sa kapegkagaga sa katuntay sa mapia kanu langun nu embalang-balangan na manga adat-betad enggu ilemu nu manga taw sa Babilunia. Na liu pan sa entu na inenggan si Danyil sa kapegkagaga sa kaalung'in kanu dili pan 'gkanggula enggu su katargium'in kanu manga taginepen.
18 Na guna maipus su nakatelu lagun a kinapamandu kanilan kanu manga ukit, na sia luyud kanu kasuguan nu Sultan Nibukadnisar na iniadap den silan nu panunugun nu sultan a si Aspinias kanu sultan. 19 Na sia kanu kapembitiala nu sultan kanilan na nadsagipa nu sultan i apia sakataw kanu manganguda a entu na dala makalawan kani Danyil, Anania, Misail enggu Asaria. Tembu napamili silan nu sultan a enggalebek sa lekanin. 20 Na apia ngin i ibpagidsa nu sultan kanilan na nadsagipa nin i su kategel'ilan sa katuntay na takep-temakep kumin kanu mategel sa kangagaipan enggu 'bpamangingilayan kanu lusud'u pendatuan nin.
21 Na saleta mambu na si Danyil na minggalebek sekanin kanu tulugan nu sultan taman den kanu timpu nu Sultan Sirus.