Su Kabpangeni-ngeni nu Nabi Yunus
2
Guna su lu den su Yunus kanu tian nu seda na nangeni-ngeni sekanin kanu Kadenan nin a Mapulu sa Langun 2 sa nia nin pidtalu na“Hu Kadenan, sia kanu kapegkalasay ku na sinemabut aku
enggu nakineg aku nengka mambu.
Nangeni aku lu sa leka ebpun kanu dalepa a mana den su didalem'u pakubulan,
na nakineg'engka su suala ku.
3 Inipaidtug aku nengka lu sa kaludan,
lu kanu pused'u lagat.
Na nalibet aku na ig,
na 'gkatangguban aku nu langun nu manaut pan sa masela a bagel'engka.
4 Na nia natagu sa ginawa ku
na basi di aku den makambalingan kanu palad'engka.
Ugaid'a katawan ku i nia mauli lun na makasangul aku pan 'bpaluman
kanu walay nengka a suti.a
5 Natangguban aku den nu ig taman sa nabalisek aku,
na 'gkaled aku den enggu naputus'a utan sa lagat su ulu ku.
6 Na mana su nakadidalem aku pan kanu udsadan nu palaw,
a lu kanu didalem'u lagat, na nakauma aku den lu kanu tinampulan a manga minatay.
Ugaid'a seka a Kadenan a pedsimban ku na pinabpapulu aku nengka mambu kanu nia a madalem a dalepa
taman sa nakapaguyag-uyag aku 'bpaluman.
7 Hu Kadenan na guna su 'gkagedam ku i matebped den su napas ku
na nangeni-ngeni aku mambu sa leka.
Daka nakineg aku nengka
lu kanu dalepa nengka a suti.
8 Na su manga 'bpamedsimba kanu manga balahala a da katagan nin
na naawan silan na umun kanu limu a inigkahanda nengka sa kanilan.
9 Ugaid'a saki na sumbalian ku seka sa ayam
kaped den a ibpanginsukulen ku kanu kapebpugi ku sa leka.
Su inidsapa ku na tumanen ku,
ka seka mambu a Kadenan i 'bpamelipuas kanu manga manusia!”
10 Guna su maitu na sinugu den nu Kadenan su seda entu pan ka initubpa nin su Yunus lu sa dedsan.