Su Mapia a Tutuma
a Inisulat'i Luk
1
1-3 Assalamu Alaikum sa leka mapulu a Tiupilus. Na madakel den i sinemulat sa endaw taman i kategel'ilan kanu manga nanganggula kanu timpu nami. Inisulat'ilan su ngin i nakapamandu sa lekami nu manga nakadsaksi kanu nia ba sa iganat sa ganatan enggu nangusiat makapantag kanu kadtalu nu Kadenan. Na kagina ka napangagian ku sa mapia su nia iganat sa ludsuan nin na napagitung ku i basi mapia u isulat ku bun sa padtundug-tundugen ku sa mapia 4 ka enggu nengka masigulu i benal su langun nu inipamandu sa leka.Su Kinapayag'u Malaikat pantag kanu Kambata kanu Nabi Yahiya a 'Bpanalawat
5 Na kanu timpu a nia pan pendatu na su Datu Hiruda kanu prubinsia a Yudia na aden 'bpangurban lu a nia nin ngala na si Sakarias a kaped kanu lumpukan nu 'bpamangurban a bedtuan sa Abiya. Nia nin kaluma na si Ilisabit a tupu bun nu Nabi Harun.b 6 Na su dua kataw a nia na ikelas i atay nin enggu ipenggulalan nilan sa dala kulang'in su manga kasuguan nu Kadenan enggu su manga atulan nin. 7 Ugaid'a dala wata nilan kagina di embata si Ilisabit, saleta na matua den silan.
8 Aden isa a gay a nia nasaligan a enggalebek lu kanu Suti a 'Bpagagaman na su lumpukan nu 'bpamangurban a lu ba nalusud si Sakarias. 9 Na sia luyud kanu adat-betad'u manga 'bpangurban na si Sakarias i napamili a temutung kanu tutungen a mamut lu kanu ludep'u Suti a 'Bpagagaman kanu Kadenan. 10 Na gagalu na kapedtutung'in kanu tutungen a mamut na su madakel a taw lu sa liu na 'bpangeni-ngeni.
11 Daka aden malaikat'u Kadenan a mibpayag kani Sakarias a lu midtindeg kanu tampal sa kawanan nu tudtugan. 12 Na guna mailay ni Sakarias su malaikat'u Kadenan na nakakedu enggu naawan na makatu sa kinagilek'in. 13 Ugaid'a nia pidtalu nu malaikat na “Da ka 'gkagilek Sakarias, natalima nu Kadenan su pinangeni-ngeni nengka. Na su kaluma nengka a si Ilisabit na kaadenan na wata a mama, na nia nengka lun ibedtu na Yahiya. 14 Na amaika mambata den sekanin na sangat a magalaw ka, enggu madakel i mapia i ginawa nin lun 15 ka mabaluy sekanin a badtug a mama lu kanu adapan nu Kadenan. Na di sekanin manginem sa apia ngin a makalangut. Na sia pan sekanin kanu didalem'u tian nu ina nin na langkapan den sekanin nu Suti a Ruh. 16 Na madakel kanu manga tupu nu Israil i makapambalingan nin kanu Kadenan nilan a Mapulu. 17 Makauna sekanin kanu Mapulu nin. Na lu sa lekanin su ula-ula enggu bagel'u Nabi Ilias ka enggu nin makapambalingan su kapamagayun nu embabatay. Makapatidtu nin bun su manga pedsungkang a manga taw sa mabaluy den a ikelas su manga atay nilan. Na kanu maya ba a ukit na maadil'in su madakel a taw kanu kapegkauma nu Mapulu.”
18 Na inidsa ni Sakarias kanu malaikat i “Panun i kataw ku lun i manggula su nia? Kagina saki na matua aku den enggu su kaluma ku.” 19 Na nia inisawal'u malaikat na “Saki su Giabrail a tatap tapid'u Kadenan. Sekanin mismu i sinemugu sa laki sa kapayag ku sa leka sa kanu mapia a nia a katigan. 20 Ugaid'a kagina ka da nengka paginuguti su nia ba a katigan na maawa sa leka su suala nengka taman kanu katuman kanu nia ba sia kanu kutika a inadil'in.”
21 Na saleta mambu na 'bpagangatan nu madakel a taw si Sakarias. Na 'gkangagaip silan ka nauget gaid sekanin lu sa ludep'u Suti a 'Bpagagaman. 22 Guna su nakaliu den sekanin na di nin den pakambitiala su manga taw ka di den sekanin pakadtalu, penggulinganan nin bun den silan. Na natagu den sa ginawa nilan i nakailay sekanin sa kabarakatan lu kanu ludep'u Suti a 'Bpagagaman.
23 Guna su napasad'in su galebek'in lu kanu Suti a 'Bpagagaman na minuli sekanin. 24 Da gaid mauget ulian nu entu na migkagingay su kaluma nin a si Ilisabit taman sa namakalima ulan na da den endaliu si Ilisabit. Nia pidtalu ni Ilisabit na 25 “Sangat a inikalimu aku nu Kadenan ka iniawa nin su kayayan ku sabap kanu di ku kapegkagingay.”
Su Kinapayag'u Malaikat pantag kanu Kambata kanu Isa al-Masih
26 Kanu ikanem ulan nu kagingay ni Ilisabit na sinugu nu Kadenan su malaikat'in a su Giabrail lu kanu dalepa a bedtuan sa Nasarit a sakup'u Galili, 27 lu kanu laga a bedtuan sa Mariamc a 'gkagkaluma nu mama a bedtuan sa Yusup a tupu nu Nabi Daud. 28 Na minubay den su malaikat kani Mariam ka pidtalu nin i “Salam sa leka, babay a pinalihalan, pedtapiden ka nu Kadenan.” 29 Na sangat a nabulibug i ginawa nu Mariam kanu entu a katigan nu malaikat enggu 'bpagitungen nin a benal u ngin i maena nu entu. 30 Daka nia pidtalu nu malaikat kani Mariam na “Da ka 'gkagilek Mariam, pinalihalan ka nu Kadenan! 31 Ilay ka, 'gkagingay ka taman sa makambata ka sa wata a mama. Na nia nengka lun ibedtu na Isa.d 32 Mabadtug sekanin taman sa sekanin ba i kagelalan sa Tunggal'u Kadenan a Mapulu sa Langun. Na sekanin i papagagayanen nu Kadenan a Mapulu kanu kulesi nu kaapuan nin a su Daud. 33 Na endatu sekanin kanu manga tupu nu Yakub taman sa taman enggu di mapupus su kandatu nin.”
34 Daka nia pidtalu ni Mariam kanu malaikat na “Panun i kanggula sa entu sa laga aku pamun?” 35 Na nia inisawal'u malaikat na “Su Suti a Ruh nu Kadenan a Mapulu sa Langun na lemangkap sa leka enggu su kabarakat'in i semukub sa leka tembu ba su nia a wata na kagelalan sa Suti enggu Tunggal'u Kadenan. 36 Na 'gkakalendem ka su pagali nengka a si Ilisabit a di embata. Saguna na magingay den sekanin sa namakanem ulan den sa apia matua den. 37 Saben-sabenal a dala man di magaga nu Kadenan.” 38 Na nia pidtalu ni Mariam na “Adidi na ulipen aku bu mambu nu Kadenan. Na nia ku kalilinian na matuman su pidtalu nengka sa laki.” Daka minawa den su malaikat.
Su Kinakakap'u Siti Mariam kani Ilisabit
39-40 Na da matana-tana na nagadil si Mariam ka minggagan lemu kanu pegkalebenan ni Sakarias lu kanu manga bakulud'u Yudia ka kinakap'in si Ilisabit. 41 Na endaw i kinakineg'i Ilisabit kanu salam'i Mariam na mimbagkuas su kagingay nin enggu linemangkap sa lekanin su Suti a Ruh. 42 Daka nia nadtalu ni Ilisabit sa matanug na “Da pagidsan nengka a babay ka sangat a pinalihalan ka nu Kadenan enggu su wata a embatan nengka. 43 Sangat a inikalimu aku ka kinakap aku nu ina nu Mapulu ku. 44 Na endaw demun i kinakineg ku kanu salam'engka na mimbagkuas su wata kanu didalem'u tian ku sa kinagalaw nin. 45 Na ngin den i kapia nin sa leka ka naginugut ka sa tumanen nu Kadenan su ngin i pidtalu nin sa leka.”
Su Kinapugi nu Siti Mariam kanu Kadenan
46 Na nia pidtalu ni Mariam na
“Pebpugin ku su Kadenan.
47 Na sangat a 'gkapia i ginawa ku kanu Kadenan a 'bpelipuas sa laki.
48 Ka inipamamantag aku nin a ulipen nin a da 'gkagaga nin a taw. Na iganat saguna taman sa taman na nia den itawag sa laki na pinalihalan a babay
49 sabap kanu sangat a kagaipan a pinggula sa laki nu Kadenan a Barakat. Na sangat man a suti su ngala nin.
50 Iganat sa kanu nangauna a katupuan taman den kanu mamakatundug pan na ipebpagilay nin den su limu nin kanu apia entain a magilek sa lekanin.
51 Pinggalebek'in su manga kabarakatan sia nakanggulalan kanu kapegkagaga nin. Initagayak'in mapaawa su langun nu masandag a taw.
52 Inawan nin sa kadatu su manga pamakagaga enggu inipulu nin su manga taw a da 'gkagaga nin.
53 Na pinambabalidseki nin su manga taw a penggutem enggu inilusak'in su manga kawasa taman sa pinaawa nin.
54 Tinabangan nin su manga ulipen nin a manga taw a Israil ka di nin 'gkalipatanan su lat a nanam'in kanilan
55 a mana bun su inibpasad'in kanu kaapuan tanu a su Ibrahim taman kanu manga tupu nin taman sa taman.”
56 Na midtangen pan su Mariam sa namakatelu ulan lu kani Ilisabit entu pan ka minuli.
Su Kinambata kanu Nabi Yahiya a 'Bpanalawat
57 Na nauma den su kutika a kagemaw nu wata ni Ilisabit. Na nia nin nambata na wata a mama. 58 Na guna makineg'u manga pagubay nin enggu su manga pagali nin su entu a kinakalimu lun nu Kadenan na langun nilan na sangat a nangagalaw bun sa lekanin.
59 Guna su nakawalu gay den su kinagemaw nu wata na namedtalabuk su manga pagali nin enggu su manga pagubay nin sa kanu kapebpaletake kanu wata sia kanu adat-betad'ilan. Na nia nilan kiug na isangay kanu ama nin a si Sakarias. 60 Ugaid'a nia pidtalu nu ina nin na “Di mapakay, ka nia ipapenggungala lun na Yahiya.” 61 Na nia nilan pidtalu kani Ilisabit na “Mana dala isa kanu manga pagali nengka i aden mamba i ngala nin.”
62 Na pinggulinganan nilan si Sakarias ka ibpagidsa nilan lun u ngin i ibedtu nin kanu wata nin. 63 Na nangeni si Sakarias sa kasulatan nin ka inisulat'in i “Nia lun ipapenggungala na Yahiya.” Na sangat a nangagaip silan langun. 64 Na kanu entu bun ba na nakadtalu menem 'bpaluman si Sakarias taman sa pinugi nin su Kadenan. 65 Na naadenan na gilek su manga pagubay nilan taman sa nakapayapat den su entu a nanggula kanu embala-bala a dalepa kanu manga bakulud'u Yudia. 66 Na apia entain i pakakineg kanu entu ba na 'bpamikilen nilan a benal taman sa nia nilan pakaidsa kanu ginawa nilan na “Ngin basi i embaluyan nu entu a wata?” Ka mapayag man a benal i pedtapiden sekanin nu Kadenan.
Su Kinapugi nu Sakarias kanu Kadenan
67 Na linangkapan nu Suti a Ruh su ama ni Yahiya a si Sakarias taman sa nakapayag sekanin sa kadtalu nu Kadenan a
68 “Pugin tanu su Kadenan a Mapulu nu manga taw a Israil
ka tinabangan nin enggu inilipuas'in su manga taw nin.
69 Pinagadilan tanu nin sa mabagel a 'bpamelipuas
a ebpun kanu tupu nu panunugun nin a su Daud
70 a mana bun su inibpasad'in kanu nauget den sia nakanggulalan kanu manga suti nin a nabi
71 sa ilipuas tanu nin kanu manga kuntela tanu
enggu kanu bagel'u 'gkangabensi sa lekitanu.
72 Na inipaamad'in den su limu nin kanu manga kalukesan tanu
ka di nin man 'gkalipatanan su suti a kapasadan nin
73 a inibpasad'in kanu katupuan tanu a su Ibrahim sa
74 ilipuas tanu nin kanu bagel'u manga kuntela tanu
asal'a masimba tanu sekanin sa dikena tanu den 'gkagilekan,
75 ikelas enggu suti tanu sia kanu adapan nu Kadenan taman sa bibiag tanu pan.
76 Seka menem wata ku, na tawagen ka sa nabi nu Kadenan a Mapulu sa Langun
ka paunan ka kanu Mapulu, ka enggu nengka mapagadil su lalan a 'bpagukitan nin.
77 Kapatuntayan nengka kanu manga taw nin su kalipuasan
sia makanggulalan kanu kaampun kanu kabaladusan nilan
78 ka su Kadenan tanu na sangat man a malimu.
Na su kauma nu kalipuasan na mana su kapedsebang'u senang
79 ka enggu katayawan su manga taw a sia naluyud kanu kalibutengan enggu magilek sa kapatay
enggu mapatuntul sa lekitanu su lalan sia kanu kalilintad.”
80 Na su wata a entu ni Sakarias na migkasela a mabagel i tindeg'in. Na guna su migkasela den sekanin na lu sekanin migkakaleben kanu nakadtawan-tawan a dalepa taman kanu gay a kinabpapayag'in lu kanu manga taw a Israil.