Su Kinapagkapia nu Isa al-Masih kanu Mama a Inasukan na manga Saitan
5
Na nakadunggu su Isa al-Masih enggu su 'bpamangunut sa lekanin lu kanu lipag'u lanaw, lu kanu dalepa nu manga taw sa Girasa.a 2 Na kanu kinambaba nu Isa al-Masih kanu awang na nakatekaw demun sekanin sinumbak'u mama a lu nakabpun kanu manga lebeng. Su mama a nia na inasukan na saitan 3 enggu lu den ba sekanin pegkakaleben kanu 'bpamelebengan. Na da den pakagaga sa lekanin pebpawik, apia nia pan 'bpagusalen sa kapebpawik lun i sangkali na di den 'gkagaga. 4 Kagina tatap den sekanin pedsangkalian enggu pebpawiken ugaid'a 'gkagetas'in bun su sangkali kanu lima nin enggu 'gkalupet'in penggetas su sangkali kanu ay nin. Na da den isa pan a pakagaga lun pegkumpen. 5 Na magabi sa malamag na pendadalalis sekanin lu kanu 'bpamelebengan enggu lu kanu kabakuludan taman sa 'bpamalian nin sa manga watu su lawas'in.6 Na guna nin masandeng su Isa al-Masih na pidtatalaguyan nin semugiud 7 ka inilalis'in sa matanug i “Seka Isa a Tunggal'u Kadenan a Mapulu sa Langun, di aku nengka den 'bpelusudi. Idsapa nengka kanu Kadenan i di aku nengka 'bpelasaya.” 8 Na pidtalu nin i nia sabap sa pidtaluan sekanin nu Isa al-Masih sa “Saitan, awai ka i mama a nan!” 9 Na inidsan sekanin nu Isa al-Masih sa “Entain i ngala nengka?” Na nia nin inisumpat na “Nia ku ngala na Sakian-kian kagina madakel kami.” 10 Na inibpaliugat'in mangeni kanu Isa al-Masih i di silan paawan kanu entu a kalupan.
11 Na kanu entu ba na aden madakel a benal a manga taw sa lupa a papegkanen lu kanu pipi nu bakulud. 12 Daka inipamagayuk'u manga saitan mangeni kanu Isa al-Masih i “Lu kami nengka den paasuka kanu manga taw sa lupa a entu.” 13 Na sinugutan nin mambu silan. Guna su maitu na linemiu su manga saitan kanu mama ka minasuk silan lu kanu manga taw sa lupa. Daka su manga taw sa lupa a manga dua ngibu i kadakel'in na nakadtatalaguy silan lu kanu matibeng a bakulud taman sa namakatibpu silan kanu lanaw enggu nangaled.
14 Guna su maitu na su manga pedtuganul kanu manga taw sa lupa na midtatalaguy silan mamagayas lu kanu siudad taman den kanu manga embala-bala pan a manga dalepa ka pinanudtul'ilan su entu lu kanu manga taw. Na namelu mambu su manga taw ka enggu nilan mailay u ngin i nanggula.
15 Na guna silan makauma kanu Isa al-Masih na nailay nilan i 'bpagagayan den su mama a inasukan na sakian-kian na manga saitan enggu nakambalegkas den taman sa nakatidtu den i itungan nin. Daka nangagilekan silan. 16 Na su manga natabu demun kanu entu a nanggula na pidsinantal'ilan kanilan su ngin i nanggula nu mama a entu a inasukan na manga saitan enggu su nanggula nu manga taw sa lupa. 17 Daka inipamagayuk'ilan mangeni kanu Isa al-Masih i ganatan nin den su inged'ilan.
18 Na guna su 'bpageda den su Isa al-Masih kanu awang na su mama a inasukan na manga saitan na inipamagayuk'in mangeni kanu Isa al-Masih i paunuten nin sekanin. 19 Ugaid'a da sekanin suguti nu Isa al-Masih ka makin nin pidtalu sa lekanin i “Uli ka, ka panudtul ka kanu manga pagali nengka u ngin i manga pinggula nu Kadenan sa leka enggu panun i kinakalimu nin sa leka.” 20 Guna su maitu na ginemanat sekanin ka inipayapat'in manudtul lu kanu manga dalepa sa Dikapulisb su ngin i manga pinggula sa lekanin nu Isa al-Masih. Daka su langun nu nakakineg kanu entu na sangat a nangagaip.
Su Kabarakatan nu Isa al-Masih sa Kapagkapia enggu Kapambibiag 'Bpaluman
21 Na nageda su Isa al-Masih kanu awang ka linemipag menem kanu lanaw. Na guna sekanin makadunggu na nalimudan sekanin na madakel a benal a taw lu kanu ligid'u lanaw. 22 Na isa kanu 'gkangaunutan nu pedsambayangan nu manga Yahudi a bedtuan sa Yairus i linemu. Na endaw i kinailay nin kanu Isa al-Masih na sinemugiud kanu ay nin 23 ka inipakalimu-limu nin mangeni sa lekanin i “U mapakay bu sa leka na unut ka sa laki ka su wata ku a babay a papedtayan ku na pebpaya. Na u kadapenetan nengka bu kanu lima nengka na 'gkapia sekanin taman sa mauyag.” 24 Daka minunut mambu sa lekanin su Isa al-Masih.
Na madakel a benal i midtatanggunut sa lekanin taman sa pedsusumaga den su manga taw sa kapedsupeg'ilan lun. 25 Daka aden babay a nakasapulu enggu dua lagun den na pebpupulugu bu. 26 Na sangat a 'gkalasay den sekanin sa kapenggamut'u madakel den a taligamut taman sa naibped den su langun nu kaaden nin sa kapapenggamut'in ugaid'a da bun sekanin 'gkapia ka nia pan mula na makin pan nangiseg su sakit'in. 27 Nakineg'in su manga 'bpanudtulen nu manga taw pantag kanu Isa al-Masih. Daka lu kanu luk'u manga taw, lu kanu kataligkudanan nu Isa al-Masih na pinaginapas'u babay i kasupeg'in lun asal'a maami nin su balegkas'u Isa al-Masih 28 kagina nia nin 'gkadtalu kanu ginawa nin na “Apia maami ku bu su balegkas'in na 'gkapia aku den.” 29 Guna nin maami na midsambuta demun mambu i kinatelen nu kapebpupulugu nin. Na nagedam'in kanu lawas'in i naawa su sakit'in. 30 Na entu demun ba na nadsagipa nu Isa al-Masih i kinaliu nu kabarakat sia kanu ginawa nin daka sinangulan nin su madakel a taw ka inidsa nin i “Entain i minami a entu sa balegkas ku?” 31 Na nia nadtalu nu 'bpamangunut sa lekanin na “'Gkailay nengka den i madakel a manga taw a pakadsusumaga den sa kapedsupeg'ilan sa leka na idsa nengka pamun u entain i minami sa leka?” 32 Ugaid'a 'bpangingilayn bun nu Isa al-Masih u entain i minggula sa entu sa lekanin. 33 Na su babay a entu na 'gkatawan nin su ngin i nanggula. Na sinemupeg sekanin kanu Isa al-Masih a pegkegkel'a gilek taman sa sinemugiud sekanin ka pidtalu nin su ngin i bantang a nanggula. 34 Na nia pidtalu nu Isa al-Masih sa lekanin na “Manga dua na suled, su salig'engka i napagkapia sa leka, uli ka den sa malilintad ka su sakit'engka na naawa den.”
35 Na gagalu nu kapedtalu nu Isa al-Masih na aden namakauma a lu nakabpun kanu walay ni Yairus. Nia nilan pidtalu kani Yairus na “Su wata nengka na minatay den, di ka den 'bpagangga su Gulu.” 36 Ugaid'a dala ipamamantag'u Isa al-Masih su pidtalu nilan a entu ka makin nin pidtalu kani Yairus i “Da ka 'gkagilek, pakabagel ka su salig'engka.” 37 Na da ped a sinugutan nu Isa al-Masih a makaunut sa lekanin nia tabia na si Pitru bu enggu su edsuled a si Yakub enggu Yuhan. 38 Na guna silan makauma lu kanu walay ni Yairus na nailay nu Isa al-Masih i 'gkangabusiug enggu 'bpamanguliang sa matanug su manga taw lu. 39 Na guna silan makaludep kanu walay na nia pidtalu nu Isa al-Masih kanilan na “Nginan ka 'gkangabusiug kanu enggu 'bpamanguliang kanu? Dikena man minatay su wata a nan ka pedtulug bu sekanin.” 40 Na nadtatawan nilan su Isa al-Masih. Ugaid'a pinaliu silan langun nu Isa al-Masih ka nia nin bu inisama na su manga tagapeda nin, su ama nu wata enggu su ina nin. Entu pan ka linemudep silan lu kanu nabetadan nu wata. 41 Na inami nin sia sa lima su wata ka nia nin pidtalu lun na “Talita kum,” nia nin maena na “Bai, pedsugun ku seka sa embangun ka.” 42 Na entu demun ba na mimbangun mambu su wata a nakasapulu enggu dua lagun den i umul'in taman sa mindadalakaw sekanin. Daka sangat a nangagaip silan. 43 Na inibpaliugat'in semugu kanilan i apia sakataw na dala dait a edtaluan nilan kanu entu. Entu pan ka inisugu nin i enggan nilan sa makan su wata.