Su Kinapagkapia nu Isa al-Masih kanu Mama sa kanu Gay nu Kabpangintelenen
5
Kanu ulian nu entu na mimbalingan su Isa al-Masih lu sa Awrusalim ka aden lu kanduli nu manga Yahudi. 2 Na aden pebpaiguan lu a masupeg kanu Bengawan nu manga Bili-bili.a Na bedtuan i entu sa Bidsata sia kanu basa nu manga Yahudi. Sia kanu embala-bala a ligid'in na inatepan.b 3-4 Na lu ba namakaiga su madakel a 'bpamedsakit a mana su di pamakailay, di pamakalakaw enggu su manga minatay i lawas'in.c5 Na aden lu sakataw a mama a nakatelupulu enggu walu lagun den i kapendalu nin. 6 Na nailay sekanin nu Isa al-Masih a 'bpagiga enggu natawan nin i nauget den i kapendalu nin. Na nia nin lun inidsa na “Kalinian nengka i 'gkapia ka?” 7 Na nia inisawal'u mama a pendalu na “Uway mambu datu, ugaid'a dala man pakatabang sa laki asal'a makatibpu aku kanu pebpaiguan a nan amaika pembugabulen su ig. Na gagalu nu kabpelulud ku lu na aden den 'gkauna sa laki pedtibpu.”p 8 Na nia pidtalu nu Isa al-Masih sa lekanin na “Embangun ka! Kua ka i ikam'engka a nan ka lakaw ka den.” 9 Na midsambuta demun i kinagkapia nu mama taman sa kinua nin su ikam'in ka linemakaw.
Saleta mambu na kanu entu ba a gay na Gay nu Kabpangintelenen.d 10 Tembu pidtalu nu 'gkangaunutan nu manga Yahudi kanu mama a pinagkapia i “Di 'gkawagib a pananggiten nengka i ikam'engka a nan ka Gay nu Kabpangintelenen saguna.” 11 Na nia inisawal'u mama kanilan na “Su napagkapia sa laki i midtalu sa ‘Kua ka i ikam'engka a nan ka lakaw ka den.’ ” 12 Daka inidsa nilan lun i “Entain i mama a midtalu sa leka sa ‘Kua ka i ikam'engka enggu lakaw ka den’?” 13 Ugaid'a su mama na da nin katawi u entain su napagkapia lun kagina su Isa al-Masih na minawa lu a da nin kasipati ka madakel a taw.
14 Na ulian nu entu na nauman sekanin nu Isa al-Masih lu sa lama-lama nu Suti a 'Bpagagaman, na nia nin lun pidtalu na “Nah! Migkapia ka den. Da ka den penggula sa kabaladusan asal'a di ka den makatala sa labi lawan pan lu.” 15 Daka linemu su mama kanu 'gkangaunutan nu manga Yahudi ka inipanudtul'in i su Isa al-Masih i napagkapia sa lekanin.
Su Sabapan a Kapedtalu nu Isa al-Masih sa Ama nin su Kadenan
16 Na guna su maitu na sabap sa pinggalebek'u Isa al-Masih su manga galebekan nin kanu Gay nu Kabpangintelenen na linudsuan sekanin mamungkaid'u 'gkangaunutan nu manga Yahudi. 17 Na nia pidtalu nu Isa al-Masih kanilan na “Su Ama ku na lalayun sekanin kanu kapenggalebek'in, na maitu aku bun ba.”
18 Na guna su maitu na makin inilutan nu 'gkangaunutan nu manga Yahudi su kabpaginagkay nilan sa kaimatay nilan kanu Isa al-Masih, dikena sabap bu kanu kinaawa nin sa kapantag kanu pangitaban pantag kanu Gay nu Kabpangintelenen ka inilepeng'in pan i ginawa nin kanu Kadenan kanu kinadtalu nin sa Ama nin demun su Kadenan.
19 Na nia pidtalu nu Isa al-Masih kanilan na “Saben-sabenal a pedtalun ku sa lekanu i di magaga kanu Tunggal i enggulan nin su apia ngin sa sekanin demun ka nia nin bu man penggulan na su ngin bu i 'gkailay nin a penggulan nu Ama nin. Ka u ngin i penggulan nu Ama nin na entu bun ba i penggulan nu Tunggal'in. 20 Na su Ama na ipegkalimu nin man su Tunggal'in, ipebpayag'in sa lekanin su langun nu penggulan nin. Na labi lawan pan sia ba i ipailay nin a kangagaipan a galebekan taman sa mangagaip kanu man. 21 Na amaika su Ama ka papembibiag sa namamatay na maitu bun ba su Tunggal'in kanu entain i pegkiugan nin papembibiag. 22 Na su Ama na dikena sekanin 'bpangukum kanu apia entain ka inisalig'in kanu Tunggal'in su langun nu kapangukum 23 asal'a su Tunggal'in na kapagadatan nu langun nu taw a mana bun su kabpagadat'ilan kanu Ama nin. Na apia entain i di magadat kanu Tunggal na timbang a su Ama bun a sinemugu sa lekanin i di nilan 'bpagadatan.
24 “Saben-sabenal a pedtalun ku sa lekanu i su 'bpakikineg kanu kadtalu ku enggu 'bpaginugut kanu sinemugu sa laki na aden den sa lekanin su uyag-uyag a da taman nin. Na di den makatala sa kasiksan ka nia pan mula na nalepas den sekanin kanu kapatay enggu naaden pan sa lekanin su bagu a uyag-uyag. 25 Na saben-sabenal a pedtalun ku bun sa lekanu i su kutika na nakatingguma den saguna a su namamatay na makineg'ilan den su suala nu Tunggal'u Kadenan. Na su makikineg lun na mauyag. 26 Na mana bun su Ama a 'gkabpunan nu uyag-uyag na maitu bun ba su Tunggal'in na 'gkabpunan bun nu uyag-uyag kagina su Ama i minenggay sa lekanin sa kawagib sa kanu entu. 27 Na inenggay nin bun sa lekanin su kawagib sa kapangukum kagina sekanin su Kaka nu Manusia.
28 “Na da kanu 'gkangagaip kanu pidtalu ku a nia ka makatingguma den man su kutika a su langun nu namamatay na makineg'ilan su suala nu Tunggal'u Kadenan lu kanu manga kubul'ilan. 29 Na embuat silan, na su langun nu minggalebek sa mapia na makatalima sa uyag-uyag a da taman nin ugaid'a su langun nu minggalebek sa mawag na masiksa taman sa taman.
30 “Na di masulut a enggulan ku i apia ngin sa saki bu. Na nia ku man ipegkukum kanilan na u ngin bu i pedtalun nu Ama ku sa laki tembu wagib su kabpangukum ku kagina dikena su kahanda ku demun i 'bpagunutan ku ka su kahanda nu sinemugu sa laki.
31 “Na amaika saki bu i 'bpangimbenal kanu ginawa ku na di gaid kapalitialan. 32 Ugaid'a aden paman salakaw a 'bpangimbenal makapantag sa laki a mana su Ama ku. Na katawan ku i benal su ibpangimbenal'in makapantag sa laki.
33 “Na sekanu demun mismu i napasugu lu kanu Yahiya taman sa inipangimbenal'in sa lekanu u ngin i bantang makapantag sa laki. 34 Ugaid'a dikena ku man 'gkapaginagkay su kapangimbenal'u manusia. Ka nia ku bu kinalabit sa nia na basi maginugut kanu na malipuas kanu. 35 Na su Yahiya na mana bun su palitan a tinutudan na sangat a nagalawan nu sa nangagan bu su tayaw nin. 36 Ugaid'a aden pan labi kanu pangimbenal'u Yahiya makapantag sa laki. Su galebekan a inenggay nu Ama ku sa laki a dait a talutupen ku na pebpagamad den i entu makapantag sa laki sa saben-sabenal a su Ama i sinemugu sa laki. 37 Na su Ama a sinemugu sa laki na inipangimbenal aku nin. Na da nu a benal makineg su suala nin enggu da nu a benal mailay i palas'in. 38 Na su kadtalu nin na da makapamula kanu pamusungan nu kagina di nu 'bpaginugutan su sinugu nin. 39 Na pendalidipen nu den pedtandang 'bpangagi su kitab kagina nia nu lun kataw na lu nu ba makua su uyag-uyag a da taman nin inunta na su nia bun ba a kitab i 'bpangimbenal makapantag sa laki. 40 Na di kanu bun pedsupeg sa laki asal'a kaadenan kanu nu uyag-uyag a da taman nin.
41 “Dikena ku 'gkapaginagkay su pugi nu manusia. 42 Ka katawan ku i sekanu na dala sa lekanu su limu kanu Kadenan. 43 Na saki na sinemia aku sia nakanggulalan kanu ingala nu Ama ku ugaid'a dala aku nu talima. Inunta na amaika aden semia a nia nin bu nadtatanggit na lekanin demun a bagel na entu ba i pedtaliman nu. 44 Na panun ba man i kapaginugut'u kanu kadtalu ku? Ka dikena nia nu 'bpaginapasen su pugi a ebpun kanu kaisa-isa nin a Kadenan ka nia balapantag sa lekanu na su pugi nu uman i isa sa lekanu.
45 “Di nu magitung i saki i semendit sa lekanu sia kanu kaadapan nu Ama ka su Musa mismu a 'gkainam'u a makapalipuas sa lekanu i semendit sa lekanu lu kanu kaadapan nu Ama. 46 Na amaika 'bpaginugutan nu su Musa na nia dait na paginugutan aku nu bun kagina su inisulat'in na makapantag man sa laki. 47 Ugaid'a amaika di nu 'bpaginugutan su inisulat'in na panun ba i kapaginugut'u kanu kadtalu ku?”