Su Mapia a Tutuma a Inisulat'i Yuhan 1

Su Mapia a Tutuma

a Inisulat'i Yuhan

Mimbaluy a Manusia su Kadtalu

Kanu unan nu kinapangaden kanu langun-langun na aden den su Kadtalu. Su Kadtalu na lu kanu Kadenan enggu su Kadtalu na Kadenan. 2 Unan pan nu kinapangaden na lu den sekanin kanu Kadenan. 3 Sia nakanggulalan sa lekanin i kinapangaden kanu langun-langun. Na dala napangaden a apia satiman kanu langun-langun nu pinangaden a da makanggulalan sa lekanin. 4 Sekanin su 'gkabpunan nu uyag-uyag enggu su uyag-uyag ba a nia i pakasigay kanu manusia. 5 Na pedsigay su entu lu kanu malibuteng enggu di 'gkalawanan nu malibuteng.

6 Aden mama a sinugu nu Kadenan a nia nin ngala na Yahiya. 7 Sinugu sekanin a makadsaksi taman sa makapangimbenal'in su pantag kanu sigay a entu asal'a sia makanggulalan sa lekanin na makapalitiala su langun na taw. 8 Na su Yahiya a nia na dikena sekanin su sigay ugaid'a sinemia sekanin ka enggu nin makapangimbenal su pantag kanu sigay.

9 Na su tidtu a sigay a pedsigay kanu langun nu manusia na nakauma den man sia sa dunia. 10 Ugaid'a apia sia den sekanin sa lusud'a dunia enggu naaden su dunia sia nakanggulalan sa lekanin na da bun sekanin kilala nu sakadunia. 11 Na sinemia sekanin kanu inged'in na da sekanin talima nu manga taw lu. 12 Ugaid'a su langun nu tinemalima sa lekanin a mana su namedsalig sia kanu ingala nin na inenggan nin silan sa kawagib a mabaluy a timbang a manga wata nu Kadenan 13 a dikena nia nin ukit i mana su kapembata nu manusia atawa ka su lilini nu manusia udi na mana su lilini nu 'gkalumaya ka kahanda man nu Kadenan.

14 Na su Kadtalu a entu na mimbaluy a manusia. Mindadalepa sekanin sia sa dunia a naped tanu taman sa nailay nami demun mismu su sigay nin. Na nakadait sa lekanin su sigay a entu kagina sekanin su Tunggal a ebpun kanu Ama. Talutup sa lekanin su kabantang enggu su dala idsan nin a kapegkalimu. 15 Na inipangimbenal'u Yahiya su makapantag a nia sa lekanin sa nia nin ibpananawag sa matanug na “Sekanin ba a nia su pidtalu ku sa lekanu a makatundug sa laki a labi lawan pan kumin sa laki kagina sekanin paman i nauna sa laki.” 16 Natalima tanu langun su dala kapedtaman nin a entu a kapegkalimu a 'bpamelapay a ebpun sa lekanin. 17 Ka amaika su kasuguan ka sia nakanggulalan kanu Nabi Musa na su kabantang enggu su dala idsan nin a kapegkalimu na sia menem nakanggulalan kanu Isa al-Masih. 18 Na da isa bu a nakailay kanu Ama a su Kadenan ugaid'a su Tunggal'in i minayag lun a di 'gkapitas sa lekanin ka saben-sabenal a sekanin na Kadenan.

Su Kinapayag'u Nabi Yahiya pantag kanu Isa al-Masih

(Mataya 3:1-12; Markus 1:1-8; Luk 3:1-18)

19 Na maya ba i kinapangimbenal'u Yahiya kanu kinasugu nu 'gkangaunutan nu manga Yahudi lu sa lekanin kanu ebpun sa Awrusalim ka enggu nilan pakaidsa sa lekanin i “Entain ka besen?” 20 Na pidtalu nu Yahiya u ngin i bantang, sa nia nin pidtalu na “Dikena saki su Masih.” 21 Daka inidsan nilan menem sekanin sa “Amaika maitu na entain ka besen? Seka ba su Nabi Ilias?” Nia nin inisawal na “Dikena.” Na inidsan nilan menem sa “Seka ba su Nabi?” Nia nin menem inisawal na “Dikena.” 22 Guna su maitu na nia nilan lun pidtalu na “Amaika maitu na entain ka? Edtalu ka sa lekami u entain ka, ka enggu aden makasawal'ami lu kanu sinemugu sa lekami.” 23 Na nia nin inisawal kanilan na “Saki su pidtalu nu Nabi Isayas a suala a 'bpananawag sa matanug lu kanu tawan-tawan a dalepa sa ‘Pakatidtu nu su lalan a 'bpagukitan nu Mapulu!’ ”

24 Na ped bun kanu manga sinugu a entu na lusud bun kanu lumpukan a Parisiyu. 25 Na nia nilan inidsa kanu Yahiya na “U dikena besen seka su Masih atawa ka su nalabit a entu a Nabig udi na su Nabi Ilias na ngintu ka 'bpanalawat ka?” 26 Nia inisawal'u Yahiya sa kanilan na “Saki na nia ku bu ibpanalawat na ig. Ugaid'a aden san sakataw a kaped'u den a di nu bu 'gkakilala. 27 Sekanin su pakatundug sa laki, na apia su kabekal ku kanu iket'u ampis'u ay nin na di aku makadait.” 28 Na su langun nu entu ba a nanggula na lu natabu sa dalepa a Bitani a temampal sa sebangan na lawas'a ig'u Jordan a 'bpanalawatan nu Yahiya.

29 Na kanu temundug a gay na nailay nu Yahiya su Isa al-Masih a pedsupeg sa lekanin. Daka nia pidtalu nu Yahiya na “Ilay nu su Manguda a Bili-bili nu Kadenan a 'bpagawa kanu kabaladusan nu sakadunia! 30 Na sekanin ba a nia su pidtalu ku sa lekanu a ‘Aden sakataw a makatundug sa laki a labi lawan pan kumin sa laki kagina sekanin paman i nauna sa laki.’ 31 Apia saki na dala ku bun sekanin babaya makilala ugaid'a entu ba i sabap'in ka 'bpanalawat aku sa ig ka enggu sekanin makapayag kanu bangsa a Israil.”

32 Na inipangimbenal bun nu Yahiya i “Nailay ku demun mismu su Ruh a ebpun sa langit a nangalimbaba sa lekanin a linemagid sa malapati taman sa midtangen den lu sa lekanin. 33 Na apia saki na dala ku bun sekanin babaya makilala ugaid'a su sinemugu sa laki sa kapanalawat sa ig na sekanin i midtalu sa laki sa ‘Su taw a mailay nengka a pangalimbaban nu Ruh taman sa lemangkap lun, na sekanin ba a nia su manalawat sa .’ 34 Na nambamatan ku demun i nia ba enggu ibpangimbenal ku i sekanin ba a nia su Pinamili nu Kadenan.”

Su Muna-muna a Namangunut kanu Isa al-Masih

35 Na kanu temundug menem a gay a kaped'u Yahiya su dua kataw a 'bpamangunut lun 36 na nailay nin su Isa al-Masih a 'bpelakaw, na nia nin pidtalu na “Ilay nu, su Manguda a Bili-bili nu Kadenan!”j 37 Endaw i kinakineg'u dua kataw a 'bpamangunut lun su entu na tinundug'ilan su Isa al-Masih. 38 Daka linemengi su Isa al-Masih na nailay nin silan a pedtundug sa lekanin, na inidsan nin silan sa “Endaw kanu pebpawang?” Nia nilan nadtalu na “Rabbi, endaw ka besen pegkakaleben?” (Rabbi, nia nin maena na gulu.) 39 Na nia nin inisawal kanilan na “Unut kanu ka enggu nu 'gkailay.” Na minunut mambu silan taman sa nailay nilan u endaw sekanin pegkakaleben. Na kanu entu ba mambu a uras na manga ikasapulu sa mapita taman sa midtangen pan silan lu kanu entu ba a gay.

40 Na isa kanu dua kataw a entu a nakakineg kanu pidtalu nu Yahiya taman sa minunut kanu Isa al-Masih na si Anduk a suled'i Simiun Pitru. 41 Na nia muna-muna a pinggula ni Anduk na pinangilay nin su suled'in a si Simiun ka pidtalu nin lun i “Nailay nami den su Masih!” (Nia maena nu na su pinamili nu Kadenan a papendatun.) 42 Na pinaunut'i Anduk si Simiun lu kanu Isa al-Masih. Daka pidtulikan nu Isa al-Masih si Simiun Pitru sa nia nin lun pidtalu na “Simiun i ngala nengka a wata ni Yuhan ugaid'a nia den ibedtu sa leka na Kipas.” (Kipas na pagidsan na ngala a Pitru.)

Su Kinataw ni Pilipus enggu Nataniel kanu Tunggal'u Kadenan

43 Na kanu temundug menem a gay na napagitung'u Isa al-Masih i lemu sekanin sa prubinsia a Galili. Na nailay nin si Pilipus na nia nin lun pidtalu na “Unut ka sa laki.” 44 Si Pilipus a nia na taw sa dalepa a Bitsaida a dalepa bun ni Anduk enggu Pitru.

45 Na pinangilay ni Pilipus si Nataniel ka pidtalu nin lun i “Nailay nami den su nakadalem kanu Kitab Taurat a inisulat'u Nabi Musa enggu su nakadalem kanu inisulat'u ped pan a manga nabi. Si Isa besen i entu a taw sa Nasarit a wata ni Yusup.” 46 Na nia nakasumpat'i Nataniel sa lekanin na “Lu sa Nasarit! Aden besen makagkapia a ganat sa Nasarit?” Nia pidtalu ni Pilipus sa lekanin na “Unut ka man ka enggu nengka 'gkailay.”

47 Na guna mailay nu Isa al-Masih si Nataniel a pakasupeg den sa lekanin na nia nin pidtalu na “Ilay nu, saben-sabenal man a taw sekanin sa Israil a dala sa lekanin su kapagakal!” 48 Daka inidsan sekanin ni Nataniel sa “Panun i kinataw nengka sa laki?” Na nia nin lun inisawal na “Da ka paman kaangayi ni Pilipus na nailay ku den seka lu kanu atag'u kayu a igus.” 49 Nia nakasawal sa lekanin ni Nataniel na “Gulu, saben-sabenal na seka su Tunggal'u Kadenan! Seka su Datu nu Israil!” 50 Daka nia pidtalu nu Isa al-Masih na “Mapia ka nalitiala ka sa apia kinadtalu ku bu sa leka sa nailay ku seka lu kanu atag'u kayu a igus. Na labi pan sia ba i mangailay nengka a kangagaipan!” 51 Pidtalu nin pan i “Saben-sabenal a pedtalun ku sa lekanu i mailay nu man a kaukan su sulega enggu mailay nu su manga malaikat'u Kadenan a manik-maba sia kanu Kaka nu Manusia.”