Su Kinapagkapia nu Isa al-Masih kanu Mama a di nin den Pakanggagalebek su Lawas'in
9
Na guna su maitu na nageda menem su Isa al-Masih kanu awang ka linemipag embalingan kanu siudad a pegkakalebenan nin. 2 Daka aden manga taw lu a pinananggit'ilan kanu Isa al-Masih su mama a pinaiga bu kanu 'bpagigan nin ka di nin den pakanggagalebek su lawas'in. Na guna mailay nu Isa al-Masih su salig'ilan sa lekanin na nia nin pidtalu kanu mama a di pakanggagalebek i lawas'in na “Dua na manga wata, embageli ka i manggiginawa nengka ka su kabaladusan nengka na inampun den.” 3 Saleta na aden mambu manga gulu nu pangitaban lu a nia 'gkangadtalu na ginawa nilan na “Pedsakutu i mamaa a nia.” 4 Ugaid'a 'gkatawan nu Isa al-Masih u ngin i 'gkatagu sa ginawa nilan taman sa pidtalu nin kanilan i “Nginan ka nia nu 'gkapagitung na mawag? 5 Ngin besen i malemu a edtalun ku, ‘Su kabaladusan nengka na inampun den’? Udi na ‘Embangun ka, ka lakaw ka’? 6 Ugaid'a ipaamad ku sa lekanu i su Kaka nu Manusia na aden kawagib'in sia sa dunia sa kapangampun nin kanu kabaladusan.” Daka nia nin pidtalu kanu mama a di nin den pakanggagalebek i lawas'in na “Embangun ka, kua ka i 'bpagigan nengka ka uli ka den.” 7 Daka mimbangun mambu su mama ka minuli. 8 Na guna mailay i entu nu madakel a taw na nangagilekan silan enggu napugi nilan su Kadenan ka sekanin man i 'bpangenggay kanu manusia sa man a kapegkagaga.Su Kinabaluy kanu Mataya sa Makadtatanggunut kanu Isa al-Masih
9 Na su kinatalus'u Isa al-Masih kanu kabpelalakaw nin na nailay nin su mama a bedtuan sa Mataya a 'bpagagayan lu kanu 'bpangubelan nin sa buwis. Na nia nin lun pidtalu na “Unut ka sa laki.” Daka midtindeg mambu sekanin ka minunut kanu Isa al-Masih. 10 Na kanu kapegkan nu Isa al-Masih lu kanu walay ni Mataya kaped'in su 'bpamangunut lun na madakel i naped'in keman a 'bpamangubela sa buwis enggu manga taw a dikena balaagama.b 11 Na guna madsusuliman nu manga taw a lusud kanu lumpukan a Parisiyu su entu na nia nilan pidtalu kanu 'bpamangunut kanu Isa al-Masih na “Nginan ka pegkan i gulu nu a nan kaped'u 'bpamangubela sa buwis enggu manga taw a dikena balaagama?” 12 Na guna makineg'u Isa al-Masih su entu na nia nin pidtalu kanilan na “Dikena man nia pakanasisita sa taligamut su manga taw a dala sakit'in ka su manga taw a aden sakit'in. 13 Ugaid'a pagitung'u u ngin i maena nu kadtalu a nia kanu kitab a ‘Nia ku 'gkapangingalap na su limu nu, dikena su kurban nu.’c Kagina dikena nia ku kinasia i nia ku pedtawagen na su manga ikelas ka su manga baladusa.”
Su Kinadtalu nu Isa al-Masih pantag kanu Bagu a Ukit sa Kapaginugut kanu Kadenan
14 Daka sinemupeg sa lekanin su 'bpamangunut kanu Nabi Yahiya sa nia nilan lun inidsa na “Ngintu ka sekami a nia a 'bpamangunut kanu Yahiya enggu su manga taw a lusud kanu lumpukan a Parisiyu na tatap 'bpamebpuasa ugaid'a su 'bpamangunut sa leka na dikena 'bpamebpuasa?” 15 Na nia pidtalu nu Isa al-Masih kanilan na “Ngintu, dait besen a lidun nu manga ana nu pegkawingend su ginawa nilan amaika kaped'ilan pamun su mama a pegkawingen? Ugaid'a u mauma su gay a kuan den su mama a pegkawingen na entu ba i kabpuasa nilan.
16 “Na dala man temapi sa bagu a ginis kanu labing a balegkase ka amaika 'gkegken den su bagu a ginis na mangagandel'in su labing a ginis na makin den 'gkasela su kisi nin. 17 Udi na dala bun demiken sa bagu a ig'a ubas kanu labing a taguan a upis'a binatang kagina makapambetu nu bagu a ig'a ubas su labing a taguan a upis'a binatangf na amaika maitu na maudud su ig'a ubas enggu 'gkalat su taguan a upis'a binatang. Ugaid'a nia man dait na su bagu a ig'a ubas na sia ipembetad kanu bagu a taguan ka amaika maitu na mauget i magaga nin apeg'u dalem'in a ig'a ubas.”
Su Kinapambibiag kanu Wata nu 'Gkaunutan nu Pedsambayangan nu manga Yahudi enggu su Kinapagkapia kanu Babay a Pebpupulugu
18 Na pedtalu pamun su Isa al-Masih na aden nakauma a isa a 'gkaunutan nu pedsambayangan nu manga Yahudi, na sinemugiud sekanin kanu kaadapan nu Isa al-Masih ka nia nin pidtalu na “Nia pamun ba a kutika i kapatay nu wata ku a babay ugaid'a u munut ka sa laki ka dapenetan nengka sekanin na embibiag pamun.” 19 Na midtindeg su Isa al-Masih ka minunut sa lekanin apeg'u 'bpamangunut lun. 20 Saleta mambu na aden babay a pebpupulugu kanu dalem'u sapulu enggu dua lagun den i sinemupeg lu kanu taligkudan nu Isa al-Masih ka inami nin su sanggayad'u lambung'u Isa al-Masih 21 ka nia nin 'gkadtalu na ginawa na “U maami ku bu i lambung'in a nan na 'gkapia aku den.” 22 Na linengian sekanin nu Isa al-Masih ka nia nin lun pidtalu na “Manga dua na suled, embageli ka i manggiginawa nengka ka su salig'engka i napagkapia sa leka.” Na migkapia mambu su babay kanu entu demun ba a kutika.
23 Na guna makauma su Isa al-Masih kanu walay nu 'gkaunutan nu pedsambayangan na nailay nin su manga taw a pebpapalendagg enggu madakel a taw a 'gkangabusiug. 24 Na nia nin pidtalu kanilan na “Pameliu kanu! Ka dikena minatay i wata a nan ugaid'a pedtulug bu sekanin.” Na nadtatawan nilan bu su Isa al-Masih. 25 Na guna su nakapaliu den su madakel a taw na linemudep su Isa al-Masih lu kanu bilik a nabetadan nu wata a babay ka inami nin sia sa lima su wata taman sa nakambangun mambu. 26 Na su entu a nanggula na nakapayapat kanu lusud'u inged.
Su Kinapailay nu Isa al-Masih kanu Dua Kataw a Di Pakailay
27 Na kanu kinaganat'u Isa al-Masih lu na midtundug-tundug sa lekanin su dua kataw a di pakailay ka ibpelalis'ilan i “Tupu nu Daud,h ikalimu kami nengka pan!” 28 Na guna makauma su Isa al-Masih kanu walay na sinupegan sekanin nu entu a di pamakailay. Na inidsan mambu silan nu Isa al-Masih sa “'Bpaginugut kanu sa magaga ku enggula i nia?” Nia nilan pidtalu na “Uway, Mapulu!” 29 Daka dinapenetan nu Isa al-Masih su mata nilan sa nia nin pidtalu na “Sabap kanu salig'u na 'gkapia kanu den.” 30 Na kanu entu demun ba na nakailay silan. Saleta na inibpaliugat'u Isa al-Masih kanilan i di nilan edtalu-talun i entu kanu apia entain. 31 Ugaid'a guna den silan makaganat lu na inipayapat'ilan bun edtalu-talu kanu lusud'u inged su pantag kanu Isa al-Masih.
Su Kinapadtalu nu Isa al-Masih kanu Taw a Di Pakadtalu sabap sa Inasukan na Saitan
32 Saleta na kanu kapengganat'ilan lu na aden menem pinananggit kanu Isa al-Masih a mama a di pakadtalu sabap sa inasukan na saitan. 33 Na guna nin mabugaw su saitan a minasuk kanu mama na nakadtalu su mama. Na nangagaip su madakel a taw taman sa nia nilan nangadtalu na “Da pamun a benal manggula i maya ba sia sa Israil.” 34 Ugaid'a nia pedtalun nu manga taw a lusud kanu lumpukan a Parisiyu na “Su datu nu manga saitan i minenggay lun sa bagel sa kabpamugaw nin kanu manga saitan.”
Su Kinalat'u Ginawa nu Isa al-Masih kanu Madakel a Taw
35 Na linapat'u Isa al-Masih su manga siudad enggu su manga inged ka 'bpamamandu lu kanu manga pedsambayangan nu manga Yahudi, ibpangusiat'in su Mapia a Tutuma pantag kanu kapendatu nu Kadenan enggu papegkapian nin su langun nu sakit enggu penggedamen nu taw. 36 Na guna nin mailay su madakel a benal a taw na nalat i ginawa nin kanilan kagina 'gkabulibug silan enggu madakel i kamutuan nilan. Na mana silan manga bili-bili a dala pedtuganul lun. 37 Daka nia pidtalu nu Isa al-Masih kanu 'bpamangunut lun na “Su pedsabpeteni na madakel den a benal ugaid'a paidu bu i gumagalebek.i 38 Kagina ka maitu na pangeni nu kanu kigkuan kanu pedsabpetenj i semugu pan sekanin sa manga ped pan a manga gumagalebek kanu pedsabpeten nin.”