Su Mapia a Tutuma
a Inisulat'i Markus
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Nia sinemulat kanu nia a kitab a sia nakanggulalan kanu kabarakat'u Kadenan na su mama a bedtuan sa Markus. Kanu kinasulat'in sa nia na kanu timpu a pedtala sa kamalasayan su 'bpamaginugut kanu Kadenan lu sa dalepa a Ruma. Nia nin kahanda kanu nia na makapagkabagel'in su manggiginawa enggu su salig'u 'bpamaginugut sia makanggulalan kanu kadsinantal'in kanilan kanu Mapia a Tutuma pantag kanu Isa al-Masih sia kanu nia a kitab.
Pidsinantal bun kanu nia a kitab su langun nu manga pinggalebek'u Isa al-Masih kanu sia pan sekanin sa liwawaw na dunia a mana su kinapamandu nin enggu su kinapangusiat'in kanu embala-bala a dalepa pantag kanu kapendatu nu Kadenan. Na nakadalem bun kanu nia a kitab su manga pinggalebek'u Isa al-Masih a manga kabarakatan, su kinapagkapia nin kanu manga sakiten enggu su manga inasukan na saitan taman den kanu kinapambibiag'in kanu minatay den. Nakalusud bun sia ba su kinapamili nu Isa al-Masih kanu sapulu enggu dua a masugu nin enggu madtagapeda nin sa kapangusiat enggu kapamandu pantag kanu tidtu a lalan ibpawang kanu Kadenan.
Nakadalem bun kanu nia a kitab su makapantag kanu napagukit-ukitan nu Isa al-Masih kanu sia pan sekanin sa dunia a mana su kinatala nin sa kamalasayan taman den kanu kinanggihad'in kanu umul'in asal'a malipuas su langun nu maginugut sa lekanin taman sa maampun su kadusan nilan. Nakalusud bun sia su kinapambibiag lun 'bpaluman taman den kanu kinapabpapulu lun lu sa sulega. Ipebpagilay bun kanu nia a kitab i su Isa al-Masih na saben-sabenal a sekanin su Tunggal'u Kadenan a pinadtaya.