Su Kinapamandu makapantag sa Kapangeni-ngeni
11
Na aden isa a gay a 'bpangeni-ngeni su Isa al-Masih lu kanu isa a dalepa. Na guna sekanin makapasad na su sakataw kanu 'bpamangunut lun i midtalu sa “Mapulu, pamandu kami pan u panun i ukit a kapangeni-ngeni a mana su kinapamandu nu Yahiya kanu 'bpamangunut lun.” 2 Nia pidtalu nu Isa al-Masih kanilan na “Amaika mangeni-ngeni kanu na maya ba i ukit a kapangeni-ngeni nu:‘Hu Ama nami a lu sa sulega,
dait man a 'bpagadatan su ingala nengka a suti.
Ibpangeni-ngeni nami i makalangkap den sia sa liwawaw na dunia su kapendatu nengka.
3 Enggi kami sa makan kanu uman-uman gay.
4 Ampun ka su kabaladusan nami sa mana bun su kinaampun nami kanu mindusa sa lekami. Di kami nengka semuguti sa masasat.’ ”
5 Na pidtalu pamun nu Isa al-Masih kanu 'bpamangunut lun i “Upama ka aden sa lekanu i aden pakat'in a lemu sa lekanu ka mamukaw sa luk i gay sa nia nin edtalun na ‘Sunged aku pan sa telu timan a pan 6 kagina aden pakat ku a nakauma a ganat pan sa mawatan. Na dala pakapakan ku lun.’ 7 Ngintu, nia isawal'u 'bpamukawn a entu na ‘Di aku nengka den pedsamuka ka nakapamintu aku den enggu 'bpelenek kami den kanu manga wata ku. Di ku den makaenggay sa leka i 'bpangenin nengka a nan’? 8 Na nia ku madtalu sa lekanu na apia 'gkapauk pan pembangun su pakat'in asal'a makaenggay nin kanu pakat'in su 'bpangenin nin na makambangun bun sekanin ka inggay nin su endaw taman i nasisita nu pakat'in ka makaya u di nin embangunan. 9 Na pangeni kanu man ka enggan kanu, pangilay kanu ka makatun kanu, panutuk kanu ka ukan kanu. 10 Ka apia entain man i mangeni na makatalima, na su 'bpangilay na makatun enggu su 'bpanutuk na kaukan. 11 Na entain ba sa lekanu a manga lukes i amaika mangeni su wata nin sa seda na nia nin inggay na nipay, 12 atawa ka u mangeni sa leman na nia nin inggay lun na ulang? 13 Na apia ngin den man i kawag'a palangay nu na katawan nu menggay sa mapia su wata nu. Na nia pan a entu su Ama nu a lu sa sulega a 'bpagenggay kanu Suti a Ruh kanu apia entain a mangeni lun!”
Su Isa al-Masih enggu su Datu na Giadsal
14 Na aden isa a gay a pembugawn nu Isa al-Masih su saitan a di papedtalu kanu taw a inasukan nin. Na guna nin mabugaw su entu kanu mama a inasukan nin na nakadtalu su mama. Na sangat a nangagaip su madakel a taw. 15 Ugaid'a su ped na nia nilan pedtalun na “Su Datu na Giadsal a datu nu manga saitan i minenggay lun sa bagel sa kabpamugaw nin kanu manga saitan.” 16 Su ped menem na kiugan nilan matalu su Isa al-Masih sa ukit a kapeges'ilan lun mangeni sa kapailay nin sa tanda a ebpun kanu Kadenan. 17 Ugaid'a 'gkatawan bun nu Isa al-Masih su 'gkapagitung'ilan tembu nia nin pidtalu kanilan na “Apia endaw a pendatuan ka mambad-bad su manga taw nin na su entu a pendatuan na dili makadtindeg sa mauget. Na maitu bun su sakambinabatan na amaika mambad-bad na di mauget na makabpipitas. 18 Na maitu bun ba, amaika su Datu na Giadsal ka mambad-bad su pendatuan nin na panun ba i kadtindeg'u entu a pendatuan nin? Nia nu pedtalun na su kabpamugaw ku sa saitan na sia pakanggulalan kanu kabarakat'u Datu na Giadsal. 19 Na amaika maitu na endaw menem pakabpun su kabarakat'u 'bpamangunut sa lekanu sa kabpamugaw nilan sa saitan? Nia nin kabantang na silan mismu i mangimbenal sa lekanu sa dikena pakatidtu su 'gkapagitung'u a nan sa laki. 20 Ugaid'a amaika menem ka 'bpamugaw aku sa saitan sia pakanggulalan kanu kabarakat'u Kadenan, na nia nin maena na nakatingguma den sa lekanu su kapendatu nu Kadenan. 21 Ka su mama a mabagel a minggumatalem sa mabagel sa kapedtameng'in kanu walay nin na di kadadagan su kaaden nin. 22 Ugaid'a amaika nia lemudep sa lekanin i mabagel pan sa lekanin na makua su manga matalem'in a pedsaligan nin enggu pamagumunen nu lemudep lun su manga kaaden nin.”
23 Na pidtalu pan nu Isa al-Masih i “Su di temampil sa laki na pedsungkang sa laki enggu su di temabang sa laki sa kapangenggat kanu manga taw na papedsibay kanu manga taw.”
24 Na pidtalu bun nu Isa al-Masih i “Amaika mawa su saitan sia kanu lawas'u taw na edsugud-sugud den temegel kanu tawan-tawan a dalepa ka mangilay menem sa kagkalebenan nin. Na amaika di sekanin makatun na nia nin mapagitung na ‘Embalingan aku lu kanu andang a pegkalebenan ku a inasukan ku.’ 25 Na sia kanu kambalingan nin ka nia nin lun kailay i napamayupasan taman sa pibpia-pianan a benal 26 na lemiu sekanin ka magakat pan sa pitu timan a manga saitan a lawan pan sa lekanin i kawag'a palangay nin ka masuk silan kanu entu ba a taw taman sa lu den ba silan 'gkaleben. Na nia manggula nu entu ba a taw na labi pan i kapasang'a magedam'in kumin kanu nauna a entu a nagedam'in.”
27 Na guna nin mapasad edtalu su entu na aden babay lu kanu madakel a taw i midtalu sa matanug sa “Mapia den a benal kanu babay a mimbata sa leka enggu napasusu sa leka!” 28 Na nia inisumpat'u Isa al-Masih na “Labi a mapia kanu taw amaika makikineg enggu maginugut kanu kadtalu nu Kadenan.”
Su Tanda a sia Nakanggulalan kanu Nabi Yunus
29 Na guna su pegkadakel-pegkadakel bun su manga taw na nia pidtalu nu Isa al-Masih na “Sekanu a manga taw sa saguna a timpu na baladusa, pakapangingalap kanu sa tanda ugaid'a dala man tanda a makapailay sa lekanu nia tabia na su tanda a sia nakanggulalan kanu Nabi Yunus. 30 Kagina su nanggula nu Nabi Yunus na tandaa kanu manga taw sa Ninibah na maitu bun ba su manggula nu Kaka nu Manusia na tanda kanu manga taw sa saguna a timpu. 31 Na sia kanu Gay nu Harikiamat na embuat su puteli nu dalepa a Siba ka sugaten nin sa kawagib su manga taw ba a nia sa saguna a timpu a da pakikineg kagina sekanin na apia lu pan ebpun sa tedtab'a dunia na nagapas bun sa kapakikineg'in kanu manga mapia a ilemu nu Nabi Sulaiman. Ugaid'a sekanu, na apia san den sa lekanu su labi lawan pan kumin kanu Nabi Sulaiman na da nu bun sekanin pakikinega. 32 Na embuat bun su manga taw sa Ninibah amaika mauma den su Gay nu Harikiamat ka sugaten nilan sa kawagib su manga taw ba a nia sa saguna a timpu kagina su manga taw sa Ninibah na midtaubat silan guna nilan makineg su usiatan nu Nabi Yunus. Ugaid'a sekanu, na apia san den sa lekanu su labi lawan pan kumin kanu Nabi Yunus na da kanu bun edtataubat.
Su Palitan nu Badan
33 “Dala taw a temutud sa palitan a nia mauli lun na idalung'in udi na dapengan nin, ka nia pan mula na ibetad kanu 'bpanaguan sa palitan ka enggu mailay nu 'bpeludep a taw su kaliwanag'in. 34 Su mata nengka i palitan nu badan nengka. Amaika matingaw su entu na 'gkaliwanag su badan nengka ugaid'a amaika malebug su mata nengka na mana ka bun naputus'a malibuteng. 35 Na ingati ka a benal su maliwanag ba a entu sa 'gkalibuteng. 36 Na kagina ka maitu na amaika lemangkap kanu badan nengka su kaliwanag sa dala mailay nengka lun a kalibutengan na 'gkaliwanag sa tidtu-tidtu sa mana palitan a pakatayaw sa leka.”
Su Kinadaway nu Isa al-Masih kanu manga Taw a Lusud kanu Lumpukan a Parisiyu enggu su manga Gulu nu Pangitaban
37 Na guna makapasad mangusiat su Isa al-Masih na inenggat sekanin keman nu isa kanu manga taw a lusud kanu lumpukan a Parisiyu. Na minunut mambu su Isa al-Masih a tinemalus magagayan lu kanu lamisan a pegkanan. 38 Na nagaip su taw a lusud kanu lumpukan a Parisiyu ka nailay nin a kineman su Isa al-Masih a dala pamuanaw. 39 Daka nia pidtalu nu Isa al-Masih sa lekanin na “Sekanu a manga taw a lusud kanu lumpukan a Parisiyu na 'bpelimpiun nu su liu na tagayan nu enggu lampay nu ugaid'a su dalem'u atay nu na napenu na da makalila enggu kadaluakan. 40 Sekanu a da manga akal'in! Dikena ba su nangaden kanu lawas tanu na sekanin bun i nangaden kanu atay tanu? 41 Kagina ka maitu na edsakat kanu sa senep sa atay kanu manga miskinan ka kanu maya ba a ukit na malimpiu su atay nu.
42 “Na duan-duan nu den a manga taw a lusud kanu lumpukan a Parisiyu ka apia man su manga paninub nu enggu su manga 'gkamun nu a nasabpet'u na pedsakatan nu ugaid'a ipedtalipenda nu su kaenggay sa kawagib enggu su kakalimu nu kanu Kadenan. Dait man a menggay kanu sa edsakat ugaid'a di nu ipedtalipenda su langun nu entu a labi a balapantag.
43 “Na duan-duan nu ka nia den masela sa ginawa nu na sekanu i makapagagayan kanu ayanan nu badtug a taw lu kanu manga pedsambayangan tanu a manga Yahudi. Kalilinian nu gaid i kapagadatan kanu nu manga taw lu kanu manga padian.
44 “Na duan-duan nu den, ka su palangay nu na makalagid kanu sa lebeng a da tanda nin a 'gkadampuan nu tawc sa di nilan katawan i lebeng besen.”
45 Na isa kanu manga gulu nu pangitaban nu manga Yahudi i midtalu sa “Gulu, su kinadtalu nengka sa nan na pakaamung kami pakabpayan.” 46 Na nia inisumpat'u Isa al-Masih na “Maitu bun su sekanu a manga gulu nu pangitaban, duan-duan nu den ka inipapananggit'u kanu manga taw su maugat a it a mapasang a 'bpananggiten inunta na di nu demun silan matika temabang sa kagkapegkag'u entu.
47 “Na duan-duan nu den ka inumbalan nu mambu sa tampat su manga nabi a nia bun minimatay lun na su manga kalukesan nu. 48 Na su pinggula nu ba a entu na amadan sa naayunan nu su kinaimatay nu manga kalukesan nu kanu manga nabi ka silan i 'bpangimatay na sekanu menem i 'bpagumbal sa tampat'ilan. 49 Na kagina ka maitu na sia luyud kanu ilemu nu Kadenan na pidtalu nin i ‘Mapasugu aku lu kanilan sa manga nabi enggu ped pan a masugu. Na nia pakaidan kanilan na pangimatayan su ped enggu su ped menem na pakapasangan.’ 50 Tembu ba sekanu a manga taw sa saguna a timpu na kawagiban kanu den sa kinaigis'u lugu nu langun nu manga nabi iganat pan kanu kinalimbag kanu dunia 51 iganat den kanu Habil a inimatayan taman den kanu Zakaria a inimatayan lu kanu pageletan nu Suti a 'Bpagagaman enggu kanu pegkurbanan. Na edtalun ku sa lekanu i sekanu a manga taw sa saguna a timpu na kawagiban kanu kanu langun nu entu.
52 “Sekanu a manga gulu nu pangitaban na duan-duan nu den ka inipagena nu su gunsi a wagib a makauka kanu 'bpanuntutan. Na sekanu ba a nan i di pegkiug 'gkalusud lu ba enggu 'bpagungenen nu su pegkiug makalusud lu ba.”