Kitab'u Nabi Yunus
Su Tutuma kanu Kadtaubat
Su Di Kabpaginugut'u Nabi Yunus kanu Kadenan
1
Na aden isa a gay a nakatingguma su kadtalu nu Kadenan kanu Yunus a wata ni Amitahi. 2 Nia nin pidtalu na “Ganat ka, ka sapali ka su manga taw sa Ninibah, su maulad enggu badtug a inged sabap sa sinemenep den su kadupangan nilan.” 3 Ugaid'a su Yunus na di 'bpaginugut ka miug temangka kanu suguan nu Kadenan. Linemudus sekanin sa dalepa a Yupa. Na guna den makasukay na nageda sekanin kanu masela a layag a 'bpawang sa pantalan a Tarsis.4 Guna su nakakalud den silan na pinasambel'u Kadenan sa mabandes taman sa sama bu di 'gkageba su layag. 5 Na su manga palalayag na kinukuk'a gilek taman sa namangeni-ngeni silan sa tabang kanu balahalaa nu uman i isa kanilan. Entu pan ka inidtug'ilan su manga lulan lu sa lagat ka enggu 'gkakulangan su ugat'u layag. Saleta na su Yunus na lu besen 'bpagiga kanu tian nu layag a minatay na tulug.
6 Na guna sekanin mailay nu kapitan nu layag na pidtaluan nin sa “Huy, gedam ka san! Nginan ka pedtulug ka? Embangun ka enggu pangeni-ngeni ka sa tabang kanu pedsimban nengka ka basi ipamamantag tanu nin asal bu na makalipuas tanu.”
7 Da matana-tana na mimbibitialai su manga palalayag sa “Nah! Basi nia mapia na embunuta tanu ka entain i mabunut i ngala nin na sekanin i kasenditan kanu nia ba a tiuba.” Na entu ba i pinggula nilan. Saleta mambu na nia nabunut a ngala na kanu Yunus. 8 Daka pidtalu nilan sa lekanin i “Edtalu ka sa lekami u entain i kasenditan kanu nia ba a tiuba! Ngin i galebekan nengka? Endaw ka nakaebpun? Edtalu ka u endaw i inged'engka enggu ngin i bangsa nengka!”
9 Na nia nin inisawal sa kanilan na “Isa aku a Hibru. Nia ku pedsimban na su Kadenan nu sulega a nangaden kanu lupa enggu su lagat.” 10 Pinakatawan nin den kanilan i da sekanin paginugut kanu suguan nu Kadenan. Guna nilan makineg i entu ba na naawan silan na makatu sa kinagilek'ilan enggu nia nilan pidtalu na “Ngintu ka pinggula nengka i entu?”
11 Na makin bun pegkabandes su sambel na inidsan sekanin nu manga palalayag sa “Ngin i pakaidan nami sa leka ka enggu 'gkalinaw su lagat?”
12 Nia inisawal'u Yunus na “Idtug aku nu sa lagat ka enggu 'gkalinaw su bagel ka katawan ku i saki i sabapan nu nia ba a tiuba a masela.”
13 Na nia pan mula na makin namikal mula su manga mama asal bu na makadunggu silan. Ugaid'a di pakaiseg su layag ka pegkabandes pamun su sambel. 14 Daka nangeni-ngeni silan kanu Kadenan a pedsimban nu Yunus sa nia nilan pidtalu na “Hu Kadenan na kanu kaidtug'ami kanu mama a nia na di ka bu temebped su napas'ami. Seka bu i mataw kanu langun nu nia a kahanda nengka.” 15 Entu pan mambu ka inidtug'ilan den su Yunus lu sa kaludan na natekaw demun su kinalinaw nu lagat. 16 Guna nilan mailay su entu na tantu a nangagilekan silan kanu Kadenan entu pan ka sinemumbali silan sa ayam a tanda nu kinadsukul-sukul'ilan kanu Kadenan enggu nangaden silan mambu sa manga pasad sa lekanin.
17 Na inadil'u Kadenan su masela a seda a lemamed kanu Yunus. Na nakatelu gay sekanin lu kanu didalem'u tian nu seda.