Su Yahiya a 'Bpanalawat
3
Na kanu ikasapulu enggu lima lagun a kapendatu nu Sultan sa Ruma a si Tibirius na nia penggubilnadul sa prubinsia a Yudia na si Puntius Pilatu. Si Hirud menem i pegkamal sa prubinsia a Galili enggu si Pilipus a suled'in i pegkamal sa prubinsia a Ituria enggu Trakunitis. Si Lusanias menem i pegkamal sa prubinsia a Abilinia. 2 Na kanu entu ba a timpu na si Anas enggu si Kaipas i mapulu sa langun nu 'bpamangurban. Saleta mambu na pinayagan den nu Kadenan kanu kadtalu nin si Yahiya a wata ni Sakarias lu kanu tawan-tawan a dalepa. 3 Na guna su maitu na linapat endadalakaw nu Yahiya su embala-bala a dalepa kanu lawas'a ig'u Jordan ka nia nin ibpangusiat na kapasalawat sa tanda na kadtaubat asal'a maampun su kadusan. 4 Na natuman sia ba su nakadalem kanu Kitab a Inisulat'u Nabi Isayas a“Aden 'bpananawag sa matanug lu kanu tawan-tawan a dalepa sa
‘Pagadil'u su lalan a 'bpagukitan nu Mapulu! Pakatidtu nu su entu a 'bpagukitan nin!
5 Su manga pageletan nu bakulud na katampulan,
su bakulud enggu su manga palaw na madatal,
enggu su manga lalan a bigkug na 'gkatidtu
taman sa su manga badteg-badteg a lalan na 'gkatilak.
6 Na langun nu manusia sia sa liwawaw na dunia
na mailay nilan mambu su kabpamelipuas'u Kadenan.’ ”a
7 Na madakel a benal a taw i mindidilimudan ka papedsalawat silan kanu Yahiya. Nia nin pidtalu kanilan na “Sekanu a manga tupu nu manga nipay! Entain i midtalu sa lekanu sa mapukas kanu kanu pakauma a lipunget'u Kadenan? 8 Enggalebek kanu man sa kapianan a mana su penggalebeken nu taw a tidtu a midtaubat entu pan ka mapukas kanu kanu entu. Di nu semaligi i kagina ka tupu kanu nu Nabi Ibrahim na mapukas kanu sa entu. Ka nia taman a madtalu ku sa lekanu na apia su manga watu ba a nia na magaga nu Kadenan maluy sa tupu nu Nabi Ibrahim! 9 Na nakakayang den man su kapa a ipedtebped kanu manga dalig'u kayu. Ka apia ngin a kayu a dili 'bpagunga sa mapia na 'bpanebpeden enggu ibpangidtug lu kanu apuy a pegkaleg.”
10 Na inidsan nu manga taw su Yahiya sa “Amaika maitu na ngin i enggulan nami?” 11 Na nia nin inisumpat kanilan na “U entain sa lekanu i dua timan i balegkas'in na inggay nin su satiman kanu entain i dala, enggu entain menem i aden pegken nin na enggan nin su entain i dala.”
12 Na aden manga taw a 'bpangubela sa buwis i namakauma ka papedsalawat bun silan. Na nia nilan inidsa na “Gulu, ngin i dait a enggulan nami?” 13 Na nia inisumpat'i Yahiya na “Da kanu mangubela sa dikena wagib.”
14 Na aden menem manga sundalu a minidsa lun sa “Sekami menem na ngin i dait a enggulan nami?” Nia nin pidtalu kanilan na “Da kanu mangua sa kuleta kanu apia entain sa ukit a peges atawa ka sa ukit a kasendit kanu taw sa dikena benal. Edsukuli nu su ngin i 'gkatalima nu a sukay nu.”
15 Kagina ka pakapagangapa den a benal su manga taw kanu kapegkauma nu Masih na nia nilan 'gkapagitung na basi su Yahiya den su Masih. 16 Ugaid'a nia pidtalu nu Yahiya kanu manga taw na “Pedsalawatan ku sekanu sa ig ugaid'a aden pan pakauma a labi lawan pan kumin sa laki ka apia su kabekal ku kanu iket'u ampis'u ay nin na di aku makadait. Na su mama a nia a pakauma na salawatan kanu nin kanu Suti a Ruh enggu apuy.b 17 Na pegkapetan nin den su 'bpagusalen nin sa kapapembayug ka papedsenggayan nin su matimegas enggu su ukap. Na su matimegas na itagu nin kanu kamalig'in a 'bpelimudan sa bantad ugaid'a su ukap na tutungen nin lu kanu apuy a di den pebpatay.” 18 Na madakel pan i inipangusiat'i Yahiya kanu kapebpayag'in kanu Mapia a Tutuma.
19 Na dinaway nu Yahiya su Gubilnadul Hirud kanu madakel a pinggula nin a mawag apeg den nu kinapangaluma nin kani Hirudias a kaluma nu suled'in a si Pilipus. 20 Na sabap sa entu na makin pan inumanan nu Hirud su galebek'in a mawag ka inipabilanggu nin su Yahiya.
Su Kinasalawat kanu Isa al-Masih
21 Na kanu timpu a kinapanalawat'u Yahiyac kanu manga taw na sinalawatan nin bun mambu su Isa al-Masih. Na gagalu nu kabpangeni-ngeni nu Isa al-Masih ulian nu kinasalawat lun na mimbuka su langit 22 ka nangalimbaba lu sa lekanin su Suti a Ruh a linemagid sa malapati. Na aden mambu suala a ebpun sa sulega a nia nin kadtalu na “Seka su Tunggal a wata ku a pinadtaya. Sangat a 'gkasuat aku sa leka.”
23 Na namakatelupulu lagun den i umul'u Isa al-Masih kanu kinaludsu nin enggalebek kanu galebekan kanu Kadenan.
Su Tarsilan pantag kanu Katupuan nu Yusup
Na nia talima nu taw kanu Isa al-Masih na wata nu Yusup a nia nin ama na si Hili. 24 Si Hili na nia nin ama na si Matat, si Matat menem na nia nin ama na si Libi, si Libi menem na nia nin ama na si Milki, si Milki na nia nin menem ama na si Yana, si Yana na nia nin menem ama na bedtuan bun sa Yusup. 25 Na si Yusup menem na nia nin ama na si Matatias, si Matatias menem na nia nin ama na si Amus, na si Amus menem na nia nin ama na si Nahum, si Nahum na nia nin menem ama na si Isli, si Isli menem na nia nin ama na si Nagay, 26 si Nagay menem na nia nin ama na si Maat, si Maat menem na nia nin ama na bedtuan bun sa Matatias, si Matatias menem na nia nin ama na si Simihi, si Simihi menem na nia nin ama na si Yusik, si Yusik menem na nia nin ama na si Yuda, 27 si Yuda menem na nia nin ama na si Yuanas, si Yuanas menem na nia nin ama na si Risa, si Risa menem na nia nin ama na si Sirubabil, si Sirubabil menem na nia nin ama na si Sialtil, si Sialtil menem na nia nin ama na si Niri, 28 si Niri menem na nia nin ama na bedtuan bun sa Milki, si Milki menem na nia nin ama na si Adi, si Adi menem na nia nin ama na si Kusam, si Kusam menem na nia nin ama na si Ilmadam, si Ilmadam menem na nia nin ama na si Ir. 29 Na si Ir na nia nin menem ama na si Yusua, si Yusua menem na nia nin ama na si Ilisir, si Ilisir menem na nia nin ama na si Yurim, si Yurim menem na nia nin ama na bedtuan bun sa Matat, si Matat menem na nia nin ama na bedtuan bun sa Libi, 30 si Libi menem na nia nin ama na si Simiun, si Simiun menem na nia nin ama na si Yahuda, si Yahuda menem na nia nin ama na bedtuan bun sa Yusup, si Yusup menem na nia nin ama na si Yunan, si Yunan menem na nia nin ama na si Iliakim, 31 si Iliakim menem na nia nin ama na si Milia, si Milia menem na nia nin ama na si Mina, si Mina menem na nia nin ama na si Matata, si Matata menem na nia nin ama na si Natan, si Natan menem na nia nin ama na su Nabi Daud. 32 Na su Daud na nia nin menem ama na si Yisi, si Yisi menem na nia nin ama na si Ubid, si Ubid menem na nia nin ama na si Buas, si Buas menem na nia nin ama na si Salmun, si Salmun menem na nia nin ama na si Nasun, 33 si Nasun menem na nia nin ama na si Aminadab, na si Aminadab menem na nia nin ama na si Aram, si Aram menem na nia nin ama na si Arni, si Arni menem na nia nin ama na si Hisrun, si Hisrun menem na nia nin ama na si Parez, na si Parez menem na nia nin ama na si Yahuda, 34 si Yahuda menem na nia nin ama na su Nabi Yakub, na su Yakub menem na nia nin ama na su Nabi Iskak, su Iskak menem na nia nin ama na su Nabi Ibrahim, na su Ibrahim menem na nia nin ama na si Tira, si Tira menem na nia nin ama na si Nahur. 35 Na si Nahur menem na nia nin ama na si Serug, si Serug menem na nia nin ama na si Riyu, si Riyu menem na nia nin ama na si Paleg, si Paleg menem na nia nin ama na si Ibir, si Ibir menem na nia nin ama na si Silak, 36 si Silak menem na nia nin ama na si Kainan, si Kainan menem na nia nin ama na si Arpaksad, si Arpaksad menem na nia nin ama na si Sim, si Sim menem na nia nin ama na su Nabi Nuh, su Nuh menem na nia nin ama na si Lamik, 37 si Lamik menem na nia nin ama na si Mitusila, si Mitusila menem na nia nin ama na su Nabi Inuk, su Inuk menem na nia nin ama na si Yarid, si Yarid menem na nia nin ama na si Mahalalil, si Mahalalil menem na nia nin ama na si Kinan. 38 Si Kinan menem na nia nin ama na si Inus, si Inus menem na nia nin ama na si Sit, si Sit menem na nia nin ama na su Nabi Adam, na su Adam menem na nia nin ama na su Kadenan.d