Su Kambata 'Bpaluman kanu Taw sia Makanggulalan kanu Ruh
3
Na aden mama a nia nin ngala na Nikudimu a lusud kanu lumpukan a Parisiyu. Isa sekanin a 'gkaunutan nu manga Yahudi. 2 Kanu isa a magabi na linemu sekanin kanu Isa al-Masih ka nia nin lun pidtalu na “Gulu, katawan nami i isa ka a gulu a ebpun kanu Kadenan kagina dala makagaga enggula kanu manga tanda a nia a penggulan nengka, nia tabia na lu sa lekanin su Kadenan.” 3 Nia pidtalu nu Isa al-Masih sa lekanin na “Saben-sabenal a pedtalun ku sa leka i taman sa di embatan 'bpalumana su taw na di nin man magedam su kapendatu nu Kadenan.” 4 Na nia nakaidsa ni Nikudimu na “Panun i kambata 'bpaluman kanu taw a matua den? Ngintu, makambalingan pamun kanu tian nu ina nin ka enggu mambata 'bpaluman?” 5 Nia inisumpat'u Isa al-Masih na “Saben-sabenal a pedtalun ku sa leka i di makalusud su taw kanu kapendatu nu Kadenan nia tabia na embatan sia makanggulalan sa ig enggu Ruh.b 6 Su pimbata nu manusia na manusia ugaid'a su pimbata sia makanggulalan kanu Ruh na su bagu a uyag-uyag'u taw.c 7 Di ka 'gkagaipi su pidtalu ku a nia sa leka a sekanu na nasisita a embatan 'bpaluman. 8 Su sambel na pedsanggiup sa apia endaw i kiug'in. Na matag'engka makineg su segeng'in na di nengka 'gkatawan u endaw nakabpun enggu endaw pebpawang. Na maitu bun ba su taw a embatan sia kanu Ruh.”9 Nia menem nakaidsa ni Nikudimu sa lekanin na “Panun i kanggula sa entu?” 10 Na nia inisumpat'u Isa al-Masih sa lekanin na “Seka na isa ka bun a gulu nu Israil na ngintu ka di nengka 'gkatuntayan i nia? 11 Saben-sabenal a pedtalun ku sa leka, na u ngin i 'gkatawan nami na pedtalun nami enggu u ngin i 'gkailay nami na ibpangimbenal'ami ugaid'a di nu pedtaliman su ibpangimbenal'ami. 12 Na amaika su manga pedtalun ku sa lekanu a makapantag sia sa dunia ka di nu 'bpalitialan, na nia nu pan a entu 'bpalitialan su pedtalun ku makapantag kanu kasulegan? 13 Na dala man pakataw kanu kasulegan nia tabia na su Kaka nu Manusia a nakabpun lu ba kagina dala isa bu a nakabpapulu lu sa sulega. 14 Na mana bun su kinatunggul sa kayu nu Nabi Musa kanu galang a nipay lu kanu tawan-tawan a dalepad na maitu bun ba su Kaka nu Manusia na dait a makatunggul bun sekanin kanu kayu 15 asal'a su apia entain i semalig sa lekanin na kaadenan na uyag-uyag a da taman nine lu sa lekanin.
16 “Kagina ka sangat a inikalimu nu Kadenan su dunia na inenggay nin su Tunggal'in asal'a su apia entain a semalig lun na di masiksaf ka nia pan mula na kaadenan na uyag-uyag a da taman nin. 17 Ka dikena nia kinasugu nu Kadenan kanu Tunggal'in sia sa dunia i wagiban nin su dunia ka nia nin kinasugu lun na ibpelipuas'in sia makanggulalan sa lekanin. 18 Na entain i semalig lun na di den kawagiban ugaid'a su di menem semalig na nawagiban den sabap sa da sekanin salig sia kanu ingala nu Tunggal'u Kadenan.
19 “Na nia ba i sabapan a kinawagib kanilan ka sia den sa dunia su sigay ugaid'a nia nilan bun linamig na su malibuteng kumin kanu sigay kagina su penggalebeken nilan na mawag. 20 Ka apia entain man i penggalebek sa mawag na kabensian nin su sigay enggu di nin sikenan su sigay asal'a di mapayag su manga galebekan nin. 21 Ugaid'a su penggalebek sa bantang na pedsiken kanu sigay asal'a mapayag i ebpun kanu Kadenan su manga galebekan nin a entu.”
Su Nauli den a Kinapangimbenal'u Nabi Yahiya pantag kanu Isa al-Masih
22 Kanu ulian nu entu na linemu su Isa al-Masih enggu su 'bpamangunut lun kanu ped a dalepa kanu kalupan bun nu prubinsia a Yudia. Na midtangen pan silan lu enggu nanalawat. 23-24 Na kanu entu ba mambu a manga timpu na dala pamun mabilanggu su Yahiya. Tembu ba nakapanalawat pamun sekanin kanu entu lu sa Inun a masupeg kanu dalepa a Salim kagina lu ba i madakel i ig'in. Na madakel i taw a namelu ka napasalawat.
25 Na su 'bpamangunut kanu Yahiya na nakandalawana nilan su isa bun a Yahudi makapantag kanu kabpelimpiu sia luyud kanu agama nilan. 26 Daka linemu silan kanu Yahiya ka nia nilan lun pidtalu na “Gulu, su mama a inipangimbenal'engka a nadtagapeda nengka lu kanu sebangan nu lawas'a ig'u Jordan na saguna na 'bpanalawat den. Na madakel a benal a manga taw i 'bpelu sa lekanin.”
27 Nia pidtalu nu Yahiya na “Apia ngin na dala matalima nu taw nia tabia na u ngin bu i inggay nu Kadenan sa lekanin. 28 Sekanu demun mismu i nakadsaksi lun sa kanu kinadtalu ku sa ‘Dikena saki su Masih ugaid'a pinauna aku bu sa lekanin.’ 29 Nia kalagidan nu 'gkambetadan ku na mana su abay nu mama a pegkawingen. Na su mama a pegkawingen i saben-sabenal a pakadtampung'u babay a pegkawingan lun. Na su abay menem na pendalabay bu kanu mama a pegkawingen enggu sangat a 'gkagalaw kanu kapegkakineg'in kanu suala nu mama. Na maitu aku bun ba, na sangat a 'gkagalaw aku. 30 Na dait man a ipulu sekanin enggu saki menem na dait a makababa.g
31 “Ka su ebpun kanu liwawaw na dunia na su langun nu kadtalu nin na kamamanusiay bu ka manusia bu sekanin. Ugaid'a su ebpun man kanu sulega na entu ba i mapulu sa langun 32 enggu ibpangimbenal'in su nailay nin enggu su nakineg'in. Ugaid'a dala gaid pedtalima kanu ibpangimbenal'in. 33 Ugaid'a su taw a tinemalima kanu ibpangimbenal'in na ipebpagamad'ilan i bantang su langun na pedtalun nu Kadenan. 34 Ka su sinugu a ebpun kanu Kadenanh na nia nin bu pembitialan na su kadtalu nu Kadenan kagina da tedtab'in i kabpagenggay nu Kadenan sa lekanin kanu bagel'u Ruh. 35 Ipegkalimu nu Ama su Tunggal'in enggu initapenay nin lun su kakamal kanu langun-langun. 36 Entain i pedsalig kanu Tunggal na aden uyag-uyag'in a da taman nin ugaid'a entain menem i pegkias sa lekanin na di makatalima sa uyag-uyag a da taman nin. Na nia pan mula na di maawa sa lekanin su siksa nu Kadenan.”