Su Mapia a Tutuma
a Inisulat'i Yuhan
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Na nia sinemulat kanu nia a kitab na su mama a bedtuan sa Yuhan. Isa sekanin kanu napamili nu Isa al-Masih a makaunut lun kanu langun nu galebekan nin. Na nia kahanda kanu kinasulat sa nia na papedtuntayan nu Kadenan kanu uman i isa u entain su Isa al-Masih, na saben-sabenal a sekanin su Masih a 'bpamelipuas enggu sekanin su Tunggal'u Kadenan a pinadtaya. Papedsabutan bun sia ba i saben-sabenal a su Isa al-Masih su Kalimatul Allah a mimbalagapa asal'a su langun a taw na katuntayan nilan su kabantang pantag kanu Kadenan taman kanu kahanda nin. Na nia ba i kahanda nu Kadenan kanu kinasugu nin kanu Isa al-Masih sia sa dunia na inggihad'in su umul'in asal'a su entain i semalig sa lekanin na malipuas kanu kadusan nilan taman sa kaadenan na uyag-uyag a da taman nin.
Nakadalem bun sia kanu nia a kitab su kinapayag'u Nabi Yahiya a Nanalawat pantag kanu Isa al-Masih. Na mabatia tanu bun sia ba su makapantag kanu manga pinggalebek'u Isa al-Masih kanu sia pan sekanin kanu dunia a mana su kinapagkapia nin kanu mama a di pakalakaw enggu su mama a di pakailay taman den kanu kinapambibiag'in 'bpaluman kanu mama a bedtuan sa Lasaru enggu su ped pan a pinggula nin a kabarakatan. Na su langun nu nia ba a kangagaipan a tanda a pinggula nu Isa al-Masih na pebpagilay den i entu sa saben-sabenal a sekanin su Tunggal'u Kadenan a sinugu nin sia sa dunia.
Nakadalem bun sia ba su makapantag kanu kinanggihad'u Isa al-Masih kanu umul'in taman kanu kinapambibiag lun 'bpaluman enggu su kinabpapayag'in kanu manga pinamili nin a 'bpamangunut lun ulian nu kinapambibiag lun 'bpaluman.