Su Kinapaginugut'u Nabi Yunus kanu Kadenan
3
Na da matana-tana na nakatingguma menem su kadtalu nu Kadenan kanu Yunus. 2 Nia nin pidtalu na “Ganat ka, ka lu ka sa Ninibah a maulad enggu badtug a inged ka ipayag'engka su endaw i makapayag ku sa leka.” 3 Daka naginugut den su Yunus kanu Kadenan ka linemu sekanin sa Ninibah. Su kaulad'u entu a siudad na makasaut sa makatelu gay i kabpelalag lun. 4 Linemudsu lemalag su Yunus kanu entu a siudad. Kanu kinalalag'in kanu nagagabian na nia nin inipayag na “Hu manga taw sa Ninibah na patpulu gay bu saguna na mageba den su inged a nia a Ninibah!”5 Na su manga taw sa Ninibah na pinaginugutan nilan su inipayag'u Kadenan sa kanilan. Daka namagisa-isa silan iganat kanu manga mapulu taman kanu mababa a manga taw sa kambalegkas'ilan sa saku enggu kabpuasa.a
6 Na su kinakineg'u sultan nu Ninibah kanu langun nu 'gkanggula na mimbaba sekanin lu kanu kulsi nin. Linuwas'in su lambung'in a matinang ka mimbalegkas mambu sa saku enggu minayan sa aw.a 7 Inisugu nin i ipayag kanu manga taw sa Ninibah i “Nia su kasuguan nu sultan enggu su manga ped a 'gkangaunutan. Da isa bu a keman enggu minem sa apia ngin taman kanu manga manaut-matiwalu a binatang. Na di silan pakanen enggu di painemen. 8 Langun nu manga taw na embalegkas sa saku enggu bausan sa saku su manga binatang. Uman i isa na mamikal mangeni-ngeni kanu Kadenan enggu taligkudi nu su manga kadaluakan enggu su kapapegkasakit'u kanu manga taw. 9 Ka kalu-kalu i lasamen tanu nin pamun enggu lipatanan nin su lipunget'in asal'a di tanu mamamatay.”
10 Na guna su nailay mambu nu Kadenan su pinggalebek'ilan a tinaligkudanan nilan su mawag a galebek, na linasam'in enggu da nin silan siksa a mana su inipapayag'in sa kanilan.