Su Panduan pantag kanu Ngin i Mapia a Benal kanu Taw
5
Na guna mailay nu Isa al-Masih su madakel a taw na tinemakedeg sekanin lu kanu palaw ka lu ba sekanin nagagayan. Na sinupegan sekanin nu 'bpamangunut lun. 2 Daka linudsuan nin silan mamandu sa nia nin pidtalu na3 “Mapia den a benal kanu manga taw a katawan nin i nasisita nilan a benal su Kadenan ka su silan ba a entu i malusud kanu kapendatu nu Kadenan.
4 Mapia den a benal kanu manga taw a sangat a 'gkangalidu i ginawa nin ka pagkabagelen nu Kadenan su atay nilan.
5 Mapia den a benal kanu manga taw a ibaba nin i ginawa nin ka matalima nilan su inibpasad'u Kadenan a su bagu a dunia a da pan mauma.a
6 Mapia den a benal kanu manga taw a sangat a 'bpaginapasen nin su katidtu ka inggay nu Kadenan su entu kanilan.
7 Mapia den a benal kanu manga taw a malimu sa ped'in ka ikalimu bun silan nu Kadenan.
8 Mapia den a benal kanu manga taw a pinadsatiman nin i itungan nin kanu Kadenan ka mailay nilan su Kadenan.b
9 Mapia den a benal kanu manga taw a nia nin pangilayn na kapamagayun ka kabedtuan silan sa wata nu Kadenan.c
10 Mapia den a benal kanu manga taw a 'bpamungkaidanan sabap sa penggulan nilan su kaikelasan ka malusud silan kanu kapendatu nu Kadenan.
11 “Mapia den a benal sa lekanu amaika pagkayan kanu enggu 'bpamungkaidanan kanu taman sa 'bpamelabiten kanu sa langun den a kawagan enggu kabudtud sabap sa laki. 12 Na edsisigalaw kanu den ka masela i balas'u lu sa sulega. Ka apia man su manga nabi a nangauna pan sa lekanu na pinamungkaidanan nilan bun.
Su Panduan nu Isa al-Masih pantag kanu Timus enggu Palitan a Dait a Ilingan nu 'Bpamangunut lun
13 “Sekanu na mana kanu bun timus'u sakadunia. Na amaika kaawan na katimus su timus na di den makambalingan su katimus'in na da den katagan nin ka idtug bun den enggu dakudaken nu taw. 14 Na sekanu na mana kanu bun palitan nu sakadunia. Ka mana bun man su siudad kanu untul'u palaw na di makapagena su entu. 15 Na dala man temutud sa palitan sa dapengan nin ka nia pan mula na ibetad'in kanu 'bpanaguan sa palitan ka enggu 'gkatayawan su langun nu taw nu walay. 16 Na dait a maitu kanu bun ba, itayaw nu su palitan nu kanu manga taw ka enggu nilan mailay su mapia a galebek'u ka asal'a mapugi nilan su Ama nu a lu sa sulega.d
Su Panduan pantag kanu Katuman kanu Kasuguan
17 “Na di nu 'bpagitunga i nia ku kinasia na 'bpagawan ku sa katagan su kasuguan nu Musa atawa ka su kadtalu nu ped a manga nabi. Ka nia ku kahanda sa kinasia ku na dikena 'bpagawan sa katagan ka makin ku pedtumanene su entu. 18 Saben-sabenal a pedtalun ku sa lekanu i taman sa aden pan langit enggu lupa na apia satiman a batang kanu kasuguan na dala madala lun taman a di matuman su entu. 19 Kagina ka maitu na apia entain i mawa sa katagan kanu apia mapegkag sa langun a kasuguan taman sa ipamandu nin i kaawa lun sa katagan na malusud sekanin kanu mababa sa langun a taw sia kanu kandatu nu Kadenan. Ugaid'a apia entain menem i maginugut kanu kasuguan taman sa ipamandu nin su entu na su entu ba a taw na malusud sia kanu manga balapantag a manga taw sia kanu kandatu nu Kadenan. 20 Na pedtalun ku sa lekanu i amaika di nu kalawanan su kabpagikelas'u manga gulu nu pangitaban enggu su manga taw a lusud kanu lumpukan a Parisiyuf na natalatantu a di kanu malusud kanu kapendatu nu Kadenan.
Su Panduan pantag kanu Kakalipunget
21 “Nakineg'u den i nadtalu paganay kanu nangauna a manga taw i ‘Da kanu 'bpangimatay.g Apia entain a taw i mimatay na mait sa 'bpamimitialan.’ 22 Ugaid'a pedtalun ku sa lekanu i apia entain a taw i malipunget sa kaped'in na mait kanu kukuman nu Kadenan. Na apia entain menem i edtalun nin sa ped'in i ‘Dupang ka’ na nanget a kapamayadan nin kanu Kadenan su entu. Na maitu bun ba, apia entain menem i edtalun nin sa ped'in i ‘Buneg ka’ na wagib a idtug sa apuy sa naraka. 23 Na amaika pegkurbanh ka lu kanu pegkurbanan, na nagkalendem'engka i aden taw a nasakit i ginawa nin sa leka 24 na itabun nengka demun pan su ipegkurban nengka kanu kasangulan nu pegkurbanan ka 'bpawangi ka muna su entu a taw ka ipagayun nengka entu pan ka embalingan ka, ka 'gkurban ka den.
25 “Amaika aden taw a mangaden sa leka sa bitiala na ipagayun nengka den gagalu na di kanu pan pakauma kanu walay nu kukuman ka tabia bun ka tabanan ka na ipalad ka nu 'bpangukum kanu tameng ka enggu ka mabilanggu. 26 Na saben-sabenal a pedtalun ku sa leka i taman sa di nengka kabayadan langun na di ka makaliu lu ba.
Su Panduan pantag kanu Kagkiuga
27 “Na nakineg'u den i nadtalu paganay i ‘Da kanu 'gkiuga.’i 28 Ugaid'a pedtalun ku sa lekanu i apia entain a mama a ilayn nin bu su babay sa aden 'gkapagitung'in lun a di mapia na pegkiuga atawa ka pedsina den sekanin sia kanu atay nin. 29 Na amaika su kawanan a mata nengka i kadsabapan na kandusa nengka na suat ka su entu ka idtug'engka ka nia tinemu i madala i satiman a edsiap-siapan na lawas'engka kumin sa langun na lawas'engka na makaidtug sa naraka. 30 Na amaika menem ka su kawanan a lima nengka i kadsabapan na kandusa nengka na putuk ka su entu ka idtug'engka ka nia tinemu i nia madala su satiman bu a edsiap-siapan na lawas'engka kumin sa langun na lawas'engka den i makaidtug sa naraka.
Su Panduan pantag kanu Kambelag
31 “Nadtalu bun paganay i ‘Apia entain a mama i embelag sa kaluma nin na enggan nin su kaluma nin sa kasulatan sa kambelag.’j 32 Ugaid'a pedtalun ku sa lekanu i apia entain a mama i imbelag'in su kaluma nin na timbang a papegkiugan nin su kaluma nin, nia tabia na migkiuga su kaluma nin a entu. Na apia entain i mangaluma kanu kaluma nin na pakagkiuga bun.
Su Panduan pantag kanu Kadsapa
33 “Na nakineg'u bun i nadtalu kanu nangauna a manga taw i ‘Da kanu edsapa sa dikena benal ugaid'a u ngin i inidsapa nu na makin nu tuman sia kanu adapan nu Kadenan.’k 34 Ugaid'a pedtalun ku sa lekanu i da kanu a benal edsapa sa magidsan pan i makalalagit'u su sulega ka nia ba su kulesi nu Kadenan 35 enggu su dunia ka nia ba su 'bpaguntulan nu Kadenan kanu ay nin. Di nu bun ibpelalagit su Awrusalim ka nia ba su dalepa nu Datu nu manga datu,l 36 udi na su ulu nengka ka apia satiman a buk'engka na di nengka 'gkagaga papegkaputi udi na papegkaitem. 37 Uway ka den amaika ‘Uway,’ u dili menem na ‘Dili.’ Ka u edsapa ka pan na ebpun den i entu kanu Saitan.m
Su Panduan pantag kanu Kasuli
38 “Nakineg'u bun a nadtalu i ‘Mata sa mata enggu ngipen sa ngipen,’n 39 ugaid'a pedtalun ku sa lekanu i di nu 'bpagatui su taw a penggula sa lekanu sa mawag. Ugaid'a makin nia ka enggula na u aden temebpi kanu kawanan a pipi nengka na ilengi nengka pamun sa lekanin su biwang a pipi nengka. 40 Na u aden menem taw a igkukum ka nin asal'a makua nin su balegkas'engka na inggay nengka pamun su lambung'engka sa lekanin. 41 Amaika aden taw a itegel'in mapapananggit sa leka su it'in sa sakakilumitru i kawatan nin na pananggit ka su entu sa dua kakilumitru i kawatan nin. 42 Na su 'bpangeni sa leka na enggi ka, enggu su pedsembay sa leka na di ka pebpalawi.
Su Panduan pantag kanu Kakalimu kanu Kuntela
43 “Na nakineg'u bun i nadtalu paganay i ‘Ikalimu nengka su ped'engkao enggu kabensi ka su kuntela nengka.’p 44 Ugaid'a pedtalun ku sa lekanu i ikalimu nu su kuntela nu enggu ipangeni-ngeni nu su 'bpamungkaid sa lekanu 45 ka amaika maitu na katawan i sekanu na wata kanu nu Ama nu a lu sa sulega. Ka dikena bu su mapia a taw i papedsindawan nu Kadenan sa senang ka apeg'u mawag a taw enggu dikena bu nia nin pabpagulanan su matidtu a taw ka apeg'u dikena matidtu a taw. 46 Na amaika nia nu bu ikalimu su malimu sa lekanu na di nu 'bpaginagkay i balasan kanu nu Kadenan. Dikena ba man bun ba i penggulan nu 'bpamangubela sa buwis?q 47 Na amaika nia nu bu salamen su suled'u na ngintu, mapia den a benal i entu a pinggalebek'u kumin kanu ped a taw? Dikena ba man bun ba su penggalebeken nu manga taw a dikena-Yahudi?r 48 Kagina ka maitu na nia dait sa lekanu na dala limban nu a mana su Ama nu a lu sa sulega.