Su Isa al-Masih enggu si Sakiyus
19
Na nakauma su Isa al-Masih sa dalepa a Yariku. Na sia kanu kabpelakaw nin 2 na aden mama lu a bedtuan sa Sakiyus. Sekanin i mapulu nu manga 'bpangubela sa buwis kanu entu a dalepa enggu kawasa gaid. 3 Na pegkiugan nin 'bpagilay su Isa al-Masih ka enggu nin makilala sekanin. Ugaid'a sabap sa madakel su taw na di nin sekanin 'gkailay ka manaut a mama si Sakiyus. 4 Daka nalalaguy sekanin lu sa unan ka namusug kanu kayu a bedtuan sa sikamur asal bu na mailay nin su Isa al-Masih a pedsagad. 5 Na guna mauma nu Isa al-Masih su entu a kayu na tinemingada sekanin ka nia nin pidtalu kani Sakiyus na “Sakiyus, embaba ka san mamagayas ka lu aku pedtumpa kanu walay nengka.” 6 Daka namagayas a benal mambu embaba si Sakiyus a sangat a 'gkapia i ginawa nin ka pinatalus'in kanu walay nin su Isa al-Masih.7 Na guna mailay nu langun na taw lu na namagedunga silan sa “Ngintu ka lu sekanin tinemumpa kanu walay nu mama a nan a baladusa?”
8 Saleta na midtindeg si Sakiyus ka nia nin pidtalu na “Ilay ka, Hu Mapulu, sabad kanu kakawasan ku na inggay ku kanu manga miskinan enggu amaika aden nadsalimbut ku na iuli ku lun su entu sa makapat matakep.” 9 Na nia pidtalu sa lekanin nu Isa al-Masih na “Nakatingguma su kalipuasan kanu nia a sakatiwalayan ka su nia ba man a mama na tidtu a tupu nu Nabi Ibrahim. 10 Kagina nia ba i sabap a kinasia nu Kaka nu Manusia na 'bpangilayn nin su namakasibay ka ibpelipuas'in silan.”
Su Pakenalan pantag kanu Sinaligan sa Kuleta
11 Na gagalu nu kabpakikineg'u manga taw lu na pidtalu menem'u Isa al-Masih su nia a pakenalan. Saleta mambu na kanu entu ba, na masupeg den su Isa al-Masih sa Awrusalim, nia kataw nu manga taw lu na mangagan den makapayag su kapendatu nu Kadenan. 12 Na nia nin pidtalu sa ukit a pakenalan na “Aden datu a 'bpelu sa mawatan a dalepa ka papedsultanen, entu pan ka muli sekanin. 13 Na inipatawag'in su sapulu kataw a ulipen nin ka pinangenggan nin su uman i isa sa kuleta a minaa enggu pidtalu nin kanilan i ipamantiali nilan su entu sa gagalu na dala pan sekanin lu.
14 “Ugaid'a di sekanin 'gkalinian nu manga taw a kasakupan nin taman sa napasugu silan lu kanu pebpawangan nu mama a entu sa edtalun lu i ‘Di nami 'gkalilinian i endatuan kami na mama a nia.’
15 “Apia ka maitu na su entu a mama na nabaluy bun su kapedsultan nin enggu minuli sekanin. Daka inipatawag'in su langun nu ulipen a sinaligan nin sa kuleta ka enggu nin 'gkailay u ngin den i kasela na napantiali nilan. 16 Na su nauna na minubay ka midtalu sa ‘Mapulu, nakapantiali su kuleta a inisalig'engka sa laki sa nakasapulu takep.’ 17 Nia nadtalu nu Sultan na ‘Mapia i entu! Kasaligan ka a ulipen. Kagina ka kasaligan ka sa manaut bu a nia a inisalig sa leka na pakamalen ku mambu seka sa sapulu kainged.’
18 “Na su ikadua menem a ulipen na minubay bun ka midtalu sa ‘Mapulu, nakapantiali su kuleta a inisalig'engka sa laki sa nakalima takep.’ 19 Nia inisumpat'u Sultan na ‘Seka i saligan ku kanu lima kainged.’
20-21 “Na nakauma menem su ikatelu a ulipen sa nia nin pidtalu na ‘Mapulu, nia bun su kuleta nengka. Kagina ka mapasang ka a taw ka 'gkakua nengka su dikena nengka initagu enggu 'gkapagagani nengka su dikena nengka inipamula na 'gkagilekan aku sa leka tembu initagu ku bu su kuleta nengka.’ 22 Nia pidtalu nu Sultan kanu ulipen nin na ‘Da katagan nengka a ulipen. Sa kanu kadtalu nengka a nan na sugaten ku seka sa kawagib. 'Gkatawan nengka den i mapasang aku a taw ka 'gkakua ku su dikena ku initagu enggu 'gkapagagani ku su dikena ku inipamula 23 na ngintu ka da nengka pan itagu sa bangku su kuleta ku ka enggu nia ku kambalingan na aden mauntung'in?’
24 “Daka nia pidtalu nu Sultan kanu 'bpamedtindeg lu na ‘Makin nu kua sa lekanin su inisalig lun a nan ka inggay nu lu kanu ulipen a entu a aden sapulu a kuleta nin.’ 25 Nia nilan inisumpat na ‘Mapulu, di ka den ka aden den sapulu a kuleta nin.’ 26 Nia pidtalu nu Sultan na ‘Nia ku madtalu sa lekanu na apia entain a taw i kasaligan kanu ngin i inisalig lun na makin edsisinggumanan pan su isalig lun, ugaid'a su taw a di kasaligan kanu apia paidu bu a inisalig lun na makin kuan su inisalig lun. 27 Na makapantag menem kanu manga taw a di 'gkalilini sa laki enggu di 'gkalilini sa kapendatu ku na it'u sia sa laki ka imatayi nu sia kanu adapan ku.’ ”
Su Kinauma nu Isa al-Masih sa Awrusalim
28 Guna mapasad'u Isa al-Masih edtalu su langun nu entu na tinemalus sekanin 'bpawang sa Awrusalim. 29 Guna su pakasupeg den sekanin lu kanu manga dalepa a bedtuan sa Bitpaig enggu Bitani lu kanu palaw a bedtuan sa Ulibus na sinugu nin su dua kataw kanu 'bpamangunut lun 30 a maya ba i tutuma nin kanilan, “Lu kanu kanu dalepa a nan sa 'gkasangulan nu ka endaw i kaludep'u na makailay kanu sa manguda a kimar a iniketan a da pamun kagkudai. Na bekali nu ka tundan nu sia. 31 Amaika aden midsa sa lekanu sa ‘Nginan ka pembekalan nu i nan?’ na nia nu edtalu na ‘Nasisita nu Mapulu su nia.’ ”
32 Na ginemanat den silan taman sa natun nilan su pidtalu nin kanilan. 33 Na guna su pembekalan nilan den su manguda a entu a kimar na midtalu su kigkuan lun sa “Nginan ka pembekalan nu i manguda a nan a kimar?” 34 Na nia nilan inisawal na “Nasisita nu Mapulu su nia.”
35 Na tinundan nilan den su manguda a entu a kimar. Na inampisan nilan kanu manga lambung'ilan ka pinagkuda nilan su Isa al-Masih. 36 Guna su nakagkuda den su Isa al-Masih na inibelat'u manga taw lu kanu lalan su manga lambung'ilan.b
37 Na guna su pakasupeg-pakasupeg den silan sa Awrusalim ka 'bpeludus den silan kanu Palaw nu Ulibus na nangapia i ginawa nu 'bpamangunut lun enggu linemudsu silan mamugi kanu Kadenan sa matanug sabap kanu langun nu nailay nilan a kangagaipan a kabarakatan 38 sa nia nilan pidtalu na
“Palihalan su Datu a pakauma sia a sinugu nu Kadenan!
Aden kalilintad kanu Kadenan a lu sa sulega.
Pugin su Kadenan a lu sa sulega!”
39 Na aden manga taw a lusud kanu lumpukan a Parisiyu a lu kanu madakel a taw a midtalu sa “Gulu, sapali ka pan i 'bpamangunut a nan sa leka.” 40 Na nia inisumpat'u Isa al-Masih na “Nia ku madtalu sa lekanu na amaika temelen silan na nia menem ba manga watu a nia i lemalis sa kapugi.”
41 Guna su pakauma den silan sa Awrusalim ka 'gkasandeng'ilan den na nakapaguguliang su Isa al-Masih 42 sa nia nin nadtalu na “U mana bu man ka 'gkatawan nu sa saguna a gay u ngin i makaenggay sa lekanu sa kalilintad! Ugaid'a pila ginawa ka inipagema den man i nia sa lekanu. 43 Ka aden gay a balibeten nu kuntela nu sa kuta su alad'u ka enggu kanu di mamakaliu. 44 Na lupet-lupeten kanu nilan taman kanu manga wata nu. Na dala masama a apia satiman a watu a mamakapamaguntul sabap sa da nu itagu sa ginawa su kinauma nu sinugu nu Kadenan.”
Su Kinapamugaw nu Isa al-Masih kanu manga Padagang lu kanu Suti a 'Bpagagaman
45 Na linemudep su Isa al-Masih lu kanu lama-lama nu Suti a 'Bpagagaman ka pinamugaw nin su manga padagang lu 46 sa nia nin pidtalu kanilan na “Nakadalem kanu kitab i ‘Su walay ku na walay a 'bpangeni-ngenian’ ugaid'a inumbal'u a salag'u manga tanegkawn!”c
47 Na uman gay na 'bpangusiat bu su Isa al-Masih lu kanu Suti a 'Bpagagaman. Na su manga mapulu nu 'bpamangurban enggu su manga gulu nu pangitaban taman kanu 'gkangaunutan nu manga Yahudi na pebpapangilayn nilan i ukit a kaimatay nilan lun. 48 Ugaid'a dili 'gkasulut ka makapal a benal i manga taw a mindidilimudan lu sa lekanin ka 'bpamakikineg lun taman sa ipedtagu nilan sa ginawa su manga usiatan nin.