Su Ig a Mimbaluy a Alak
2
Na guna maipus su nakadua gay na aden pegkalilang lu sa dalepa a Kana a sakup'a Galili. Na tinemalabuk lu su ina nu Isa al-Masih. 2 Na kagina ka pinasabut bun su Isa al-Masih enggu su 'bpamangunut lun na linemu bun silan. 3 Na guna maibped su alak na nia pidtalu nu ina nin sa lekanin na “Naibpedan den silan na alak.” 4 Daka nia pidtalu sa lekanin nu Isa al-Masih na “Da den lekita sa entu ka da pan mauma i kutika ku.” 5 Guna su maitu na nia pidtalu nu ina nu Isa al-Masih kanu manga 'bpanalagad na “Enggula nu i apia ngin a isugu nin sa lekanu.”6 Aden nem timan lu a 'bpanaguan sa ig a inumbal ebpun sa watu a 'bpagusalen nu manga Yahudi kanu kabpelimpiu nilan sia lusud kanu agama nilan. Na uman i sawalu na nia pakadalem lun na duapulu kagalun taman sa telupulu. 7 Na nia pidtalu nu Isa al-Masih kanu 'bpamanalagad na “Penu nu sa ig su manga 'bpanaguan a nan.” Daka pinamenuan nilan den mambu. 8 Entu pan ka nia nin pidtalu kanilan na “Sakedu kanu san ka pananggit'u lu kanu pedtiakap kanu nia a pakalagian.” Daka pinananggit'ilan mambu lu sa lekanin 9 ugaid'a di katawan nu pedtiakap kanu pakalagian u endaw nakabpun su entu ka nia bu mataw lun na su 'bpamanalagad a sinemakedu lun. Na endaw i kinatekaw nu pedtiakap kanu ig a mimbaluy a alak na tinawag'in su mama a pegkawingen 10 ka nia nin lun pidtalu na “Nia katatapan na nia muna-muna a ipapedtalagad na su mapia sa langun a alak. Na amaika madakel den su nainem'u manga taw na entu pan ka ipedtundug su nangasasangan demun a alak. Ugaid'a seka na saguna nengka pan inipatalagad su mapia sa langun a alak.”
11 Na kanu nia ba a muna-muna a tandaa a pinggula nu Isa al-Masih a lu natabu sa Kana a sakup'u Galili na inipayag'in su sigay nin taman sa sinemalig sa lekanin su 'bpamangunut lun.
Su Kinapamugaw nu Isa al-Masih kanu manga Padagang lu kanu Suti a 'Bpagagaman
12 Na guna maipus su entu na linemu su Isa al-Masih sa Kapurnaum apeg'u ina nin enggu su manga suled'in a mama taman kanu 'bpamangunut lun. Na midtangen pan silan lu sa namakapila gay. 13 Na kagina ka mangagan den su kapegkanduli nu manga Yahudi sa Kanduli nu Kalipuasb na linemu su Isa al-Masih sa Awrusalim. 14 Na nia nin nauman lu kanu lama-lama nu Suti a 'Bpagagamanc na su manga padagang sa sapi, bili-bili enggu manga malapati.d Na nailay nin bun lu su 'bpamanambi sa kuletae a 'bpamagagayan lu ba. 15 Daka minumbal sekanin sa ibpanapes'in a tali ka pinamugaw nin silan langun kanu Suti a 'Bpagagaman apeg den nu manga sapi enggu su manga bili-bili. Na inisambulak'in su manga kuleta nu 'bpamanambi sa kuleta taman sa pinamangkulat'in su manga lamisan nilan. 16 Nia nin pidtalu kanu manga padagang sa malapati na “Ipangawa nu sia i manga dagangan nu a nia! Di nu 'bpagumbal a padian su walay nu Ama ku.” 17 Na nagkalendem'u 'bpamangunut lun su nakadalem sia kanu kitab a “Su lilingay ku kanu walay nengka na mana apuy a temupuk sa laki.”f
18 Daka nia pidtalu nu 'gkangaunutan nu manga Yahudi kanu Isa al-Masih na “Ngin i tandaq a makapailay nengka sa lekami a amadan sa aden kawagib'engka sa kapenggula nengka sa nia?” 19 Na nia inisumpat'u Isa al-Masih kanilan na “Geba nu i Suti a nia a 'Bpagagaman ka dalem'a telu gay bu na patindegen ku menem.” 20 Daka nia pidtalu nu manga Yahudi na “Nakapatpulu enggu nem lagun na papedtindegen bu i nia, na seka na telu gay bu i kapatindeg'engka lun?” 21 Ugaid'a nia nin ba a entu pedtalun a Suti a 'Bpagagaman na su badan nin. 22 Tembu ba kanu kinambibiag 'bpaluman nu Isa al-Masih kanu ikatelu nin gay ulian nu kinapatay nin na nagkalendem'u 'bpamangunut lun su pidtalu nin ba a nia taman sa pinalitialan nilan su nakadalem kanu kitab enggu su pidtalu nin.
23 Na kanu timpu a lu sa Awrusalim su Isa al-Masih a nia nin natabuan na Kanduli nu Kalipuas na madakel i namedsalig sia kanu ingala nin sabap sa nailay nilan su manga tanda a pinggalebek'in. 24 Ugaid'a su Isa al-Masih na da nin isalig su ginawa nin kanilan kagina katawan nin den u ngin i ukit'u manusia. 25 Na di nin den nasisita i aden pan mapaamad pantag kanu manusia ka katawan nin den su pamusungan nu manusia.