Su Mapia a Tutuma
a Inisulat'i Luk
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Na nia sinemulat kanu nia a kitab na su mama a bedtuan sa Luk a lu sekanin pegkaleben sa bangsa nu manga Yahudi ugaid'a dikena sekanin Yahudi. Si Luk na masela i nasabutan nin a taw enggu duktur sekanin. Na masela bun i salig'in kanu Kadenan ka kinakineg'in bu kanu manga usiatan pantag kanu Isa al-Masih na naginugut den sekanin. Ininggihad'in den su ginawa nin kanu kinalalakaw nin kanu manga dalepa ka inipangusiat'in su kahanda nu Kadenan a nakapayag'u Isa al-Masih.
Su nia a sulat na lu pakatumpa kanu mama a bedtuan sa Tiupilus ugaid'a di tanu katawan u ngin a taw sekanin ugaid'a su ngala a Tiupilus na nia nin maena sa basa a Grik na “Pinadtaya nu Kadenan.” Basi su nia a taw na isa sekanin a masela i 'gkagaga nin kanu bangsa nu manga taw a Grik atawa ka dikena-Yahudi.
Na nia kahanda ni Luk sa kinasulat'in sa nia na asal'a katuntayan nu langun nu taw i su Isa na Masih a pinamili nu Kadenan a makapatidtu kanu langun nu taw a pamakasibay taman sa maaun su taw kanu manga kabaladusan nilan. Papedtuntayan nin bun i dikena nia bu sabap a kinasia nu Masih i nia nin bu pedtabangan su manga bangsa nin a Yahudi ka apeg den nu langun nu manga taw sia sa liwawaw na dunia. Pidsinantal bun ni Luk sia u panun i kinapagkapia nu Isa al-Masih kanu manga pendalu enggu su kinatabang'in kanu manga 'gkapasangan labi-labi den su manga dikena balaagama a pakanasisita.
Nakadalem bun kanu nia a sulat su pantag kanu manga kagaipan a pinggalebek'u Isa al-Masih a mana su makagaip a kinagemaw nin enggu su manga pinggula nin sia sa liwawaw na dunia enggu labi pan a masela a nagaipan su kinambibiag'in 'bpaluman.