Su Ig a Pakaenggay sa Uyag-uyag a Da Taman nin
4
1-2 Na kanu entu a timpu na labi lawan pan i kadakel a nakapaunut enggu nasalawatan nu Isa al-Masih kumin kanu Yahiya apia nia nin kaaden i dikena su Isa al-Masih demun i nanalawat lun ka su 'bpamangunut lun. Na guna katawi nu Isa al-Masih i nakauma i entu kanu pakinegan nu manga taw a lusud kanu lumpukan a Parisiyu 3 na ginemanat sekanin lu sa Yudia ka mimbalingan sekanin sa Galili.4 Na kanu kapembalingan nin a entu na lu sekanin 'bpagukit sa prubinsia a Samaria. 5 Na nakauma sekanin lu kanu dalepa a bedtuan sa Sikar a sakup'u Samaria a masupeg kanu lupa a inibpusaka nu Yakub kanu wata nin a su Yusup.a 6 Na lu ba su bualan a kalut a bedtuan sa Kalut'u Yakub. Na sabap sa 'gkalugat den su Isa al-Masih kanu kapendadalakaw nin na nagagayan sekanin lu kanu ubay nu kalut. Saleta mambu na kanu entu ba a manga uras na manga ikanem den sa malulem.b 7-8 Daka aden babay a taw sa Samaria a nakauma lu ka pedsageb. Na dala lu su 'bpamangunut kanu Isa al-Masih ka linemu silan sa padian ka 'bpamasa sa makan.
Na nia pidtalu nu Isa al-Masih kanu babay na “Mapakay a makapainem aku nengka?” 9 Daka nia inisawal sa lekanin nu babay a taw sa Samaria na “Panun i kapegkatika nengka sa laki 'bpangeni sa ig, ka seka na Yahudi enggu saki menem na babay sa Samaria?” Pidtalu nin i nia kagina su manga Yahudi na di a benal musal kanu langun-taman a nausal den nu manga taw sa Samaria.c
10 Na nia menem inisawal'u Isa al-Masih sa lekanin na “Amaika 'gkatawan nengka bu man su palihala a ibpagenggay nu Kadenan sa leka enggu u entain i nia ba a pedtalu a nia sa leka sa ‘Mapakay a painem aku pan,’ na natalatantu a seka pan i makapangeni sa lekanin taman sa enggan ka nin mambu sa ig a uyag-uyag.” 11 Na nia inisawal'u babay sa lekanin na “Mapulu, madalem i kalut a nia. Dala ipedtabu nengka kanu ig. Na endaw nengka makua su entu a ig a uyag-uyag?d 12 Ngintu, lawan ka pan besen kanu katupuan tanu a su Nabi Yakub a minenggay sa lekitanu kanu nia a kalut? Na apia sekanin mismu na sia bun ba mininem apeg'u manga wata nin a mama taman den kanu pangangayamen nin.” 13 Nia menem pidtalu nu Isa al-Masih sa lekanin na “Langun na 'bpamanginem kanu nia ba a ig na kamalan pamun 'bpaluman, 14 ugaid'a apia entain i makainem kanu ig a inggay ku na di den kamalan taman sa taman. Kagina su ig a entu a inggay ku na mabaluy a bualan na ig sia kanu taw a pedsimbual sa kapedtuga nin a makaenggay lun sa uyag-uyag a da taman nin.” 15 Nia pidtalu nu babay sa lekanin na “Mapulu, inggay nengka sa laki su entu a ig asal'a di aku den kamalan. Na amaika maitu na di den nasisita i semia aku pan asal'a makasageb.”
16 Na nia menem pidtalu nu Isa al-Masih sa lekanin na “Uli ka den, ka angayi ka su kaluma nengka ka sia kanu.” 17 Nia lun inisumpat'u babay na “Dala man kaluma ku.” Daka nia pidtalu nu Isa al-Masih sa lekanin na “Benal su kinadtalu nengka sa dala kaluma nengka. 18 Ka nia nin kabantang na lima kataw den i nagkaluma nengka taman sa su ipedtiwalay nengka saguna na dikena nengka kaluma. Bantang man su entu a pedtalun nengka.”
19 Na nia nadtalu nu babay na “Mapulu, nia ku kapegkasipat sa leka na nabi ka. Aden madtalu ku sa leka. 20 Su manga kalukesan nami na sia nilan ba sinimba su Kadenan kanu nia ba a palaw.e Ugaid'a sekanu a manga Yahudi na nia nu pedtalun na lu bu sa Awrusalim dait a simban nu manga taw su Kadenan.” 21-22 Nia menem pidtalu nu Isa al-Masih sa lekanin na “Manga dua na suled, nia nin kabantang na sekanu a manga taw sa Samaria na di nu 'gkatuntayan su pedsimban nu. Ugaid'a sekami a manga Yahudi na 'gkatuntayan nami su pedsimban nami. Ka su kabantang'in na sia makanggulalan kanu manga Yahudi su kalipuasan.f Manga dua na suled, na paginuguti ka su kadtalu ku a nia a mauma bun su kutika a masimba nu su Ama sa apia dikena sia sa palaw ba a nia atawa ka lu sa Awrusalim. 23 Ka nia nin kabantang na nauma den ba a nia su entu a kutika. Na su taw a tidtu i kasimba nin na masimba nin den su Ama sia makanggulalan kanu Ruh enggu luyud kanu kabantang. Na maitu ba man i 'bpangilayn nu Ama a semimba sa lekanin. 24 Su Kadenan na Ruh. Tembu su pedsimba sa lekanin na dait a simban nilan sekanin sia makanggulalan kanu Ruh nin enggu luyud kanu kabantang.”
25 Na nia pidtalu nu babay sa lekanin na “Katawan ku i makauma su pinamili nu Kadenan a su ginelalan sa Masih. Na u makauma sekanin na ipayag'in sa lekami su langun-langun.” 26 Nia inisumpat'u Isa al-Masih sa lekanin na “Saki man su entu, su pembitiala bun ba a nia sa leka saguna.”
27 Saleta mambu na kanu entu ba a kutika na nakauma su 'bpamangunut kanu Isa al-Masih. Na nangagaip silan ka pembitiala sekanin sa babay. Ugaid'a apia ka maitu na dala demun minidsa sa “Ngin i kahanda nengka?” atawa ka “Nginan ka pembitiala ka kanu babay?” 28 Daka tinagak'u babay su ibpanageb'in ka mimbalingan sekanin lu kanu dalepa nin ka pidtalu nin kanu manga taw i 29 “Unut kanu paman sa laki ka ilay nu pan i mama a entu a midtalu sa laki kanu langun nu pinggula ku. Tabia ka sekanin su Masih?” 30 Daka ginanatan nu manga taw su dalepa nilan ka linemu silan kanu Isa al-Masih.
31 Saleta mambu na su 'bpamangunut kanu Isa al-Masih na pedsendelen nilan sekanin sa keman den sa nia nilan lun pedtalun na “Gulu, kan ka den.” 32 Ugaid'a nia pidtalu nu Isa al-Masih kanilan na “Di den, ka aden man pegken ku a di nu katawan.” 33 Daka nia nadtalu nu uman i isa kanu 'bpamangunut lun na “Dikena ba dala nananggit lun sa makan?” 34 Na pidtalu nu Isa al-Masih kanilan i “Nia laki a pegken na enggalebeken ku su kahanda nu sinemugu sa laki taman sa matalutup ku su galebekan a inisangan nin sa laki. 35 Dikena ba nia nu pedtalun na ‘Pat ulan pan na entu pan ka makasabpet?’ Ugaid'a nia ku pedtalun sa lekanu na dikena den maitu ka sandeng'u su pinangangawidan ka malutu den su inipamula lun taman sa mapakay den a pagaganin. 36 Na su 'bpagagani na sagugunay den i kapedtalima nin sa balas enggu kabpelimud'in kanu 'bpagaganin nin a mana su manga taw a makatalima den sa uyag-uyag a da taman nin. Ka amaika maitu na makadsisigalaw su sinemaud kaped'in su 'bpagagani.g 37 Na amaika maya ba na benal su kadtalu nu bayuk a ‘Salakaw i pedsaud na salakaw menem i pedsabpet lun.’ 38 Ka saki na sinugu ku sekanu sa kanu kapagagani nu kanu dikena nu pinggalebekan. Na sekanu na pedsabpeten nu su unga nu galebekan nu ped a taw.”
39 Na madakel kanu manga taw sa Samaria kanu dalepa a Sikar i sinemalig kanu Isa al-Masih sabap kanu inipangimbenal'u babay a “Pidtalu nin sa laki su langun nu pinggula ku.” 40 Na guna den silan makauma kanu Isa al-Masih na pinamitialan nilan sekanin sa edtangen pan lu. Na midtangen mambu sekanin lu sa nakadua gay. 41 Na madakel pan i sinemalig sabap kanu manga kadtalu nin 42 taman sa nia nilan pidtalu kanu babay na “Pedsalig kami, dikena den sabap kanu pidtalu nengka ka sabap sa sekami demun mismu i nakakineg sa lekanin. Na natawan nami i saben-sabenal na sekanin su 'bpamelipuas kanu manusia.”
Su Kinapagkapia nu Isa al-Masih kanu Wata nu Upisial'u Gubilnu
43 Na guna maipus su nakadua gay na ginemanat lu su Isa al-Masih ka tinemalus den sa Galili. 44 Ka sekanin demun mismu i nangimbenal sa su nabi na di pagadatan lu kanu dalepa nin demun.h 45 Ugaid'a sabap sa nailay nu manga taw sa Galili su langun na pinggula nin lu sa Awrusalim lu kanu Kanduli nu Kalipuas na tinalima nilan sekanin kanu kinauma nin lu sa Galili. Kagina nakatalabuk bun silan kanu entu a kanduli.
46 Guna su maitu na linemu menem 'bpaluman su Isa al-Masih kanu dalepa a sakup'u Galili a bedtuan sa Kana, su dalepa a lu nin ba binaluy a alak su ig. Na aden isa a upisial'u gubilnu a pendalu i wata nin a mama lu sa dalepa a Kapurnaum. 47 Na guna nin makineg i mimbalingan den su Isa al-Masih lu sa Galili ebpun sa Yudia na pibpawangan nin ka pinamitialan nin sekanin sa lemu pan sa Kapurnaum ka enggu nin makapagkapia su wata nin a pebpaya den. 48 Na nia pidtalu nu Isa al-Masih sa lekanin na “Sekanu na di kanu man malitiala nia tabia na makailay kanu pan sa kangagaipan a kabarakatan.” 49 Ugaid'a makin pidtalu nu upisial sa lekanin i “Mapulu, u mapakay bu na unut ka pan sa laki asal'a di matay su wata ku a pinadtaya.” 50 Nia lun pidtalu nu Isa al-Masih na “Uli ka den ka migkapia den su wata nengka.” Na pinalitialan nu mama su pidtalu nu Isa al-Masih sa lekanin taman sa minuli mambu sekanin.
51 Na sia pan sa lalan su upisial na inalaw den sekanin nu manga panunugun nin ka pidtalu nilan lun i “Migkapia den su wata nengka.” 52 Na inidsa nin kanilan u ngin i uras a kinagkapia nin. Na nia nilan lun inisawal na “Kagay, sa uras a ikapitu sa magabii i kinagkapia nin.” 53 Na nagkalendem'u ama nu wata i entu bun ba su uras a kinadtalu nu Isa al-Masih sa lekanin sa “Su wata nengka na migkapia den.” Na sabap sa entu na sinemalig sekanin kanu Isa al-Masih taman den kanu langun nu sakambinabatan nin. 54 Na nia den ba su ikadua a tanda a kagaipan a pinggula nu Isa al-Masih sia sa Galili iganat kanu kinambalingan nin ebpun sa Yudia.