Su Mapia a Tutuma
a Inisulat'i Markus
Su Kinapangusiat'u Yahiya pantag kanu Kaadil kanu Atay nu Taw sa Kauma nu Masih
1
Na su ludsuan nu Mapia a Tutuma makapantag kanu Isa al-Masih a Tunggal'u Kadenan 2 na mana su nakadalem kanu Kitab a Inisulat'u Nabi Isayas a“Ilay ka! Paunan ku sa leka su pedsugun ku
ka enggu nin mapagadil su lalan nengka
3 na nia nin ibpananawag sa matanug
lu kanu tawan-tawan a dalepa na
‘Pagadil'u su lalan a 'bpagukitan nu Mapulu!
Pakatidtu nu su entu a 'bpagukitan nin!’ ”a
4 Na su Yahiyab na nakauma lu kanu tawan-tawan a dalepa a nanalawat sekanin lu. Na nia nin ibpangusiat na kapasalawat sa tanda na kadtaubat asal'a maampun su kadusan. 5 Na timbang a langun nu taw sa Awrusalim taman den kanu langun nu ped pan a manga dalepa sa Yudia na linemu kanu Yahiya. Inipangumpaya nilan su manga kabaladusan nilan entu pan ka sinalawatan silan nu Yahiya lu kanu lawas'a ig'u Jordan.
6 Na su Yahiya na nia nin pinangan na tapudi enggu teneb. Mimbalegkas sekanin sa bumbul a ebpun sa bumbul'a unta enggu midsabitan sa upis'a binatang. 7 Na nia nin ibpangusiat na “Aden pakatundug sa laki a labi lawan pan kumin sa laki ka apia su kabekal ku kanu iket'u ampis'u ay nin na di aku makadait. 8 Na saki na pedsalawatan ku sekanu sa ig ugaid'a sekanin na salawatan kanu nin kanu Suti a Ruh.”
Su Kinasalawat kanu Isa al-Masih enggu su Kinabatalu sa lekanin
9 Na kanu entu ba a manga timpu na nakauma su Isa al-Masih ebpun sa dalepa a Nasarit a sakup'u prubinsia a Galili. Daka sinalawatan sekanin nu Yahiya lu kanu lawas'a ig'u Jordan. 10 Na endaw demun i kinambuat'in kanu ig na nailay nin i mimbuka su langit enggu nangalimbaba lu sa lekanin su Ruh a linemagid sa malapati. 11 Daka aden mambu suala a ebpun sa sulega a nia nin kadtalu na “Seka su Tunggal a wata ku a pinadtaya. Sangat a 'gkasuat aku sa leka.” 12 Na kanu entu demun ba na pinananggit sekanin nu Ruh kanu tawan-tawan a dalepa. 13 Na nakapatpulu gay na lu bu ba su Isa al-Masih kanu tawan-tawan a dalepa a pedsasaten nu Datu na Giadsal.c Na aden bun lu ba manga talaw a binatang. Ugaid'a tiniakapan sekanin lu nu manga malaikat.d
Su Muna-muna demun a Napamili a Mabaluy a Makaunut kanu Isa al-Masih
14 Na ulian nu kinabilanggu kanu Yahiya na linemu su Isa al-Masih sa Galili ka inipangusiat'in su Mapia a Tutuma ebpun kanu Kadenan 15 sa nia nin pedtalun na “Nauma den ba a nia su kutika a inadil'u Kadenan, na su kandatu nin na ipailay nin den. Edtaubat kanu den enggu paginuguti nu su Mapia a Tutuma.”
16 Na kanu kabpagukit'u Isa al-Masih lu kanu ligid'u lanaw nu Galili na nailay nin su edsuled a si Simiun enggu si Anduk a 'bpamiala ka entu ba su pantialian nilan na kapamiala sa seda. 17 Na nia pidtalu nu Isa al-Masih kanilan na “Sia kanu ka unut kanu sa laki ka baluyn ku sekanu a mamiala sa taw a mana bun su kabpamiala nu sa seda.” 18 Na entu demun ba na tinagak'ilan su manga biala nilan ka minunut silan kanu Isa al-Masih. 19 Na da pamun gaid silan makatangka na nailay menem'u Isa al-Masih si Yakub enggu si Yuhan a manga wata ni Zabidi a pengguguden nilan su manga biala nilan lu kanu awang. 20 Na kanu entu demun ba na inenggat silan nu Isa al-Masih sa kaunut'ilan sa lekanin. Na guna su maitu na tinagak'ilan su ama nilan apeg'u manga panunugun nilan lu kanu awang ka minunut silan sa lekanin.
Su Kinapamugaw nu Isa al-Masih kanu manga Saitan
21 Na linemu silan sa dalepa a Kapurnaum. Na guna mauma su Gay nu Kabpangintelenene na linemudep su Isa al-Masih lu kanu pedsambayangan nu manga Yahudi ka nangusiat lu. 22 Na sangat a nangagaipan nu manga taw su kinapamandu nin a entu kagina 'bpamandu sekanin a mana aden kawagib'in a dikena mana kanu manga gulu nu pangitaban. 23 Na aden mama lu kanu entu a pedsambayangan a inasukan na saitan a nakatekaw nin demun inilalis i 24 “Seka Isa a taw sa Nasarit, di kami nengka den 'bpelusudi. Nginan, sinemia ka asal'a mabinasa kami nengka? Katawan ku man seka, seka su Suti a ebpun kanu Kadenan.” 25 Daka pidtaluan sekanin nu Isa al-Masih sa “Telen ka san! Awai ka i mama a nan.” 26 Na kanu entu demun ba na sinaing'u saitan su mama taman sa nakalalis sa matanug entu pan ka ginanatan nin. 27 Na sangat a nangagaip su langun nu taw lu taman sa nakapamagidsaya silan sa “Ngin i nia, nakabagu a kabpamandu i nia? Ka 'bpamandu sekanin sa aden kawagib'in. Na apia su manga saitan na 'bpaginugut sa lekanin amaika sugun nin.” 28 Na kanu entu demun ba na nakapayapat kanu langun nu dalepa sa Galili su makapantag kanu Isa al-Masih.
Su Kinapagkapia nu Isa al-Masih kanu Madakel a 'Bpamedsakit
29 Na endaw i kinaliu nu Isa al-Masih kanu pedsambayangan a entu na lu silan tinemalus kanu walay ni Simiun enggu Anduk kaped'ilan bun si Yakub enggu Yuhan. 30 Na kanu entu ba mambu na 'bpagiga bu su panugangan ni Simiun a babay ka pegkayaw a benal. Daka pinamagayasan nilan edtalu kanu Isa al-Masih su entu. 31 Na linulud'u Isa al-Masih su babay ka kinawa nin su lima nin ka pinambangun nin. Na kanu entu demun ba na naawa su mayaw nu babay taman sa tinalagadan nin pan silan.
32 Na kanu kinasedep'u senang, endaw demun i kinadsukilep na madakel i pinananggit sa lekanin a manga pendalu enggu manga inasukan na saitan 33 taman sa timbang a langun nu taw kanu dalepa a entu na 'gkangalimud den lu kanu kasangulan nu walay. 34 Na madakel a manga taw i embalang-balang den i sakit'in i pinagkapia nin enggu namugaw bun sekanin sa manga saitan kanu manga taw. Na dala nin suguti a makadtalu pan su manga saitan a entu kagina katawan nilan u entain sekanin.
Su Kinasuti nu Isa al-Masih kanu Taw a Haram
35 Na kanu 'gkatibuas na mimbangun su Isa al-Masih ka linemu sa nakadtawan-tawan a dalepa ka nangeni-ngeni sekanin. 36 Na pinangilay sekanin ni Simiun enggu su manga ped pan a tagapeda nin. 37 Na guna nilan matun na nia nilan pidtalu sa lekanin na “Langun na taw sia na 'bpangilay den sa leka.” 38 Daka nia pidtalu nu Isa al-Masih kanilan na “Lemu tanu kanu embala-bala pan a dalepa ka enggu aku makapangusiat bun lu ba ka nia ba i sabapan na kinasia ku.” 39 Na tinaneb'in den su lusud'u prubinsia a Galili ka nangusiat lu kanu manga pedsambayangan nu manga Yahudi enggu namugaw bun sekanin sa manga saitan.
40 Na aden mama a pedsakit sa debpig, na sinemupeg kanu Isa al-Masih ka midtinggaleb lu kanu kasangulan nin ka napakalimu-limu sa “Amaika miug ka na makapagkapiaf aku nengka.” 41 Na nalat i nanam'in kanu mama a entu daka inami nin sa nia nin pidtalu lun na “Pegkiug aku, 'gkapia ka den saguna.” 42 Na midsambuta demun i kinaawa nu sakit'in taman sa migkapia sekanin. 43 Daka pinaganat'u Isa al-Masih su mama a entu. Na inibpaliugat'in 44 edtalu sa lekanin i “Ingati ka a benal i madtalu nengka i nia kanu apia entain ugaid'a ganat ka, ka pailay ka kanu 'bpangurban enggu 'gkurbang ka a mana bun su inisugu nu Nabi Musa asal'a mailay nu manga taw i nasuti ka den.”
45 Na ginemanat den mambu su mama a entu ugaid'a pidtalu nin bun mamikal su makapantag kanu nanggula nin taman sa nakapayapat su tudtulan a entu. Na sabap sa entu na di den makambaya-baya su Isa al-Masih sa kaludep'in kanu manga inged ka lu bun den sekanin pakambaya-baya kanu manga nakadtawan-tawan a dalepa. Na apia ka maitu na pebpawangan bun sekanin nu madakel a benal a manga taw a lu ebpun kanu embala-bala a inged.