Su Panduan nu Isa al-Masih pantag kanu Kambelag
19
Na guna mapasad'u Isa al-Masih mamandu kanilan su entu na ginanatan nin su prubinsia a Galili ka linemu kanu dalepa a Yudia lu tampal kanu sebangan nu lawas'a ig'u Jordan. 2 Na madakel a benal a manga taw i minunut sa lekanin taman sa pinagkapia nin su aden manga sakit'in kanilan.3 Na aden namakauma a manga taw a lusud kanu lumpukan a Parisiyu lu kanu Isa al-Masih ka pembatalun nilan sekanin sa nia nilan lun inidsa na “Ngintu, 'gkaalus a imbelag'u mama su kaluma nin sa apia ngin a sabapan nin?” 4 Daka nia pidtalu nu Isa al-Masih kanilan na “Ngintu, da nu pamun mabatia kanu kitab i sia kanu punan-punan na pinangaden silan nu Kadenan a mama enggu babay?a 5 Entu pan ka pidtalu nin i ‘Nia ba i sabap'in ka pitasen nu mama su ama nin enggu su ina nin ka enggu nin pakadtampung su kaluma nin taman sa maisa den silan.’b 6 Na amaika maitu na dikena den silan dua kataw ka nabaluy den silan a sakabadan bu. Tembu ba di dait a pabpitasen nu manusia su pinadtampung'u Kadenan.”
7 Na nia nilan inisumpat kanu Isa al-Masih na “Ngintu ka inisugu nu Nabi Musa i kaenggay sa kasulatan sa kambelag kanu babay, entu pan ka embelagen nu mama?” 8 Na nia menem inisumpat'u Isa al-Masih kanilan na “Inisugut'u Musa su kambelag'u kanu kaluma nu sabap kanu kategas'u pamusungan nu ugaid'a sia kanu punan-punan na dikena maitu. 9 Ugaid'a nia ku madtalu sa lekanu na apia entain i embelag sa kaluma nin ka mangaluma sa ped na pakagkiuga sekanin nia tabia na migkiuga su kaluma nin a entu.” 10 Na nia nadtalu nu 'bpamangunut lun na “Amaika man besen i kagkaluma, na nia pan mapia i di den 'gkaluma i taw.” 11 Daka nia inisumpat'u Isa al-Masih kanilan na “Dikena langun na taw na kadtindegan nin i man a ukit, ka endaw bu su inenggan sa kapegkagaga sa maitu. 12 Ka aden manga taw a di den makapangaluma ka nait'in den gememaw i kada na kamamai nin enggu aden bun manga taw a kinapun enggu manga taw a pinamili nilan i di kapangaluma sabap kanu kapenggalebek'in kanu kahanda nu Kadenan. Na u entain i makagaga edtindeg sa nia na enggulan nin.”
Su manga Wata na Masupeg kanu Kapendatu nu Kadenan
13 Daka aden manga wata a 'bpamananggiten lu kanu Isa al-Masih asal'a kadapenetan nin taman sa makapangeni-ngeni nin ugaid'a sinapalan nu 'bpamangunut lun. 14 Na pidtaluan silan nu Isa al-Masih sa “Di nu silan pedsapali. Suguti nu silan sa kasia nilan sa laki, ka maya ba kanu manga wata ba a nia i malusud kanu kapendatu nu Kadenan.” 15 Na guna silan kadapeneti nu Isa al-Masih na ginemanat sekanin lu.
Su Kawasa na Mapasang i Kalusud'in kanu Kapendatu nu Kadenan
16 Na aden manguda a mama a sinemupeg sa lekanin ka inidsa nin lun i “Gulu, ngin i mapia a enggulan ku asal'a matalima ku su uyag-uyag a da taman nin?” 17 Na nia pidtalu nu Isa al-Masih sa lekanin na “Nginan ka ibpagidsa nengka sa laki i pantag sa ngin i mapia? Su Kadenan bu man i mapia. Ugaid'a amaika pegkiugan nengka a maaden sa leka su uyag-uyag a da taman nin na inggulalan nengka su manga kasuguan.” 18 Na nia inisumpat'u mama na “Endaw sa kanu manga kasuguan?” Na nia menem inisumpat'u Isa al-Masih sa lekanin na “Da ka mangimatay, da ka 'gkiuga, da ka manegkaw, da ka edsaksi sa dikena benal, 19 pagadati ka su ama nengka enggu su ina nengka enggu ikalimu nengka su ped'engka sa mana bun kanu ginawa nengka.”c 20 Na nia pidtalu nu mama na “Langun nu nia na ipenggulalan ku den. Ngin pan i kulang ku?” 21 Na nia inisumpat'u Isa al-Masih sa lekanin na “Amaika pegkiugan nengka a da kulang'engka na uli ka, ka 'bpasa ka su manga kaaden nengka ka inggay nengka su pasa nin kanu manga miskinan ka enggu maaden sa leka su kakawasan sa sulega, entu pan ka unut ka sa laki.”
22 Na guna makineg'u mama su entu na minawa a sangat a nalidu i ginawa nin ka madakel a benal su kaaden nin. 23 Daka nia pidtalu nu Isa al-Masih kanu 'bpamangunut lun na “Saben-sabenal a pedtalun ku sa lekanu i malegen a benal i kalusud'u kawasa kanu kapendatu nu Kadenan. 24 Ka nia ku madtalu sa lekanu na nia malemu i kaludep'u unta kanu pesu nu lagum kumin kanu kalusud'u kawasa kanu kapendatu nu Kadenan.”
25 Na guna i entu makineg'u 'bpamangunut lun na sangat a nangagaip silan sa nia nilan nadtalu na “Amaika maitu na entain pan besen i malipuas?” 26 Na pidtulikan nu Isa al-Masih silan ka nia nin pidtalu kanilan na “Su manusia na di nin magaga ugaid'a su Kadenan na dala di nin magaga.” 27 Daka nia nadtalu ni Pitru na “Panun menem i maya ba sa lekami a nia a initabun nin su langun-langun ka enggu makadtatanggunut sa leka? Ngin basi i makua nami a balas?” 28 Na nia pidtalu nu Isa al-Masih kanilan na “Saben-sabenal a pedtalun ku sa lekanu i sekanu a 'bpamangunut sa laki na sia kanu kaayan nu Kaka nu Manusia kanu kulesi nin ka endatu den sekanin kanu mangauma a timpu a bagu a dunia na magagayan kanu bun kanu sapulu enggu dua a kulesi ka enggu nu makukum su sapulu enggu dua a tupu nu Israil.d 29 Na apia entain man i tinemagak sa walay nin atawa ka suled'in magidsan i mama enggu babay, ama nin enggu ina nin, manga wata nin atawa ka manga kalupan nin sabap sa laki na takep-temakep pan i matalima nin taman sa maaden pan sa lekanin su uyag-uyag a da taman nin. 30 Na madakel kanu manga taw saguna a nakatagu sa unan i makatagu silan sa ulian enggu su manga nakatagu menem sa ulian a taw saguna na makatagu menem silan sa unan.