Su Isa al-Masih na dala Talima lu kanu Dalepa nin demun
6
Na ginemanat su Isa al-Masih kanu entu a dalepa ka linemu kanu dalepa nin a Nasarit. Na inunutan mambu sekanin nu 'bpamangunut lun kanu kinalu nin. 2 Na guna den menem mauma su Gay nu Kabpangintelenen na linemudsu menem sekanin mamandu lu kanu pedsambayangan nu manga Yahudi. Na su madakel a taw a namakakineg sa lekanin na sangat a nangagaip taman sa nia nilan 'gkangadtalu na “Endaw nakua nu taw a nia su langun nu kataw nin? Ngin den mambu a ilemu i initulun a nia sa lekanin! Panun a nan ka pakanggalebek sekanin sa kabarakatan? 3 Dikena ba panday bu sekanin a wata ni Mariam enggu su manga suled'in a mama na si Yakub, Yusi, Yahuda enggu Simiun? Dikena ba su manga suled'in a babay na kaped tanu bun sia?” Guna su maitu na nasakit i ginawa nilan sa lekanin. 4 Daka nia pidtalu nu Isa al-Masih kanilan na “Apia endaw na 'bpagadatan su nabi tabia bu kanu dalepa nin demun enggu kanu pamilia nin taman den kanu manga pagali nin.” 5 Kagina ka maitu na di pakanggula lu su Isa al-Masih sa kabarakatan nia tabia na kapapegkapia nin bu kanu ped a sakiten lu sa ukit a kapendapenet'in lun. 6 Na nagaipan nu Isa al-Masih su kada na salig'ilan.Su Kinasugu nu Isa al-Masih kanu Sapulu enggu Dua a Pinamili nin a 'Bpamangunut lun
Na tinaneb-taneb'u Isa al-Masih su embala-bala a inged lu ka namamandu lu ba. 7 Na linimud'in su sapulu enggu dua a pinamili nin ka sinugu nin silan sa enggaga-dua kataw enggu inenggan nin silan sa bagel sa kapamugaw sa manga saitan. 8 Na pinanutuman nin silan sa dala pananggiten nilan kanu kandadalakaw nilan nia tabia na tudek bu, dala pegken, dala taguan a apia ngin enggu dala kuleta kanu uyut'ilan. 9 Na mapakay a edsandal silan ugaid'a di silan mananggit sa ped pan a balegkas. 10 Na nia nin pan pidtalu kanilan na “Apia endaw i kaludepan nu a walay na lu kanu den ba tumpa taman sa kaganat'u menem kanu entu a dalepa. 11 Na apia endaw menem a dalepa i dili temalima enggu makikineg sa lekanu na ganati nu taman sa ipubpug'u su libubuk'u ay nua kanu kasangulan nu manga taw lu a amadan sa sungkang kanilan.” 12 Daka ginemanat den mambu lu su manga sinugu nin ka inipangusiat'ilan i dait a edtataubat su manga taw. 13 Na madakel a taw i nabugawan nilan sa manga saitan enggu madakel bun a manga sakiten i nakapagkapia nilan sa ukit a kinadapenet'ilan lun sa lana.
Su Ukit a Kinapatay nu Yahiya a 'Bpanalawat
14 Na nakauma sa pakinegan ni Datu Hirudb su langun nu entu kagina 'gkabadtug den a benal su ngala nu Isa al-Masih. Nia kataw nu ped a manga taw na “Mimbibiag 'bpaluman su Yahiya a Nanalawat tembu ba pakanggalebek sekanin sa manga kabarakatan.” 15 Ugaid'a nia menem pedtalun nu ped a manga taw na “Sekanin su Nabi Ilias.”c Su ped menem na “Isa sekanin a nabi a mana bun kanu manga nabi paganay.”
16 Na kanu kinakineg'i Hirud kanu entu na nia nin nadtalu na “Mimbibiag 'bpaluman su Yahiya a pinaputukan ku sa ulu.” 17 Kagina si Hirud man i napasigkem enggu napapawik kanu Yahiya ka inipabilanggu nin asal'a kasuatan sekanin nu kaluma nin a si Hirudias a danden a kaluma nu suled'in a si Pilipus. Kagina tatap sekanin pedtaluan nu Yahiya 18 sa “Dikena wagib a pinangaluma nengka su kaluma nu suled'engka.” 19 Na sabapan i entu na kinabensi a benal ni Hirudias kanu Yahiya taman sa kiugan nin sekanin mimatay. Ugaid'a di nin i entu 'gkanggula 20 sabap sa 'bpagingatan ni Hirud sa da manggula nin su Yahiya kagina si Hirud na aden gilek'in kanu Yahiya sabap sa katawan nin i ikelas enggu suti sekanin a taw. Na apia 'gkalingasa a benal i ginawa nin sa kapakikineg'in kanu Yahiya na kalilinian nin bun gaid sekanin mamakikineg.
21 Na nakauma su mapia a kutika kani Hirudias, kanu timpu a kapedsela-sela kanu gay nu kinambata kani Hirud a inenggat'i Hirud su 'gkangasaligan nin a manga mapulu taman den kanu manga mapulu nu sundalu enggu kanu manga balapantag a manga taw sa Galili 22 na su wata ni Hirudias a laga na linemudep ka midsagayan. Na nakasuat i entu kanu ginawa ni Datu Hirud taman den kanu manga ana nin. Daka nia nin pidtalu kanu laga na “Pangeni ka den sa laki i apia ngin a pegkiugan nengka ka inggay ku sa leka,” 23 taman sa inibpasad'in pan sa mabagel i “Apia ngin i pangenin nengka sa laki na inggay ku sa leka apia sabad pan kanu pendatuan ku.” 24 Daka linemiu su laga ka inidsa nin kanu ina nin i “Ngin i pangenin ku?” Na nia inisumpat'u ina nin na “Su ulu nu Yahiya a 'Bpanalawat.” 25 Na namagayas menem sekanin lemudep ka pidtalu nin kani Datu Hirud i “Nia ku 'gkalinian na inggay nengka saguna demun su ulu ni Yahiya a 'Bpanalawat, sia nengka ibetad sa lampay.” 26 Na sangat a nalidu i ginawa ni Datu Hirud ugaid'a sabap sa nakadsapa nin sia kanu adapan nu manga ana nin su entu na di nin 'gkalilinian a kabpalawan nin su laga. 27 Daka entu demun ba na inisugu ni Datu Hirud kanu sakataw kanu manga tameng'in i pananggiten sa lekanin su ulu nu Yahiya. Na ginemanat mambu su tameng ka pinutukan nin sa ulu su Yahiya lu kanu bilangguan. 28 Na guna su mimbalingan su tameng na nait'in den su ulu nu Yahiya a inibetad sia sa lampay ka inenggay nin kanu laga. Entu pan ka inenggay menem'u laga kanu ina nin. 29 Guna makineg'u 'bpamangunut kanu Yahiya su nanggula nin na kinua nilan su bangkay nin ka inikubul'ilan.
Su Kinapagkadakel'u Isa al-Masih kanu Pan enggu Seda a Inipakan kanu Madakel a Taw
30 Na su manga sinugu nu Isa al-Masih a makapangusiat na mindidilimudan lu sa lekanin ka pinanudtul'ilan su langun nu pinggalebek'ilan enggu su inipamamandu nilan. 31 Na sabap sa madakel a benal i manga taw a pedsusulanga den 'bpelu kanilan na apia su kapegkan nilan na di nilan den pakasengel. Daka pidtalu nu Isa al-Masih kanilan i “Sia kanu ka lemu tanu sa nakadtawan-tawan a dalepa ka enggu tanu makapangintelenen sa paidu.” 32 Na ginemanat mambu silan a nageda sa awang ka linemu den silan kanu nakadtawan-tawan a dalepa. 33 Na kanu kapengganat'ilan na madakel i nakailay kanilan taman sa nakilala silan nu manga taw. Guna su maitu na midtatalaguy den su manga taw a entu a ebpun den kanu embala-bala a inged ka linemu silan kanu pebpawangan nu Isa al-Masih enggu su manga sinugu nin taman sa silan pan i nauna nakauma kanilan lu. 34 Na endaw i kinatepad'u Isa al-Masih na nailay nin su madakel a benal a taw. Na nalat i nanam'in kanilan ka mana silan manga bili-bili a dala pedtuganul lun. Kagina ka maitu na pinamamandu nin silan sa madakel a panduan.
35 Na guna su pedsukilep den na sinemupeg kanu Isa al-Masih su manga sinugu nin a 'bpamangunut lun ka nia nilan pidtalu sa lekanin na “Pedsukilep den na nakadtawan-tawan i nia a dalepa, 36 paganat ka den i manga taw a nia asal'a makalu silan kanu manga inged ka enggu silan makapamasa sa makan nilan.” 37 Ugaid'a nia pidtalu nu Isa al-Masih kanilan na “Sekanu i enggay kanilan sa makan.” Daka nia nilan nakasumpat na “Panun i kanggula sa entu? Ka amaika maitu na nasisita nami i mamasa sa makan a alaga na timbang a pila ulan a sukayd na gumagalebek asal'a makakan silan langun.” 38 Daka nia pidtalu nu Isa al-Masih kanilan na “Ilay nu kun na u ngin i kadakel a makan san.” Na guna nilan den mailay na pidtalu nilan sa lekanin i “Lima timan bu a pan enggu dua timan a seda.”
39 Daka inisugu nin kanu manga taw i endudulumpuk silan mayan lu kanu damautan. 40 Na mindudulumpuk den mambu silan magagayan sa aden enggaga-magatus enggu aden enggaga-limapulu kataw. 41 Daka kinua nu Isa al-Masih su lima timan a pan enggu su dua timan a seda ka tinemingada kanu langit ka midsukul-sukul enggu pinugi nin su Kadenan. Entu pan ka pidtebi-tebi nin su manga pan ka inenggay nin kanu 'bpamangunut lun ka enggu nilan makatalagad kanu madakel a taw. Na maitu bun ba su seda a dua timan, pinamagumun nin bun kanilan. 42 Na nakakan su langun nu taw taman sa nangausug silan. 43 Na aden pan nangasama nu manga taw keman a nia kadakel a nalimudan lun na sapulu enggu dua kabukag. 44 Na su manga mama bu a nakakan na lima ngibu den i kadakel'in.e
Su Kinalakaw nu Isa al-Masih kanu Liwawaw nu Lanaw
45 Na endaw i kinapasad'u entu na pinapageda mamagayas'u Isa al-Masih su 'bpamangunut lun lu kanu awang ka pinauna nin silan lemipag lu kanu dalepa a Bitsaida. Saleta mambu na pinauli nin den su madakel a taw. 46 Na guna su namakaganat den silan na tinemakedeg sekanin lu kanu palaw ka nangeni-ngeni.
47 Daka guna su pedsukilep den na lu den sa kalud su awang a pinagedan nu 'bpamangunut lun, saleta mambu na su Isa al-Masih na natalipulu bun den lu kanu palaw. 48 Na nasandeng'u Isa al-Masih silan a 'gkapasangan a benal pebpula sabap sa 'gkadsumbak'ilan su sambel. Na kanu manga magan den mapita na tinemundug su Isa al-Masih kanilan a linemakaw bu kanu liwawaw nu lanaw. Na nia nin kahanda na lampasan nin silan. 49 Ugaid'a guna nilan sekanin mailay na nia nilan lun kataw na manginggilek. Na nakalalis silan langun 50 kanu kinailay nilan lun ka nangagilekan a benal silan. Ugaid'a midtalu mamagayas su Isa al-Masih sa “Da kanu 'gkagilek ka saki man i nia. Pagkabagel'u i manggiginawa nu.” 51 Daka nageda sekanin kanu awang'ilan. Na endaw i kinapageda nin na napenek su sambel. Na sangat a nangagaip silan. 52 Ka apia man nambamatan nilan den su kinapagkadakel'u Isa al-Masih kanu pan enggu seda na di nilan pamun 'gkatuntayan u entain su Isa al-Masih sabap sa di pamun i entu 'gkasaut'a pamikilan nilan.
53 Na kanu kinalipag'ilan na lu silan nakabpawang kanu dalepa a Ginisarit. Daka lu den ba silan dinemunggu. 54 Na endaw demun i kapembaba nilan kanu awang na nakilala nu manga taw su Isa al-Masih. 55 Daka tinaneb-taneb mamagayas'u manga taw a entu su dalepa nilan ka pinamananggit'ilan lu kanu Isa al-Masih su manga taw a pendalu a sia inibetad sa ikam sa apia endaw pan sekanin pakambetad a 'gkakineg'ilan. 56 Na uman sekanin pakauma kanu manga dalepa, udi na kanu manga siudad udi na lu kanu manga dalem na 'bpananggiten nu manga taw su manga sakiten lu kanu 'gkalimudan nilan ka ibpamagayuk'ilan kanu Isa al-Masih i ipaami nin pan kanilan i apia bibil bu nu lambung'in. Na su langun nu namakaami kanu entu na migkapia.