Su Lipunget'u Nabi Yunus enggu su Limu nu Kadenan
4
Na sinemungkang gaid su Yunus kanu entu a pinggula nu Kadenan enggu lawan pan i kapegkalipunget'in. 2 Entu pan ka nangeni-ngeni sekanin kanu Kadenan a Mapulu sa nia nin pidtalu na “Hu Kadenan, entu ba i nadtalu ku kanu kinaganat ku lu sa dalepa ku. Entu ba i sabap'in i kinanggagan ku 'bpawang sa Tarsis ka katawan ku i seka na mataya ka kanu manga taw enggu sangat a malimu. Ugaid'a panun i kapedsabal'engka kanu manga kadupangan nu manga taw enggu ngintu ka natalatantu i ikalimu nengka silan enggu saben-sabenal i edsalin su itungan nengka sa kanilan asal bu na di silan masiksa. 3 Na kagina ka maitu Kadenan na nia ku pangenin na matebped den su napas ku sabap sa inikalimu nengka su manga kuntela nami. Nia ku temu i matay aku den kumin sa mauyag aku pan.”4 Nia inisawal'u Kadenan na “Ngintu, aden kawagib'engka ka 'gkalipunget ka?”
5 Na su kinapasad'u entu na linemu su Yunus kanu tampal sa sebangan nu inged. Minumbal sekanin sa pandung, na lu ba sinemilung ka 'bpagingapan nin i pakaidan nu Kadenan sa Ninibah. 6 Daka migkahanda su Kadenan sa pamulan asal bu na 'gkapia i 'gkasilungan nu Yunus ka pedtiakapan nin a benal. Na sangat a 'gkapia i 'gkanggiginawa nu Yunus kanu entu a pamulan. 7 Kanu 'gkatibuas kanu temundug a gay na sinugu nu Kadenan su uled sa pangebuten nin su pamulan, daka nalanes den mambu. 8 Ulian nu kinasebang'u senang na pinasambel'u Kadenan sa mayaw ebpun sa sebangan. Na su Yunus na pebpinsanen den na kayaw taman sa ginemalak den su ulu nin. Nia nin pan temu na matay den. Na pidtalu nin pan i “Nia ku temu i matay aku den kumin sa mauyag aku pan.”
9 Ugaid'a nia pidtalu nu Kadenan sa lekanin na “Ngintu, aden kawagib'engka ka 'gkalipunget ka pantag kanu pamulan a entu?”
Nia inisawal'u Yunus na “Aden kawagib ku a malipunget, na sangat a 'gkalipunget aku. Nia ku temu i matay aku!”
10 Daka pidtalu nu Kadenan sa lekanin i “Minetu su pamulan a entu kanu isa a magabi enggu minatay bun kanu temundug lun a gay. Na da nengka tiakapi enggu da nengka paetua ugaid'a nalat i ginawa nengka kanu entu a pamulan. 11 Saki na benal den a nalat i ginawa ku kanu manga taw sa Ninibah. Na nia ka pagitung na lu kanu entu a masela a inged na aden magatus enggu labi duapulu ngibu a manga wata i da sabut'in. Aden pan madakel a manga binatang.”
Nadtimu-timuan nu Binatia
Napasad'u den matia su Kitab'u Yunus. Na nia ba i balapantag a idsa: Ngin basi i kahanda nu Kadenan ka inipabatia nin sa lekitanu su nia ba a tudtulan?
Na sabap sa tudtulan a nia a ganat kanu kadtalu nu Kadenan na apia pantag bun kanu manga taw a nakadalung den, na aden bun guna-guna nin mambu kanu uman i isa sa lekitanu a makabatia lun kagina nia inipayag'u Kitab sia na su kapebpakaid'u Kadenan kanu manga taw a pedtaubat. Sabap sa di kabpaginugut'u Yunus kanu suguan nu Kadenan na aden kawagib'u Kadenan sa pamakaidanan nin taman sa matebped'in su napas'u Yunus. Ugaid'a nia nin kasabenalan na binatalu nin sa mapasang su Yunus ka inipalamed'in kanu masela a seda. Endaw i kinadtaubat'u Yunus kanu Kadenan na inampun nu Kadenan su dusa nin taman sa pinambalaumul'in. Daka sinugu menem sekanin nu Kadenan sa lemu sa Ninibah na naginugut mambu.
Na migkahanda su Kadenan sa lemu su Yunus sa Ninibah ka tutulun nin silan sa k…adtaubat enggu su ukit a kapalipuas'u Kadenan sa kanilan. Endaw i kinadtaubat'u langun nu manga taw lu na inampun mambu nu Kadenan su dusa nilan taman sa pinambalaumul'in silan. Na su Kadenan na sangat a malimu enggu mangampun kanu dusa nu manga baladusa amaika semalig silan sa lekanin enggu senep sa atay su kadtaubat'ilan lun.
Ngin i inipamandu nu Kadenan sa lekitanu? Sia kanu Kitab'u Yunus na nasabutan tanu i kabalapantag'u kadtaubat kanu manga dusa tanu. Endaw i kadtaubat'u manga baladusa na magedam'ilan su limu nu Kadenan, su limu a da tedtab'in. Ugaid'a entain kanu manga taw i di edtataubat na nawagiban sa siksan nu Kadenan. Benal i nia.
Namakalabi walu gatus lagun kanu kinaipus'u kinapatay nu Yunus na linabit'u Isa al-Masih su Yunus sia kanu kabpangusiat'in. Kanu entu ba a gay na madakel kanu manga taw i di 'bpaginugut sa ukit a kalipuas nia tabia na makailay sa kagaipan. Nakadalem kanu Kitab Injil na nia pidtalu nu Isa al-Masih, “Basaula den menem a manga taw i nia ka 'bpaginagkay silan sa kagaipan, ugaid'a dala amadan a makaenggay kanilan nia tabia na su tanda nu Yunus a nakadalung den saguna…Sabap sa tinaligkudan nu manga taw sa Ninibah su kapembaladusa nilan kanu gay a kinakineg'ilan kanu usiatan nu Yunus, na kanu gay a bangkiten den su dunia, na su manga taw nu Ninibah na embuat ka betadan nilan sa kawagib a isiksa kanu manga taw saguna. Saben-sabenal na aden sia pebpapayag a labi-labi pan i kabagel'in kanu manga kadtalu nu Yunus, ugaid'a di nu 'bpaginugutan!”
Na ngin basi i tanda nu Yunus a nakadalung den saguna ka linabit'u Isa al-Masih? Enggu ngin i inipayag'u Isa al-Masih ka nabaluy sekanin a labi-labi pan i kabagel'in kanu manga kadtalu nu Yunus? Enggu ngin basi i sabap'in ka di 'bpaginugutan nu manga taw? Na su manga ibpagidsa a nia na balapantag gaid. Matun tanu su manga sawal'u nia a sia nakadalem kanu Kitab Injil.
Wassalam