Su Kinasasat kanu Isa al-Masih
4
Na su Isa al-Masih na linangkapan den nu Suti a Ruh. Na kanu kabpaguli nin ebpun kanu lawas'a ig'u Jordan na pinananggit sekanin nu Suti a Ruh lu kanu tawan-tawan a dalepa. 2 Na nakapatpulu gay na pedsasaten bu sekanin lu nu Datu na Giadsal.a Na kanu dalem'u patpulu gay na mibpuasa bu sekanin tembu nagutem a benal kanu kinaipus'u entu.3 Na nia pidtalu nu Datu na Giadsal sa lekanin na “Amaika seka su Tunggal'u Kadenan na edtalu ka kanu watu a nan i embaluy a pan.” 4 Ugaid'a nia inisumpat'u Isa al-Masih na “Nia man nakadalem kanu kitab na ‘Dikena bu man sia mauyag i taw kanu kakan nin sa pegken.’b”
5 Na pinananggit menem sekanin nu Datu na Giadsal lu kanu malambeg a benal a palaw ka inipailay nin lun sa sakelap bu su langun nu pendatuan sia sa liwawaw na dunia. 6 Nia pidtalu nu Datu na Giadsal sa lekanin na “Inggay ku sa leka su bagel'ilan sa kakamal enggu su kakawasan nilan ka inisalig bu i nia sa laki enggu mapakay a inggay ku kanu apia entain a mapamili ku. 7 U simban aku nengka na inggay ku sa leka su langun nu entu.” 8 Na nia menem inisumpat'u Isa al-Masih na “Nia nakadalem kanu kitab na ‘Nia ka bu simba na su Kadenan a Mapulu sa sekanin bu i paginugutan nengka.’c”
9 Guna su maitu na inialat menem sekanin nu Datu na Giadsal lu kanu puntiuk'u Suti a 'Bpagagaman lu sa Awrusalim. Na nia nin menem pidtalu na “Amaika seka su Tunggal'u Kadenan na tibpu ka san! 10 Kagina nia man nakasulat kanu kitab na ‘Sugun nu Kadenan su manga malaikat'in sa katiakap'ilan sa leka.’ 11 Nakasulat bun i ‘Sapipin ka nilan ka enggu di kagkaidan su manga ay nengka lu kanu manga watu.’d” 12 Nia menem pidtalu nu Isa al-Masih na “Nia nakasulat kanu kitab na ‘Di ka man pembatalua su Kadenan a Mapulu.’e”
13 Na guna mapasad'u Datu na Giadsal su kapedsasat'in kanu Isa al-Masih na tinagak'in gagalu ka nangilay menem sa ped a ukit.
Su Kinaludsu Mangusiat'u Isa al-Masih
14 Na minuli den su Isa al-Masih lu sa Galili a lu sa lekanin su kabarakat'u Suti a Ruh. Na nakalapat den kanu embala-bala a dalepa su makapantag sa lekanin. 15 Na nangusiat sekanin lu kanu manga walay a pedsambayangan nu manga Yahudi enggu pinugi sekanin nu langun nu manga taw lu.
Su Kinakias kanu Isa al-Masih kanu Dalepa nin demun a Nasarit
16 Na guna su linemu su Isa al-Masih kanu dalepa a Nasarit a pigkaselanan nin na minangay sekanin lu kanu walay a pedsambayangan nu manga Yahudi. Na mana bun su katatapan a penggulan nin kanu Gay nu Kabpangintelenen na linemu sa kasangulan ka matia sekanin sa kitab. 17 Na inidual'ilan sa lekanin su Kitab a Inisulat'u Nabi Isayas. Na binelat'in ka binatia nin su nakadalem lun a
18 “Linangkapan aku den nu Ruh nu Kadenan,f
ka sinanganan aku nin sa kapayapat kanu Mapia a Tutuma lu kanu manga miskinan.
Na sinugu aku nin sia ka enggu ku makapayag kanu manga nasigkem i kambaya-baya nilan
enggu su di pamakailay na mamakailay den silan,
taman kanu manga papegkapasangan na makambaya-baya den silan.
19 Na sinugu aku nin bun ka enggu ku makapayag su kauma nu kutika nu kabpamelipuas'u Kadenan.”g
20 Na guna mapasad matia nu Isa al-Masih su entu a kitab na linulun nin menem ka inimbalingan nin kanu pedtuganul lun ka minayan, saleta na su langun nu manga taw lu kanu pedsambayangan na pedtulik sa lekanin. 21 Na linemudsu sekanin edtalu sa “Saguna na natuman den su nakineg'u a entu a manga ayatan sa kanu nia bun ba a kutika.”
22 Na pinugi sekanin nu langun nu manga taw lu enggu nagaipan nilan ka mapia gaid i kadtalu-talu nin. Na nia nilan 'gkangadtalu na “Dikena ba sekanin su wata nu Yusup?”
23 Guna su maitu na pidtalu nu Isa al-Masih kanilan i “'Gkatalanged ku i edtalun nu sa laki su nia a palibasan a ‘Taligamut, gamuti ka muna i ginawa nengka!’ Na edtalu nu bun i ‘Enggalebek ka sia kanu dalepa a pigkaselanan nengka su 'gkangakineg'ami a pinggalebek'engka sa Kapurnaum.’
24 “Saben-sabenal a edtalun ku sa lekanu i dala nabi a pedtaliman kanu dalepa nin demun. 25 Nia nu 'gkakalendem na su timpu nu Nabi Ilias a dala kaulan sa nakatelu lagun enggu tenga na madakel a balu a babay kanu dalepa tanu a Israil i sangat a minggutem. 26 Ugaid'a dala sugua nu Kadenan su Nabi Ilias sa kadtabang'in kanu apia entain kanilan, ka lu nin bu sinugu kanu balu a babay a dikena-Yahudi sa dalepa a Saripta a sakup'u Sidun. 27 Na kanu timpu bun nu Nabi Aliasa na madakel bun gaid a taw i midsakit sa debpig sia sa Israil. Na apia sakataw na dala pinagkapia lun nia tabia na su mama a bedtuan sa Naaman a taw sa Syria.”
28 Na guna makineg i entu nu manga taw lu kanu pedsambayangan na sangat a nalipunget silan 29 taman sa midtindeg silan ka ginuyud'ilan su Isa al-Masih lu kanu ligid'u baugan nu bakulud kanu entu bun ba a dalepa ka ibpagulug'ilan lu ba. 30 Ugaid'a minawa sekanin a lu demun linemakaw kanu pageletan nilan.
Su Kinabugaw kanu manga Saitan
31 Na linemu menem su Isa al-Masih kanu dalepa a Kapurnaum a sakup'u Galili ka nangusiat sekanin kanu manga taw sa kanu Gay nu Kabpangintelenen. 32 Na nagaipan nu manga taw su kabpamandu nin ka 'bpamandu sekanin sa mana aden kawagib'in. 33 Saleta mambu na lu kanu pedsambayangan a entu nu manga Yahudi na aden lu ba mama a inasukan na saitan. Na linemalis sa matanug sa 34 “Huy, seka Isa a taw sa Nasarit, di kami nengka den 'bpelusudi. Nginan, sinemia ka asal'a mabinasa kami nengka? Katawan ku man seka, seka su Suti a ebpun kanu Kadenan.” 35 Daka pidtaluan sekanin nu Isa al-Masih sa “Telen ka san! Awai ka i mama a nan.” Na inilebpad demadsang'u saitan su mama lu kanu adapan nilan entu pan ka inawan nin a dala nin bun kapamungkaidi.
36 Na sangat a nangagaip su langun nu taw lu sa nia nadtalu nu uman i isa kanu ped'in na “Sangat i kabarakat'u kadtalu nu mama a nia ka pedtaluan nin bu sa mawa su manga saitan na 'bpagawa den silan.” 37 Na pakapayapat bun kanu embala-bala a dalepa su makapantag kanu Isa al-Masih.
Su Kinapagkapia nu Isa al-Masih kanu manga Pedsakit
38 Na ginemanat menem su Isa al-Masih lu kanu pedsambayangan nu manga Yahudi ka tinemalus sekanin lu kanu walay ni Simiun.h Na kanu entu ba mambu a timpu na pegkayaw a benal su panugangan ni Simiun a babay. Na pinangeni nilan kanu Isa al-Masih i pagkapia nin. 39 Daka inubay nu Isa al-Masih su babay ka pidtaluan nin su mayaw sa mawa. Daka midsambuta demun i kinaawa nu mayaw kanu babay taman sa nakambangun sekanin. Na tinalagadan nin pan silan.
40 Na guna su sinemedep den su senang na langun nu aden pan sakit'in na pinananggit lu sa lekanin. Na dinapenetan nin su uman i isa kanilan ka pinagkapia nin. 41 Na maitu bun ba su manga saitan na pinaawa nin silan kanu inasukan nilan sa nia nilan pakalalis na “Seka su Tunggal'u Kadenan!” Na sinapalan nu Isa al-Masih su manga saitan sa di den silan edtalu kagina 'gkatawan nu manga saitan i sekanin su Masih.
42 Na guna su pegkatibuas den na linemu su Isa al-Masih kanu nakadtawan-tawan a dalepa. Na pinangilay sekanin nu madakel a taw. Na guna nilan matun na pinamagayukan nilan sa di pan sekanin gemanat lu. 43 Ugaid'a nia nin pidtalu kanilan na “Nakabpaliugat sa laki i makapangusiat ku kanu ped pan a dalepa su Mapia a Tutuma pantag kanu kapendatu nu Kadenan ka nia ba i sinuguan sa laki.” 44 Na nangusiat sekanin lu kanu manga walay a pedsambayangan nu manga Yahudi sa Yudia.