Su Pakenalan pantag kanu Balu a Babay a 'Bpangeni sa Tabang
18
Na pinamandu menem'u Isa al-Masih silan sa ukit a pakenalan asal'a tatap silan mangeni-ngeni enggu di silan kaawan na inam 2 sa nia nin pidtalu kanilan na “Aden 'bpangukum kanu isa a dalepa a da gilek'in kanu Kadenan enggu da papedtagan nin kanu apia entain. 3 Saleta na aden mambu balu lu a babay a pembabalingan kanu 'bpangukum sa nia nin kadtalu na ‘Tabangi aku pan kanu kawagib ku sia kanu kadsangula ku kanu kuntela ku.’ 4 Na nakapila-pila den na di nin ibpamamantag. Na guna su nauli den na nia natagu sa ginawa nin na ‘Dikena ku ipegkagilek su Kadenan enggu da pebpagatagan ku kanu apia entain. 5 Ugaid'a sabap sa 'gkalingasa aku nu balu a nia a babay na tabangan ku den sekanin kanu kawagib'in ka amaika dili na embabalinganan aku nin lemingasa.’ ”6 Na pidtalu menem'u Mapulu a su Isa al-Masih i “Na entu ba i ilay nu, na su kadtalu a entu nu dikena matidtu a 'bpangukum. 7 Nia pan a entu su Kadenan? Ngintu, di nin ba edtabangan su kawagib'u manga taw a pinamili nin a 'bpangeni sa tabang sa lekanin sa magabi sa malamag? Ngintu, di nin silan sambutan edtabang? 8 Na nia ku madtalu sa lekanu na edtabangan nin semambut kanu kakua nilan kanu kawagib'ilan. Ugaid'a apia ka maitu na ngintu, aden pamun basi kauman nu Kaka nu Manusia a aden salig'in sa kanu kauma nin sia sa dunia?”
Su Pakenalan pantag kanu Taw a Lusud kanu Lumpukan a Parisiyu enggu su 'Bpangubela sa Buwis
9 Na pidtalu nin pan su nia a pakenalan kanu manga taw a nia nin kapegkailay kanu ginawa nin na ikelas enggu mababa i kapegkailay nin kanu ped a taw sa nia nin pidtalu na 10 “Aden dua kataw a mama a linemudep lu kanu Suti a 'Bpagagaman ka nangeni-ngeni. Su sakataw na lusud kanu lumpukan a Parisiyu enggu su sakataw na 'bpangubela sa buwis. 11 Su taw a lusud kanu lumpukan a Parisiyu na midtindeg ka nangeni-ngeni pantag kanu ginawa nin sa nia nin pidtalu na ‘Hu Kadenan ku, pedsukul-sukul aku sa leka ka dikena aku pagidsan nu ped a taw a tanegkawn, salimbuten, takiuga enggu dikena aku mana kanu 'bpangubela a nan sa buwis. 12 Pebpuasa aku pan sa makadua sa sakapadian enggu pedsakatan ku su langun na 'gkapantiali ku.’
13 “Saleta mambu na su 'bpangubela sa buwis na initangka nin i ginawa nin enggu apia nin kapedtengab kanu langit na di nin 'gkatika. 'Gkapanampak'in su laleb'in sa nia nin 'gkadtalu kanu ginawa nin na ‘Hu Kadenan ku na ikalimu aku nengka pan a baladusa.’
14 “Na nia ku madtalu sa lekanu na minuli silan a nia initimbang sa ikelas na su mama a 'bpangubela sa buwis kumin kanu taw a lusud kanu lumpukan a Parisiyu. Kagina apia entain a taw i ipulu nin i ginawa nin na makababa ugaid'a apia entain menem i ibaba nin i ginawa nin na makapulu.”
Su Kinapamalihala nu Isa al-Masih kanu manga Wata
15 Na apia su manganaut pamun gaid a manga wata na pinananggit'u manga taw lu kanu Isa al-Masih asal'a kadapenetan nin silan. Na guna mailay nu 'bpamangunut lun su entu na sinapalan nilan su manga taw. 16 Ugaid'a tinawag'u Isa al-Masih su manga wata ka pinaubay nin sa lekanin. Saleta na nia nin pidtalu kanu 'bpamangunut lun na “Di nu pedsapali su manga wata a nia. Suguti nu a makasia silan sa laki ka maya ba kanu manga wata a nia i makalusud kanu kapendatu nu Kadenan. 17 Saben-sabenal a pedtalun ku sa lekanu i apia entain i di temalima kanu kapendatu nu Kadenan sa maya ba kanu kinatalima nu manga wata a nia na natalatantu i dili silan makalusud lu ba.”
Su Kawasa a Mama
18 Na isa kanu manga 'gkaunutan nu Yahudi i minidsa kanu Isa al-Masih sa “Matidtu a Gulu, ngin i dait a enggulan ku asal'a matalima ku su uyag-uyag a da taman nin?” 19 Nia inisumpat'u Isa al-Masih sa lekanin na “Ngintu ka pedtawagen aku nengka sa matidtu? Dala man ped a matidtu ka su Kadenan bu. 20 Na katawan nengka bun man su manga kasuguan nu Kadenan a ‘Da ka 'gkiuga, da ka mimatay, da ka manegkaw, da ka edsaksi sa dikena benal, pagadati ka su ama nengka enggu su ina nengka.’a” 21 Nia inisumpat'u mama a entu na “Langun nu nia na ipenggulalan ku den iganat kanu wata aku pan.” 22 Na guna makineg'u Isa al-Masih su entu ba na nia nin pidtalu na “Aden pamun satiman a kulang'engka. Uli ka, ka 'bpasa ka su langun nu kaaden nengka. Na ipangenggay nengka su pasa nin kanu manga miskinan ka enggu maaden sa leka su kakawasan lu sa sulega, entu pan ka unut ka sa laki.”
23 Ugaid'a guna makineg'u mama su entu a kadtalu nu Isa al-Masih na nalidu gaid i ginawa nin ka subela-subela i kakawasan nin. 24 Na guna mailay nu Isa al-Masih i nalidu i ginawa nu mama na nia nin pidtalu na “Mapasang a benal kanu manga kawasa i kalusud'ilan kanu kapendatu nu Kadenan. 25 Ka nia pan malemu kanu unta i kaludep'in kanu pesu nu lagum kumin kanu kalusud'u kawasa kanu kapendatu nu Kadenan.”
26 Na nia nakaidsa nu manga taw a nakakineg kanu entu na “Amaika maitu na entain pan besen i malipuas?” 27 Nia inisumpat'u Isa al-Masih na “Di man magaga nu manusia su entu ugaid'a su Kadenan na dala di nin magaga.”
28 Na midtalu si Pitru sa “Panun menem i maya ba sa lekami a nia a initabun nin su langun-langun ka enggu makadtatanggunut sa leka?” 29 Na nia inisumpat'u Isa al-Masih kanilan na “Saben-sabenal a pedtalun ku sa lekanu i apia entain i itabun nin su walay nin udi na kaluma nin, manga suled'in, manga lukes'in enggu manga wata nin sabap kanu kapendatu nu Kadenan 30 na takep-temakep pan i matalima nin sia sa dunia enggu kanu mangauma a timpu na matalima nin su uyag-uyag a da taman nin.”
Su Ikatelu a Kinapayag'u Isa al-Masih kanu Kapatay nin
31 Na inisenggay nu Isa al-Masih su sapulu enggu dua a pinamili nin ka pidtalu nin kanilan i “Ilay nu, 'bpelu tanu sa Awrusalim, na su langun nu nakasulat'u manga nabi pantag kanu Kaka nu Manusia na lu den ba matuman. 32 Na ipalad den sekanin lu kanu manga dikena-Yahudi. Pagumpaken sekanin, pagkayan taman sa panudan 33 enggu pamadasan taman sa imatayan. Ugaid'a su ikatelu nin gay na embibiag sekanin 'bpaluman.”
34 Ugaid'a da nasabutan nu 'bpamangunut lun su langun nu pidtalu nin a entu kagina nakapagena kanilan su maena nu entu. Di 'gkasaut'u pamikilan nilan su manga pidtalu nu Isa al-Masih kanilan.
Su Mama a Di Pakailay lu sa Dalepa a Yariku
35 Na guna su pakasupeg den silan sa dalepa a Yariku na aden mama a di pakailay a 'bpagagayan sia kanu ligid'u lalan ka 'bpamangeni. 36 Na guna nin makineg su madakel a pedsagad na inidsa nin u ngin i 'gkanggula. 37 Na nia nilan lun inisumpat na “'Bpagukit su taw sa Nasarit a su Isa.” 38 Na inilalis'in edtalu i “Tupu nu Daud a su Isa, ikalimu aku nengka pan!” 39 Na su manga taw lu sa unan nu Isa al-Masih na sinapalan nilan su mama sa temelen sa kabpelalis'in ugaid'a makin nin pinakatanug su kabpelalis'in sa “Tupu nu Daud, ikalimu aku nengka pan!”
40 Na mibpalen su Isa al-Masih ka inisugu nin i iten sa lekanin su di a entu pakailay. Guna su nakasupeg den sekanin na inidsan sekanin nu Isa al-Masih sa 41 “Ngin i 'gkalilinian nengka a enggulan ku sa leka?” Nia nin inisumpat na “Mapulu, nia ku 'gkalinian na makailay aku.” 42 Na nia mambu pidtalu nu Isa al-Masih sa lekanin na “Makailay ka den! Ka su salig'engka i napagkapia sa leka.” 43 Na kanu entu demun ba na nakailay su mama taman sa pidtatanggunutan nin su Isa al-Masih enggu pinugi nin su Kadenan. Na guna mailay nu madakel a taw su entu na pinugi nilan bun mambu su Kadenan.