Su Mapia a Tutuma
a Inisulat'i Mataya
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Nia sinemulat kanu nia a kitab na su mama a bedtuan sa Mataya. Isa sekanin a 'bpangubela sa buwis a nabaluy a 'bpagunut kanu Isa al-Masih. Nia nin ped a ngala na si Libi. Lu sekanin pegkaleben sa Israil.
Su nia a kitab a inisulat'i Mataya na pantag kanu uyag-uyag'u Isa al-Masih. Balapantag su nia kagina masela a benal i makua tanu lun a guna-guna sia kanu uyag-uyag tanu asal'a kasabutan tanu su tidtu a lalan ibpawang kanu Kadenan.
Pidsinantal kanu nia a kitab su tarsilan kanu manga katupuan nu Isa al-Masih taman kanu langun nu napagukit-ukitan nin enggu pinggula nin sa timpu na kinandadangen nin sia sa dunia sampay den kanu kinambibiag'in 'bpaluman ulian nu kinapatay nin. Madakel bun i panduan enggu pakenalan a inipasampay nu Isa al-Masih kanu taw kanu nia a kitab, labi den su manga pakenalan pantag kanu kapendatu nu Kadenan.
Nakadalem bun kanu nia a kitab su manga naalung'u manga nabi pantag kanu inibpasad'u Kadenan a kauma nu Masih a tupu nu Nabi Daud a Sultan nu Israil. Na su langun nu naalung a nia pantag kanu Masih na sia pan i nia namakadalem kanu Danden a Kitab. Na pidsinantal kanu nia a kitab su kinatuman kanu inibpasad a entu nu Kadenan a sia nakanggulalan kanu sinugu nin a su Isa al-Masih. Nakadalem bun kanu nia a kitab su manga kabarakatan atawa ka kangagaipan a pinggula nu Isa al-Masih magidsan pan i kinapagkapia nin kanu manga taw a embalang-balang i sakit'in. Ugaid'a apia ka maitu i pinggula nu Isa al-Masih na madakel bun kanu manga pagidsan nin a manga Yahudi i dala talima sa lekanin, nia pan mula na pinakapasangan nilan pan sekanin taman sa initutuk'ilan kanu kayu a pinambalawaga ka enggu matay ugaid'a pinambibiag bun sekanin 'bpaluman kanu ikatelu nin gay ulian nu kinapatay nin. Mauli sa entu na inisugu nu Isa al-Masih su kapayapat kanu panduan nin asal'a katuntayan nu langun nu taw u ngin i tidtu a ukit sa kapaginugut kanu kadtalu nu Kadenan enggu entain i makalusud kanu kapendatu nu Kadenan.