Su Kinambata kanu Isa al-Masih
2
Na kanu entu a timpu na inisugu nu Sultan sa Ruma a su Augustus i pamilangen su langun nu nasakupan nin a taw. 2 Na nia ba i nauna a kinabilang kanu manga taw sa kanu timpu a nia gubilnadul lu sa Syria na si Kurinius. 3 Tembu minuli su langun nu taw kanu manga dalepa nilan ka inipasulat'ilan lu su ngala nilan.4 Na si Yusup na linemu sa Bitlihim a sakup'u Yudia ebpun sa Nasarit a sakup'u Galili kagina lu ba i dalepa nu katupuan nin a su Nabi Daud. 5 Ka lu nin ba inipasulat su ngala nin a kaped'in si Mariam a 'gkagkaluma nin. Saleta na kanu entu ba na magingay si Mariam. 6 Na gagalu nu lu silan sa Bitlihim na nauma su kutika nu kapembata ni Mariam. 7 Na nia nin nambata na wata a mama enggu nia ba i paganayan a wata nin. Daka pinutus'in sa ginis su wata enggu lu nin bu nakapaiga kanu pegkanan nu manga binatang kagina da den 'gkatumpan nilan.
Su Kinabpapayag'u manga Malaikat kanu manga Patutuganul sa Bili-bili
8 Saleta mambu na kanu entu bun ba a magabi na aden manga patutuganul sa bili-bili kanu maulad a manga utan kanu entu bun ba a dalepa ka pedtamengan nilan su manga bili-bili nilan. 9 Na nakatekaw silan pibpayagan nu malaikat taman sa nakatayaw kanilan su sigay nu Kadenan. Na sangat a nagilekan silan kanu entu. 10 Ugaid'a nia pidtalu nu malaikat kanilan na “Da kanu magilek! Ka aden mapia a katigan ku sa lekanu a ikapia na ginawa nu langun nu manusia. 11 Na kanu nia bun ba a kutika na pimbata den su 'bpamelipuas sia kanu dalepa a nia nu Daud. Na su wata a entu na kagelalan sa Masih a Mapulu. 12 Na nia nu tusan sa lekanin na mailay nu a pinutus sekanin sa ginis enggu pinaiga kanu pegkanan nu manga binatang.”
13 Daka nakatekaw demun i madakel pan a malaikat a namakauma ka pinugi nilan su Kadenan sa nia nilan pidtalu na
14 “Pugin su Kadenan a lu sa sulega enggu palilintaden nin su manga taw a 'gkasuatan nin sia sa dunia.”
15 Entu pan ka mimbalingan den su manga malaikat lu sa sulega. Daka uman i isa kanu manga patutuganul a entu sa bili-bili na midtalu sa “Lemu tanu sa Bitlihim ka enggu tanu 'gkailay u ngin i nanggula lu a mana su inipayag'u Kadenan sa lekitanu.”
16 Na midtagad-tagad den silan lemakaw taman sa natun nilan si Mariam enggu si Yusup enggu su wata nilan a pinaiga nilan lu kanu pegkanan nu manga binatang. 17 Guna nilan mailay su entu na pinanudtul'ilan kanu manga taw su langun nu pidtalu nu malaikat kanilan makapantag kanu entu ba a wata. 18 Na su langun nu nakakineg kanu entu a katigan nu manga patutuganul sa bili-bili na sangat a nangagaip. 19 Na si Mariam menem na initagu nin sa ginawa su langun nu entu a nanggula enggu 'gkapagitung'in a benal. 20 Na su manga patutuganul menem sa bili-bili na minuli silan a pebpugi kanu Kadenan sabap kanu nakineg'ilan enggu su nailay nilan a mana bun su pidtalu nu malaikat kanilan.
Su Kinapananggit kanu Isa al-Masih lu kanu Suti a 'Bpagagaman
21 Na guna su nakawalu gay den i kinagemaw nu wata a entu na pinaletak den sekanin sia luyud kanu adat-betad'u manga Yahudi. Na nia nilan inipanggungala lun na Isa ka nia ba i ngala a inipanggungala lun nu malaikat sa kanu da pan sekanin 'gkalalinga.
22-24 Na guna den mapasad su kutika a kinalimpiua kani Mariam sia luyud kanu nakadalem kanu kasuguan nu Nabi Musa na linemu si Yusup enggu si Mariam sa Awrusalim ka migkurban silan sia luyud kanu inisugu nu Kadenan sia kanu kasuguan nu Musa a “Dua timan a malapati atawa ka dua timan a manatad,” enggu inisalig'ilan bun kanu Kadenan su wata kagina nakadalem bun sia kanu kasuguan i “Langun na kaka sa langun a wata a mama na iumun kanu Kadenan.”b
25 Kanu entu a kutika na aden mama a lu pegkaleben sa Awrusalim a bedtuan sa Simiun. Aden gilek'in kanu Kadenan enggu ikelas i atay nin. Na isa sekanin a 'bpagangapa kanu kapalipuas'u Kadenan kanu manga taw a Israil. Saleta na lu den sa lekanin su Suti a Ruh. 26 Na inipayag sa lekanin nu Suti a Ruh i di sekanin matag matay taman sa di nin mailay su Masih a inibpasad'u Kadenan. 27 Na linemu si Simiun kanu Suti a 'Bpagagaman ka inagak sekanin nu Suti a Ruh lu ba. Na saleta na init den ni Yusup enggu Mariam su Isa al-Masih lu kanu Suti a 'Bpagagaman ka inisalig'ilan den sekanin kanu Kadenan sia luyud kanu ngin i adat-betad'ilan a lusud bun kanu kasuguan. 28 Na kinua ni Simiun su wata ka sinapipi nin enggu pinugi nin su Kadenan sa nia nin pidtalu na
29 “Hu Mapulu, malilintad den a kuan nengka su ulipen nengka
kagina tinuman nengka den su pasad'engka.
30 Ka nailay den nu dua embala a mata ku su kabpamelipuas'engka.
31 Na inadil'engka su entu sia demun kanu adapan nu langun nu manusia
32 a mabaluy a makatayaw kanu manga taw a dikena-Yahudi sa kalipuas'ilan
enggu mabaluy a kabadtugan kanu manga taw nengka a Israil.”
33 Na nagaip si Yusup enggu si Mariam kanu pidtalu ni Simiun a entu pantag kanu wata nilan. 34 Na inipangeni-ngeni silan ni Simiun sa palihalan silan nu Kadenan enggu nia nin pidtalu kani Mariam na “Itagu nengka sa ginawa i nia ba, su wata nengka na napamili nu Kadenan a makapadadsang enggu makapambangun kanu madakel a taw sia sa Israil. Na sekanin i tanda a ebpun kanu Kadenan enggu sungkangen sekanin nu manga taw 35 ka enggu makapayag su ngin i nakadalem kanu atay nu manga taw. Na su atay nengka na malupet-lupet den.”
36 Na aden babay a balu a matua den gaid a bedtuan sa Ana a wata sekanin ni Panuil a tupu nu Asir. Tinulunan sekanin nu Kadenan sa kapayag kanu kadtalu nin. Na nakapitu lagun bu i kinadtitiwalay nin kanu kaluma nin 37 ka nabalu den sa nakawalupulu enggu pat lagun. Tatap sekanin lu kanu Suti a 'Bpagagaman enggu magabi sa malamag na pedsimba bu kanu Kadenan sa ukit a kapebpuasa enggu kabpangeni-ngeni. 38 Na kanu entu bun ba a kutika na sinupegan nin si Yusup enggu Mariam taman sa midsukul-sukul sekanin kanu Kadenan. Na pidtalu nin bun su pantag kanu wata kanu langun nu taw lu a 'bpagangapa sa kapalipuas'u Kadenan kanu manga taw a Israil.
39 Na guna mapasad'u Yusup enggu Mariam enggulalan su langun nu nasisita a enggalebeken nilan sia luyud kanu kasuguan nu Kadenan na mimbalingan silan sa Nasarit a sakup'u Galili. 40 Saleta na pegkasela bun su wata sa mapia enggu sangat i kabalaitungan nin. Na sangat a 'gkasuatan sekanin nu Kadenan.
Su Kinambibitiala nu Isa al-Masih kanu manga Gulu nu Pangitaban
41 Na uman lagun na 'bpelu sa Awrusalim su manga lukes'u Isa al-Masih ka pedtalabuk silan kanu Kanduli nu Kalipuas. 42 Na guna su nakasapulu enggu dua lagun den i umul'u Isa al-Masih na pinaunut sekanin nu manga lukes'in sa kinatalabuk'ilan kanu Kanduli nu Kalipuas. 43 Na guna mapasad su entu a Kanduli na minuli den silan ugaid'a dala nilan kasipati i migkalidtabun su Isa al-Masih lu sa Awrusalim. 44 Nia nilan kataw ka lu bun sekanin kanu manga tagapeda nilan. Guna su nakasagay den i kinalalakaw nilan na nasipatan nilan i dala lu sekanin, na pinangilay nilan lu kanu manga pagali nilan enggu manga pakat'ilan. 45 Guna su dala nilan matun lu na mimbalingan silan sa Awrusalim ka pinangilay nilan menem lu sekanin. 46 Na kanu ikatelu nin gay na natun nilan sekanin lu kanu Suti a 'Bpagagaman a 'bpamagagayan kaped'u manga gulu nu pangitaban a 'bpakikineg enggu 'bpangingidsa kanilan. 47 Na sangat a 'gkangagaip su langun nu pakakineg kanu manga sawal'in enggu su kadalem'u katuntay nin. 48 Na kanu kinatun nu manga lukes'in sa lekanin na nagaip silan sa nia nadtalu nu ina nin na “Datu, nginan ka inigkumaya kami nengka? Sangat a nalidu i ginawa nami kani ama nengka sa kabpangilay sa leka.” 49 Nia nin inisawal na “Enduken ka 'bpangilayn aku nu? Di nu katawan i wagib a edtangen aku kanu walay nu Ama ku?” 50 Ugaid'a di nilan 'gkasabutan su maena nu pidtalu nin a entu kanilan.