Su Isa al-Masih na aden Kawagib'in sa Kapangampun
2
Na guna maipus su namakapila gay na mimbalingan su Isa al-Masih lu sa Kapurnaum. Na nadtalu-talu i nakauli den sekanin sa walay. 2 Daka nangalimud i madakel a benal a taw taman sa di den 'gkalengan apia lu kanu bengawan. Na kanu kabpangusiat'in kanilan kanu kadtalu nu Kadenan 3 na aden manga taw a namakauma a nananggit sa mama a di den pakanggagalebek su lawas'in a pedsapuaten nu pat kataw a manga mama. 4 Na guna su di silan pakasupeg kanu Isa al-Masih sabap sa madakel a benal a taw na iniawa nilan su atep'u walaya lu kanu atag'u Isa al-Masih. Na guna su nakaumbal den silan sa kaukitan na initudtun nilan su mama a entu a pinapageda sa ikam. 5 Daka guna mailay nu Isa al-Masih su salig'ilan na nia nin pidtalu kanu mama a di nin den pakanggagalebek su lawas'in na “Manga dua na wata, su kabaladusan nengka na inampun den.” 6 Na aden mambu manga gulu nu pangitaban a 'bpagagayan lu ba na nia pakaidsa nu ginawa nilan na 7 “Nginan ka pakadtalu-talu i mama a nan sa man? Sakutu i nan kanu Kadenan! Entain besen i makapangampun sa kabaladusan u dikena su Kadenan bu?” 8 Na 'gkatawan nu Isa al-Masih su 'gkapagitung'ilan daka kanu entu demun ba na pidtalu nin kanilan i “Nginan ka man i pakaidsa nu kanu ginawa nu? 9 Ngin besen i malemu a edtalun kanu mama a nia a di pakanggagalebek i lawas'in, ‘Su kabaladusan nengka na inampun den’? Udi na ‘Embangun ka, kua ka i ikam'engka a nan ka lakaw ka den’? 10 Ugaid'a ipaamad ku sa lekanu i su Kaka nu Manusiab na aden kawagib'in sia sa dunia sa kapangampun nin sa kabaladusan.” Daka nia nin pidtalu kanu mama a di nin pakanggagalebek i lawas'in na 11 “Pedsugun ku seka sa embangun ka, kua ka i ikam'engka a nan ka uli ka den.” 12 Daka mimbangun mambu su mama a entu. Na pinamagayasan nin kemua su ikam'in ka linemiu a lu demun minukit kanu kaadapan nu langun nu taw lu ba. Daka sangat a nangagaip silan taman sa napugi nilan su Kadenan. Na nia nilan nadtalu na “Da tanu pamun a benal makailay sa maya ba!”Su Isa al-Masih na Labi a Mapulu kumin kanu Langun nu Adat-betad'u Taw
13 Na linemu menem su Isa al-Masih kanu ligid'u lanaw nu Galili. Na pibpawangan sekanin lu ba nu madakel a benal a taw na daka pinamandu nin silan. 14 Na kanu kapendadalakaw nin na nailay nin si Libic a wata ni Alpayus. 'Bpagagayan si Libi lu kanu 'bpangubelan sa buwis. Na nia pidtalu nu Isa al-Masih sa lekanin na “Unut ka sa laki.” Daka midtindeg mambu sekanin ka minunut kanu Isa al-Masih.
15 Na kanu kapegkan nu Isa al-Masih enggu su 'bpamangunut lun lu kanu walay ni Libi na madakel a 'bpangubela sa buwisd enggu manga taw a dikena balaagamae i kineman kaped'u Isa al-Masih. Ka madakel man a benal silan a midtatanggunut kanu Isa al-Masih. 16 Na guna madsusuliman nu manga gulu nu pangitaban a lusud kanu lumpukan a Parisiyuf i pegkan su Isa al-Masih kaped'u manga 'bpamangubela sa buwis enggu manga dikena balaagama na nia nilan pidtalu kanu 'bpamangunut lun na “Nginan ka pegkan sekanin kaped'u manga 'bpamangubela a nan sa buwis enggu manga taw a dikena balaagama?” 17 Na guna makineg'u Isa al-Masih su entu na nia nin pidtalu kanilan na “Dikena man nia pakanasisita sa taligamut su manga taw a dala sakit'in ka su manga taw a aden sakit'in. Na dikena nia ku kinasia i nia ku pedtawagen na su manga ikelas a taw ka su manga baladusa.”
18 Na su 'bpamangunut kanu Nabi Yahiya enggu kanu lumpukan a Parisiyu na tatap 'bpamebpuasa. Na aden manga taw a sinemupeg kanu Isa al-Masih ka nia nilan pidtalu sa lekanin na “Nginan ka su 'bpamangunut kanu Yahiya enggu su 'bpamangunut kanu lumpukan a Parisiyu na 'bpamebpuasa ugaid'a su 'bpamangunut sa leka na dikena 'bpamebpuasa?” 19 Na nia pidtalu nu Isa al-Masih kanilan sa ukit a pakenalan na “Ngintu, makabpuasa besen su manga ana nu pegkawingen amaika kaped'ilan pamun su mama a pegkawingen? Dili guna silan 'bpuasa taman sa kaped'ilan pan su mama a pegkawingen. 20 Ugaid'a mauma su gay a kuan den su mama a pegkawingen na entu ba su kutika a kabpuasa nilan.” 21 Na pidtalu nin pan i “Dala man temapi sa bagu a ginis kanu labing a balegkas ka amaika 'gkegken den su bagu a ginis na mangagandel'in su ginis'u labing a balegkas na makin den 'gkasela su kisi nin. 22 Na dala bun demiken sa bagu pamun a ig'a ubas kanu labing a taguan na ig'a ubas a upis'a binatang kagina makapambetu nu bagu a ig'a ubas su labing a taguan a upis'a binatang na amaika maitu na maudud su ig'a ubas enggu 'gkalat su taguan a upis. Ugaid'a su bagu man a ig'a ubas na sia bu ipembetad kanu bagu a taguan a upis.”
23 Na natabu kanu Gay nu Kabpangintelenen i 'bpagukit su Isa al-Masih lu kanu inawidan a bantad, na gagalu nu kabpagukit'ilan na 'bpangetes sa tiugkayan na bantad su 'bpamangunut lun. 24 Daka nia pidtalu sa lekanin nu manga taw a lusud kanu lumpukan a Parisiyu na “Ilay ka ba, nginan ka penggalebeken nu 'bpamangunut sa leka i nan? Di a benal i nan 'gkaalus kanu Gay nu Kabpangintelenen.” 25 Na nia nin inisumpat kanilan na “Ngintu, da nu pamun mabatia kanu kitab u ngin i pinggula nu Daudg kanu timpu a pakanasisita sekanin enggu 'gkagutem apeg'u manga tagapeda nin 26 kanu timpu a nia pan mapulu sa langun nu 'bpamangurban na si Abiatar? Linemudep su Daud lu kanu walay a pedsimban kanu Kadenan ka kineman kanu pan a inigkurban kanu Kadenan. Na di a benal 'gkaalus a kanen nin su entu ka nia bu alus a makakan kanu entu na su 'bpamangurban. Na pidsan ka maitu na inenggan nin pan su manga tagapeda nin.” 27 Na nia pan pidtalu nu Isa al-Masih kanilan na “Su Gay nu Kabpangintelenen na pinangaden kanu kapianan nu manga taw, dikena pinangaden su taw kanu kapianan nu Gay nu Kabpangintelenen. 28 Na kagina ka maitu na su Kaka nu Manusia na apia kanu Gay nu Kabpangintelenen na sekanin i Mapulu.”