3
Na linemudep menem su Isa al-Masih lu kanu pedsambayangan nu manga Yahudi. Na aden mama lu a migkipes i sabala a lima nin. 2 Na pedtulikan nu manga taw a lusud kanu lumpukan a Parisiyu su Isa al-Masih ka pedsipatan nilan u amaika pagkapian nin su mama a entu kanu Gay nu Kabpangintelenen ka enggu aden makasendit'ilan sa lekanin. 3 Daka nia pidtalu nu Isa al-Masih kanu mama a migkipes i lima nin na edtindeg sekanin lu kanu luk'u manga taw. 4 Entu pan ka nia nin pidtalu kanilan na “Ngin i 'gkaalus kanu Gay nu Kabpangintelenen, kanggula sa mapia atawa ka kanggula sa mawag; kaimatay atawa ka kalipuas kanu umul'u taw?” Ugaid'a da den inek-inek'ilan. 5 Na pinangingilay silan nu Isa al-Masih edtulik a 'gkasakit i ginawa nin enggu 'gkalidu a benal i ginawa nin sabap kanu kategas'u pamusungan nilan. Na nia nin pidtalu kanu mama a entu na “Betel ka i lima nengka a nan.” Daka binetel'in mambu taman sa migkapia su lima nin. 6 Na guna su maitu na minawa su manga taw a lusud kanu lumpukan a Parisiyu ka kanu entu demun ba na mindidilimudan silan kaped'u manga taw nu Hiruda ka pinagitung'ilan u panun i kabinasa nilan kanu Isa al-Masih.Su Kabarakat'u Isa al-Masih na Lawan pan kanu Kabarakat'u Saitan
7 Ginemanat su Isa al-Masih enggu su 'bpamangunut sa lekanin ka linemu silan kanu lanaw nu Galili. Na madakel a benal a taw i midtatanggunut kanilan a ebpun sa dalepa a Galili enggu Yudia 8 taman den sa siudad a Awrusalim enggu dalepa a Idumia. Aden bun ebpun lu tampal sa sebangan nu lawas'a ig'u Jordan. Na madakel bun i ebpun sa embala-bala den kanu dalepa a Tair enggu Sidun. Nia sabap a kinalu nu langun nu taw a nia kanu Isa al-Masih na nakineg'ilan su langun nu penggalebeken nin. 9 Na sabap sa madakel a benal a taw na pidtalu nu Isa al-Masih kanu 'bpamangunut lun i magadil silan sa awang a kapagagayanan nin asal'a di sekanin malupit'u madakel a taw 10 kagina madakel den a benal i nakapagkapia nin. Na sabap sa nia na langun nu aden sakit'in na pedsusumaga den sa kapedsupeg'ilan kanu Isa al-Masih asal'a maami nilan sekanin. 11 Na uman sekanin 'gkailay nu manga saitan a minasuk kanu manga taw na ipendadsang'ilan su ginawa nilan lu kanu kasangulan nu Isa al-Masih taman sa ibpelalis'ilan pedtalu sa lekanin i “Seka su Tunggal'u Kadenan.” 12 Ugaid'a inibpaliugat'in kanilan i di nilan a benal edtalu-talun u entain sekanin.
Su Kinapamili nu Isa al-Masih kanu Sapulu enggu Dua a Sinugu nin
13 Na tinemakedeg su Isa al-Masih kanu palaw ka inenggat'in su manga pigkahanda nin a makaunut sa lekanin. Na linemu mambu silan. 14 Daka pinamili nin lu su sapulu enggu dua a pinggungalanan nin sa sinugu asal'a madtagapeda nin enggu masugu nin a makapangusiat 15 taman sa aden sa kanilan i bagel sa kapamugaw kanu manga saitan. 16 Na nia su sapulu enggu dua a napamili nin: Si Simiun a pinggungalanan nin sa Pitru.b 17 Su manga wata ni Zabidi a si Yakub enggu si Yuhan a pinggungalanan nu Isa al-Masih sa Buanirgis a nia nin maena na “Manga Wata na Lugung.” 18 Si Anduk enggu si Pilipus, si Bintulumi, si Mataya, si Tumas enggu si Yakub a wata ni Alpayus, si Tadius, si Simiun a 'bpaninindeg kanu dalepa, 19 enggu si Yahuda Iskalia a temipu kanu Isa al-Masih.
Su Kabarakat'u Isa al-Masih na dikena ebpun kanu Saitan
20 Na guna su minuli su Isa al-Masih lu kanu walay na mindidilimudan menem lu i madakel a taw taman sa di den sekanin pakasengel pegkan apeg'u 'bpamangunut lun. 21 Na guna makineg'u pamilia nin su entu na linemu silan ka enggu nilan sekanin 'gkakua kagina nia pedtalun nu ped a taw na “'Gkabuneg den sekanin.” 22 Na nia menem pedtalun nu manga gulu nu pangitaban a ebpun sa Awrusalim na “Inasukan sekanin nu Datu na Giadsal.c Na sia pakanggulalan kanu bagel'u datu a nia nu manga saitan na 'bpamugaw sekanin sa manga saitan.” 23 Daka pinaubay nu Isa al-Masih silan ka pidtalu nin kanilan sa ukit a pakenalan i “Panun i kabugaw nu datu nu manga saitan kanu ginawa nin demun? 24 Na amaika su pendatuan ka mambad-bad su manga taw nin na su entu a pendatuan na dili makadtindeg sa mauget. 25 Na amaika su sakambinabatan ka mambad-bad silan na su entu a sakambinabatan na dili mauget na makabpipitas silan. 26 Na maitu bun ba, amaika su Datu na Giadsal ka sungkangen nin su ginawa nin enggu mambad-bad su pendatuan nin na di makadtindeg nia pan mula na entu den ba i kapupus'in. 27 Na nia nin kabantang na mana man sekanin mabagel a mama a di kaludepan su walay nin asal'a agawn su manga kaaden nin, nia tabia na mapawik muna sekanin entu pan ka maagaw su manga kaaden nin.
28 “Na saben-sabenal a pedtalun ku sa lekanu i langun na kadusan nu manusia na mapakay a maampun, apia ngin pan i enggulan nilan a kasakutu na maampun bun. 29 Ugaid'a apia entain i semakutu kanu Suti a Ruh na dala kaampun lun, nia pan mula na mandusa nin i entu taman sa taman.” 30 Na pidtalu nu Isa al-Masih i nia kagina pedtalun nilan i “Inasukan sekanin nu datu nu manga saitan.”d
Su Tidtu-tidtu a Pamilia nu Isa al-Masih
31 Na nakauma su ina nu Isa al-Masih apeg'u manga suled'in a mama. Lu silan pedtindeg kanu liu nu walay na inipatawag'ilan su Isa al-Masih. 32 Na madakel a taw a 'bpamagagayan i nakabalibet sa lekanin kanu entu ba. Na nia nilan pidtalu sa lekanin na “Gulu, nan sa liu su ina nengka enggu su manga suled'engka a mama, 'bpangilayn ka nilan.” 33 Daka nia nin inisumpat kanilan na “Entain besen i ina ku enggu manga suled ku a mama?” 34 Na pinangingilay nin edtulik su nakabalibet sa lekanin a 'bpamagagayan ka nia nin pidtalu na “Ilay nu, nia ba su ina ku enggu manga suled ku a mama! 35 Ka apia entain man i penggalebek kanu kahanda nu Kadenan na entu ba su suled ku a mama enggu babay enggu ina ku.”