Su Kinapakan nu Isa al-Masih kanu Madakel a Taw
6
Guna maipus su entu, na aden isa a gay a linemipag su Isa al-Masih lu kanu sebangan nu lanaw nu Galili a bedtuan bun sa lanaw nu Tibirias. 2 Na madakel a benal a manga taw i midtatanggunut sa lekanin sabap kanu nangailay nilan a kangagaipan a tandaa a pinggula nin kanu 'bpamedsakit. 3 Na tinemakedeg su Isa al-Masih lu kanu bakulud enggu minayanb sekanin lu a kaped'u 'bpamangunut lun. 4 Saleta mambu na mangagan den 'gkauma su Kanduli nu Kalipuas a kanduli nu manga Yahudi.5 Na guna tengab su Isa al-Masih na nasandeng'in su madakel a taw a pakauma lu sa lekanin. Daka inidsa nin kani Pilipus i “Endaw tanu makapamasa sa makan a makapakan kanu manga taw a nia?” 6 Ugaid'a nia nin bu kinadtalu kani Pilipus sa entu na binatalu nin bu sekanin kagina 'gkatawan bun nu Isa al-Masih u ngin i enggulan nin. 7 Na nia inisumpat'i Pilipus na “Apia walu ulan pan a sukay na taw i alaga na ipamasa sa makan na di bun makadtun kanu langun nu manga taw a nia, nia taman na makasawit bu sa paidu su ped kanilan.” 8 Na si Anduk a suled'i Simiun Pitru a isa bun kanu 'bpamangunut kanu Isa al-Masih na pidtalu nin kanu Isa al-Masih i 9 “Aden a nia wata a mama a aden lima timan a panc nin enggu dua timan a seda. Ugaid'a panun i kadtun nin i nia kanu madakel a nia a taw?”
10 Na nia pidtalu nu Isa al-Masih na “Paayan nu i manga taw a nan.” Na su entu a dalepa na damautan,d na lu den ba silan namagagayan kanu damautan. Na nia kadakel'u manga mama bu na lima ngibu.e 11 Na kinua nu Isa al-Masih su pan ka midsukul-sukul kanu Kadenan entu pan ka inipatalagad'in lu kanu manga taw a namagagayan, na maitu bun ba i pinggula nin kanu seda. Na kineman den silan sa endaw i taman a kiug'ilan. 12 Na guna su nangausug den silan na pidtalu nu Isa al-Masih kanu 'bpamangunut lun i “Limud'u su nangasama ka enggu di kandalatan.” 13 Guna su maitu na linimud'ilan den mambu su entu. Na nia nalimudan nu nangasama nu taw keman ebpun kanu lima timan bu a pan na sapulu enggu dua kabukag.
14 Na su manga taw a namakailay kanu tanda a pinggula nu Isa al-Masih na nia nilan 'gkangadtalu na “Natalatantu i nia den ba su Nabif a makatingguma sia sa dunia.” 15 Na 'gkatawan nu Isa al-Masih i 'bpawangan sekanin nu manga taw a entu ka kuan nilan sekanin sa tegel ka pandatun nilan. Daka guna su maitu na minundul menem sekanin temakedeg lu kanu bakulud sa sekanin bu.
Su Kinalakaw nu Isa al-Masih kanu Liwawaw nu Lanaw
16 Na guna su pedsukilep den na mimbaba su 'bpamangunut kanu Isa al-Masih lu kanu ligid'u lanaw. 17 Na malibuteng den na dala pamun makauma su Isa al-Masih. Guna su maitu na nageda sa awang su 'bpamangunut lun ka linemipag silan kanu lanaw 'bpawang sa dalepa a Kapurnaum. 18 Na da matana-tana na sinemanggiup kanu lanaw su mabandes a sambel taman sa mimbagel sa masela su lanaw. 19 Na guna su manga nem kakilumitru den i kinatangka nu 'bpamangunut lun na nailay nilan a 'bpelakaw su Isa al-Masih kanu liwawaw nu lanaw a pedsupeg lu kanu awang'ilan. Na sangat a nagilekan silan. 20 Ugaid'a nia pidtalu nu Isa al-Masih kanilan na “Da kanu 'gkagilek ka saki man i nia.” 21 Guna su maitu na napia i ginawa nilan mapapageda kanu Isa al-Masih lu kanu awang. Na endaw i kinapageda nu Isa al-Masih na nakatekaw demun nakadunggu su 'bpagedan nilan a awang lu kanu pendungguan nilan.
Su Makan a Makaenggay sa Uyag-uyag a Da Taman nin
22 Na kanu temundug a gay na lu pamun kanu lipag'u lanaw su madakel a taw a pinakan nu Isa al-Masih. Katawan nilan i dala unut gemanat su Isa al-Masih kanu 'bpamangunut lun. Katawan nilan bun i dala den ped a awang lu ka entu bu ba a pinagedan nu 'bpamangunut lun a entu. 23 Na da matana-tana na aden manga awang a nakadunggu a ebpun sa Tibirias a lu dinemunggu kanu dalepa a masupeg kanu kinanan nu madakel a taw sa pan ulian nu kinadsukul-sukul lun nu Mapulu a su Isa al-Masih. 24 Na guna kaimamani nu madakel a taw i dala den lu su Isa al-Masih enggu apia su 'bpamangunut lun na dala den lu na nageda silan kanu manga awang a entu 'bpawang sa Kapurnaum ka pangilayn nilan lu su Isa al-Masih. 25 Na guna nilan mailay sekanin lu kanu lipag'u lanaw na nia nilan lun nakaidsa na “Gulu, kanu i kinasia nengka?” 26 Na nia inisawal'u Isa al-Masih kanilan na “Saben-sabenal a pedtalun ku sa lekanu i dikena nia nu kabpangilay sa laki i sabap sa nakailay kanu sa manga tanda a kagaipan ka sabap sa nakakan kanu kanu pan taman sa nangausug kanu. 27 Da kanu penggalebek asal'a makakua kanu bu kanu makan a pegkalat ka nia nu paginapas enggalebek na kakua nu kanu makan a di 'gkalat a makaenggay sa uyag-uyag a da taman nin. Na su Kaka nu Manusia i makaenggay kanu namba a makan ka su Ama a su Kadenan mismu i napaamad sa sekanin su pinamili nin.”
28 Guna su maitu na nia nilan pidtalu sa lekanin na “Ngin i enggulan nami a makanggulalan nami su manga inibpaliugat'u Kadenan?” 29 Na nia inisumpat'u Isa al-Masih kanilan na “Nia inibpaliugat'u Kadenan na saligi nu su sekanin a entu a sinugu nu Kadenan.”
30-31 Daka nia nilan pidtalu sa lekanin na “Amaika maitu na ngin i tanda a makapailay nengka sa lekami asal'a makapalitiala kami sa leka? Su manga kalukesan tanu na kinan nilan su pang lu kanu tawan-tawan a dalepa a mana bun su nakadalem kanu kitab a ‘Nia nin inenggay kanilan na su pan a ebpun sa sulega.’ Na seka mambu, ngin i manggalebek'engka?” 32 Daka nia pidtalu nu Isa al-Masih kanilan na “Saben-sabenal a pedtalun ku sa lekanu i dikena su Nabi Musa i minenggay sa lekanu sa makan a ebpun sa sulega ka su Ama ku. Sekanin bun i 'bpagenggay sa lekanu sa tidtu a makan ebpun sa sulega. 33 Na su makan ba a nia a ibpagenggay nu Kadenan na su 'bpangalimbaba ebpun sa sulega a pakaenggay sa bagu a uyag-uyagh kanu manusia.” 34 Na nia nilan pidtalu kanu Isa al-Masih na “Gulu, iganat saguna na pangenggi kami pan kanu namba a makan.” 35 Daka nia pidtalu nu Isa al-Masih kanilan na “Saki man su entu a makan a 'bpagenggay sa bagu a uyag-uyag. Na apia entain i semia sa laki taman sa semalig sa laki na di den magutem enggu di den kamalan taman sa taman. 36 Ugaid'a mana bun su nadtalu ku sa lekanu a apia nangailay nu bun su kabarakatan a pinggalebek ku na di kanu bun pedsalig. 37 Na su langun nu ipedsalig'u Ama sa laki na semia silan sa laki, na su pedsia a entu sa laki na di ku a benal bugawn. 38 Kagina dikena nia sabap a kinambaba ku sia ebpun sa sulega i nia ku paginugutan na su kahanda nu ginawa ku demun ka su kahanda nu sinemugu sa laki.
39 “Na nia ba i kahanda nu sinemugu sa laki, su langun nu inisalig'in sa laki na dala madala lun ka nia pan mula na pambibiagen ku silan kanu Gay a Mauli. 40 Ka nia ba man i pigkahanda nu Ama ku na su langun nu pakailay kanu Tunggal'in taman sa pedsalig sa lekanin na maaden kanilan su uyag-uyag a da taman nin enggu pambibiagen ku silan sia kanu Gay a Mauli.”
41 Guna su maitu na 'bpamagedunga su manga taw pantag sa lekanin sabap kanu kinadtalu nin sa “Saki su makan a mimbaba ebpun sa sulega.” 42 Na nia nilan 'gkangadtalu na “Dikena ba sekanin si Isa a wata ni Yusup? Na panun a entu i kapedtalu nin sa mimbaba sekanin ebpun sa sulega? Inunta na katawan tanu a benal u entain su ama nin enggu ina nin.” 43 Daka nia pidtalu nu Isa al-Masih kanilan na “Telen kanu san 'bpamagedunga. 44 Ka da man isa a makagaga semia sa laki nia tabia na pasianen pan nu Ama ku a sinemugu sa laki. Na su semia sa laki na pambibiagen ku kanu Gay a Mauli. 45 Ka nia man nakadalem kanu inisulat'u manga nabi sia kanu kitab na ‘Pamandun silan langun nu Kadenan.’i Na apia entain i nakakineg kanu Ama taman sa nakatuntay lun na sekanin su pedsia sa laki. 46 Na dikena nia nin maena i nailay nu apia entain su Ama a su Kadenan ka nia bu nakailay lun na su sekanin demun a entu a ebpun kanu Kadenan.
47 “Na saben-sabenal a pedtalun ku sa lekanu i su pedsalig na aden sa lekanin su uyag-uyag a da taman nin. 48 Na saki man su entu a makan a 'bpangenggay sa uyag-uyag. 49 Na su manga kalukesan nu a kineman sa pang lu kanu tawan-tawan a dalepa na namamatay bun silan langun. 50 Ugaid'a su makan a nia a pembaba ebpun sa sulega na apia entain i makakan lun na di den makatala sa kapatay.j 51 Na saki man su entu a makan a mimbaba ebpun sa sulega a pakaenggay sa bagu a uyag-uyag. Na u entain i makakan kanu nia a pegken na di den temala sa kapatay. Na su nia ba a makan a ibpangenggay ku a pakaenggay sa uyag-uyag kanu manusia na su badan ku.”k
52 Na guna su maitu na mibpapalawa su manga Yahudi sa nia nilan 'bpamedtalun na “Panun i kaenggay nu nia a mama kanu badan nin sa lekitanu asal'a makan tanu?” 53 Daka nia pidtalu nu Isa al-Masih kanilan na “Saben-sabenal a pedtalun ku sa lekanu i di kanu kaadenan na bagu a uyag-uyag nia tabia na makan nu pan su badan nu Kaka nu Manusia enggu mainem'u su lugu nin. 54 Na su pegkan kanu badan ku enggu 'bpaginem kanu lugu ku na naaden den sa lekanin su uyag-uyag a da taman nin enggu pambibiagen ku kanu Gay a Mauli. 55 Ka su badan ku man i tidtu-tidtu a makan enggu su lugu ku i tidtu-tidtu a 'bpaginemen. 56 Na su pegkan kanu badan ku enggu 'bpaginem kanu lugu ku na mapalalayun sekanin sia sa laki enggu mapalalayun aku bun sa lekanin. 57 Na su Ama a 'gkabpunan na uyag-uyag i sinemugu sa laki. Na 'bpaguyag-uyag aku sabap sa lekanin.l Na maitu bun ba menem su pegkan kanu badan ku, sabap sa lakic na maaden kanilan su bagu a uyag-uyag. 58 Na su makan ba a nia na su mimbaba ebpun sa sulega, dikena pagidsan kanu kinan nu manga kalukesan nu a namamatay bun silan. Su pegkan kanu nia a makan na di den temala sa kapatay taman sa taman.” 59 Na su langun nu entu ba na lu pidtalu nu Isa al-Masih kanu kabpamandu nin lu kanu walay a pedsambayangan nu manga Yahudi sa Kapurnaum.
60 Na guna makineg'u 'bpamangunut kanu Isa al-Masih su panduan nin a entu na madakel kanilan i midtalu sa “Mapasang i nia a panduan, entain i makatika lun i nia temalima?” 61 Na 'gkatawan bun nu Isa al-Masih i 'bpamagedunga su 'bpamangunut lun pantag kanu entu a panduan nin, daka nia nin pidtalu kanilan na “Ngintu, 'gkasik i atay nu pantag sa nia? 62 Na amaika maitu na ngin basi i mapagitung'u amaika nia nu den mailay su kabpapulu nu Kaka nu Manusia lu kanu nabpunan nin? 63 Dikena man nia nin maena i su badan i 'bpagenggay sa bagu a uyag-uyag ka su Ruh, ka su badan na dala man magaga nin kanu entu. Na su nia ba a manga panduan a pidtalu ku sa lekanu na ebpun kanu Ruh enggu 'bpagenggay sa bagu a uyag-uyag. 64 Ugaid'a aden bun sa lekanu i di 'bpalitiala.” Na pidtalu i entu nu Isa al-Masih kagina iganat pan sa ganatan na 'gkatawan nin bun u entain i di 'bpamaginugut sa lekanin enggu entain i temipu sa lekanin. 65 Na pidtalu pamun nu Isa al-Masih kanilan i “Namba i sabap'in i kinadtalu ku sa lekanu sa da man isa a makagaga semia sa laki nia tabia na 'gkahandan pan nu Ama.”
66 Na iganat kanu entu a kutika na madakel kanu 'bpamangunut lun i minitas sa lekanin enggu da den silan edtatanggunut sa lekanin. 67 Daka inidsan nu Isa al-Masih su sapulu enggu dua a pinamili ninm sa “Ngintu, apia sekanu na pegkiugan aku nu bun pebpitas?” 68 Na nia inisawal'i Simiun Pitru na “Mapulu, entain pan besen i 'bpawangan nami? San bu sa leka su manga kadtalu a pakaenggay sa uyag-uyag a da taman nin. 69 Na 'bpaginugut kami enggu katawan nami i saben-sabenal a seka su Suti a ebpun kanu Kadenan.” 70 Na nia mambu inisumpat'u Isa al-Masih kanilan na “Dikena ba man saki i namili sa lekanu a sapulu enggu dua? Ugaid'a apia ka maitu na isa sa lekanu i luyud kanu saitan.” 71 Na nia nin ba a entu pedtumbuken na si Yahuda a wata ni Simiun Iskalia. Kagina sekanin ba a nia a isa bun kanu sapulu enggu dua i temipu kanu Isa al-Masih.